சொத்து குவிப்பு வழக்கு தீர்ப்பு 27-ந் தேதிக்கு தள்ளிவைப்பு

**சிவா** · **சிவா** Wed Sep 17, 2014 7:35 am

பாதுகாப்பு காரணங்களுக்காக தனிக்கோர்ட்டை பரப்பன அக்ரஹாராவுக்கு இடம் மாற்றியும் அதற்கு வசதியாக சொத்து குவிப்பு வழக்கில் தீர்ப்பை 27-ந் தேதிக்கு தள்ளி வைத்தும் ஜெயலலிதாவின் கோரிக்கையை ஏற்று தனிக்கோர்ட்டு நீதிபதி உத்தரவிட்டார்.

சொத்து குவிப்பு வழக்கு

தமிழக முதல்-அமைச்சர் ஜெயலலிதா, சசிகலா, சுதாகரன், இளவரசி ஆகியோர் மீதான சொத்து குவிப்பு வழக்கு பெங்களூர் தனிக்கோர்ட்டில் நடைபெற்று வருகிறது. இந்த வழக்கில் அரசு தரப்பு மற்றும் குற்றம் சாட்டப்பட்டு உள்ளவர்களின் வக்கீல்கள் இறுதி வாதத்தை நிறைவு செய்தனர். இதையடுத்து இந்த வழக்கின் தீர்ப்பு 20-ந் தேதி வழங்கப்படும் என்று தனிக்கோர்ட்டு நீதிபதி ஜான் மைக்கேல் குன்கா அறிவித்தார்.

இந்த நிலையில் ஜெயலலிதா சார்பில் பெங்களூர் தனிக்கோர்ட்டில் நேற்று முன்தினம் ஒரு மனு தாக்கல் செய்யப்பட்டது. குற்றம் சாட்டப்பட்டு உள்ளவர்களில் ஜெயலலிதா தமிழக முதல்-அமைச்சராக இருப்பதாலும், அவர் ‘‘இசட் பிளஸ்’’ பாதுகாப்பில் இருப்பதாலும், பாதுகாப்பு கருதி கோர்ட்டை பரப்பன அக்ரஹாராவுக்கு மாற்ற வேண்டும் என்றும் மனுவில் கோரப்பட்டது.

நகர போலீஸ் கமிஷனர்

பெங்களூர் தனிக்கோர்ட்டில் நீதிபதி ஜான் மைக்கேல் குன்கா முன்னிலையில் இந்த மனு நேற்று விசாரணைக்கு வந்தது. அப்போது அரசு சிறப்பு வக்கீல் பவானிசிங், ஜெயலலிதா சார்பில் வக்கீல்கள் குமார், பன்னீர் செல்வம் ஆகியோர் ஆஜரானார்கள். அப்போது பெங்களூர் நகர போலீஸ் கமிஷனர் எம்.என்.ரெட்டி சார்பில் அல்சூர் கேட் போலீஸ் நிலைய இன்ஸ்பெக்டர் ஒரு கடிதத்தை நீதிபதியிடம் வழங்கினார்.

அந்த கடிதத்தில் கூறி இருப்பதாவது:-

போலீஸ் கமிஷனர் கடிதம்

‘‘இந்த வழக்கில் குற்றம் சாட்டப்பட்டு உள்ளவர்களில் ஜெயலலிதா தமிழக முதல்-அமைச்சராக உள்ளார். மேலும் அவர் ‘‘இசட் பிளஸ்’’ பாதுகாப்பில் உள்ளார். அவர் இந்த கோர்ட்டில் ஆஜராக வரும்போது சில பாதுகாப்பு நடவடிக்கைகளை எடுக்க வேண்டியுள்ளது. இதனால் மற்ற கோர்ட்டுகளில் வழக்கு விசாரணை பாதிக்கும். அவரது ஆதரவாளர்கள் மற்றும் அவரை பார்க்க அதிகளவில் மக்கள் வரக்கூடும்.

கடந்த 2012-ம் ஆண்டு முன்னாள் மந்திரி ஜனார்த்தனரெட்டியை கோர்ட்டில் ஆஜர்படுத்த வந்தபோது இதே கோர்ட்டு வளாகத்தில் பத்திரிகையாளர்கள், வக்கீல்கள் மற்றும் போலீசார் இடையே கலவரம் ஏற்பட்டது. சட்டம்-ஒழுங்கு பாதிக்கப்பட்டது. இதனால் அந்த கோர்ட்டுகளில் வழக்கு விசாரணையும் பாதிக்கப்பட்டது. இதே வழக்கில் கடந்த 2011-ம் ஆண்டு ஜெயலலிதா வாக்குமூலம் அளித்தபோது இந்த கோர்ட்டு பரப்பன அக்ரஹாராவுக்கு மாற்றப்பட்டது. அங்கு 4 நாட்கள் ஆஜரானார். எனவே, இந்த முறையும் கோர்ட்டை பரப்பன அக்ரஹாராவுக்கு மாற்றினால் பாதுகாப்பு ஏற்பாடுகளை செய்ய வசதியாக இருக்கும் என்பதை தெரிவித்துக் கொள்கிறேன்’’.

இவ்வாறு அந்த கடிதத்தில் கூறப்பட்டு இருந்தது.

தீர்ப்பு தேதி தள்ளிவைப்பு

போலீஸ் கமிஷனரின் இந்த ஆலோசனையை ஏற்றுக் கொண்ட நீதிபதி, இந்த தனிக்கோர்ட்டை பரப்பன அக்ரஹாராவில் உள்ள காந்தி பவனுக்கு மாற்றுவதாக அறிவித்தார்.

மேலும் நீதிபதி கூறுகையில், ‘‘20-ந் தேதி தீர்ப்பு கூறப்படும் என்று ஏற்கனவே அறிவிக்கப்பட்டு உள்ளது. இதற்கு இன்னும் 3 நாட்கள் மட்டுமே உள்ளது. அதற்குள் வழக்கு சம்பந்தமான ஆவணங்களை இடம் மாற்றுவது மற்றும் பாதுகாப்பு ஏற்பாடுகளை செய்வது என்பது இயலாது என்பதால் சொத்து குவிப்பு வழக்கின் தீர்ப்பை 27-ந் தேதிக்கு தள்ளி வைக்கிறேன்’’ என்று அறிவித்தார்.