அம்மாவின் அவதூறு வழக்குகள்

சுப்பிரமணியசாமி மீது ஜெயலலிதா 3–வது வழக்கு தாக்கல் செசன்சு கோர்ட்டில் விரைவில் விசாரணை

டூவிட்டர் இணையதளம் பக்கத்தில் அவதூறு கருத்தினை வெளியிட்ட சுப்பிரமணியசாமி மீது முதல்–அமைச்சர் ஜெயலலிதா அவதூறு வழக்கு தொடர்ந்துள்ளார்.

சென்னை மாவட்ட முதன்மை செசன்சு கோர்ட்டில், முதல்–அமைச்சர் ஜெயலலிதா சார்பில் மாநகர அரசு குற்றவியல் தலைமை வக்கீல் எம்.எல்.ஜெகன் தாக்கல் செய்துள்ள மனுவில் கூறியிருப்பதாவது:–

அவதூறான கருத்து

தமிழக முதல்–அமைச்சர் ஜெயலலிதா, சாதி, மதம், இனம் என்று எவ்வித பாகுபாடுகளும் இல்லாமல் அனைத்து மக்களாலும் ஏற்றுக்கொள்ளப்பட்ட ஒரே தலைவர் ஆவார். அவர், கடந்த 2011–ம் ஆண்டு சட்டசபை தேர்தலில் பொதுமக்களின் பெரும் ஆதரவினை பெற்று முதல்–அமைச்சராக பதவி வகித்து வருகிறார்.

இந்த நிலையில், பாரதீய ஜனதா கட்சியை சேர்ந்த சுப்பிரமணியசாமி, தன்னுடைய ‘டூவிட்டர்’ இணையதளம் பக்கத்தில் கடந்த செப்டம்பர் 11–ந் தேதி முதல்–அமைச்சர் பற்றி அவதூறான கருத்துக்களை பதிவு செய்துள்ளார்.
நடவடிக்கை

அதில், ‘ஜெயலலிதா அரசு தீவிரவாத அமைப்புடன் நட்பாக உள்ளது. விடுதலைப்புலி இயக்கத்தின் நிர்வாகி மறைந்த திலீபன் என்பவரது நினைவு தினத்தை தமிழகத்தில் கடைப்பிடிப்பதற்கு போலீசார் அனுமதி வழங்கியுள்ளனர்’ என்று கூறியுள்ளார்.

இந்த கருத்தின் மூலம் தமிழக மக்கள் மத்தியில் முதல்–அமைச்சருக்கு உள்ள நற்பெயருக்கு களங்கம் ஏற்பட்டுள்ளது. எனவே, அவதூறான, ஆதாரமற்ற கருத்தினை இணையதளத்தில் வெளியிட்ட சுப்பிரமணியசாமி மீது அவதூறு சட்டத்தின் கீழ் நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.

இந்த மனு மாவட்ட முதன்மை நீதிபதி ஆதிநாதன் முன்னிலையில் விரைவில் விசாரணைக்கு வரவுள்ளது. சுப்பிரமணியசாமி மீது ஏற்கனவே, முதல்–அமைச்சர் ஜெயலலிதா சார்பில் இரண்டு அவதூறு வழக்கு தாக்கல் செய்துள்ள சூழ்நிலையில், தற்போது அவர் மீது மூன்றாவது வழக்கு தாக்கல் செய்திருப்பது குறிப்பிடத்தக்கதாகும்.