துன்பம் களையும் துதிப்பாடல்கள்!

by **சிவா** Wed Sep 17, 2014 1:46 am

நவராத்திரி புண்ணிய காலத்தில் தேவி மகாத்மியம், துர்கா சப்தசதி, தேவி சகஸ்ரநாமம், லலிதா திரிசதி, லலிதாம்பாள் சோபனம் ஆகியவற்றில் ஏதேனும் ஒன்றை பாராயணம் செய்து அம்பாளை வழிபடுவதால் விசேஷ பலன்கள் கைகூடும். இயலவில்லையெனில், கீழ்க்காணும் எளிய தமிழ்ப் பாடல்களால் முப்பெருந்தேவியரையும் தொழுது வணங்கலாம்.

ஏதேனும் சித்ரான்னம் மற்றும் சர்க்கரைப் பொங்கல் நிவேதனம் செய்து, மலைமகளை செவ்வரளி அல்லது செம்பருத்திப் பூக்களாலும், லட்சுமிதேவியை செந்தாமரை மலர்களாலும், கலைவாணியை மல்லிகை போன்ற வெண்ணிற பூக்களாலும் அர்ச்சித்து வணங்குங்கள். பிறகு இங்கே தரப்பட்டிருக்கும் துதிப்பாடல்களைப் பாடி, தூப தீபாராதனை செய்து முப்பெருந்தேவியரையும் வழிபடுவதால் சகல நன்மைகளும் பெருகும். வறுமைகள், பிணிகள் யாவும் நீங்கி வளம் கொழிக்கும்.

மலைமகள் துதிப் பாடல்...

மனிதரும் தேவரும் மாயா முனிவரும் வந்து சென்னிக்
குனிதரும் சேவடிக் கோமளமே கொன்றைவார் சடைமேல்
பனிதரும் திங்களும் பாம்பும் பகீரதியும் படைத்த
புனிதரும் நீயும் என் புந்தி எந்நாளும் பொருந்துகவே

அலைமகள் துதிப் பாடல்...

நீங்காது நின்மகனும் நீண்ட திருமாலும்
பாங்காக அன்றுவந்த பாற்கடல்போல் தேங்காமல்
நன்றாக நீயிருந்து நாளும் வளம் பெருக்கி
என்றைக்கும் நீங்காதிரு

கலைமகள் துதிப்பாடல்...

மண்கொண்ட வெண்குடைக் கீழாக
மேற்பட்ட மன்னரும் என்
பண்கண்ட அளவில் பணியச் செய்வாய்
படைப்போன் முதலாய்
விண்கண்ட தெய்வம் பல்கோடி உண்டேனும்
விளம்பில் உன்போல்
கண்கண்ட தெய்வம் உளதோ சகலகலா வல்லியே