நம்பிக்கை - தென்கச்சி சுவாமிநாதன்

by **சிவா** Tue Sep 16, 2014 10:25 pm

பேருந்தில் பயணித்துக் கொண்டி ருந்தார் ஒருவர். வழியில், பயணச்சீட்டு பரிசோதகர் பேருந்தில் ஏறினார். அவரைப் பார்த்ததும் பயணச்சீட்டைத் தேட ஆரம்பித்தார் நம்மவர்.

தன்னிடம் இருந்த துணிப்பையில் கையை விட்டுப் பார்த்தார்; கிடைக்கவில்லை. கையில் வைத்திருந்த புத்தகத்தின் நடுவிலே இருக்கிறதா என்று பார்த்தார்... இல்லை. தான் கொண்டு வந் திருந்த பெட்டியில் தேடினார்; அங்கும் இல்லை!

தொடர்ந்து தேடிக் கொண்டே இருந்தார். பயணச் சீட்டைக் காணவில்லை.

பரிசோதகர் பார்த்தார். ''பரவாயில்லை... மெதுவா தேடுங்க. நான் மறுபடியும் வர்றேன்!'' என்று கூறி விட்டு, அப்பால் நகர்ந்து சென்று விட்டார்.

நம்மவர், தொடர்ந்து தேடிக் கொண்டிருந்தார். அருகில் இருந்தவர் இவரைக் கவனித்தார்.

''ஐயா, உங்ககிட்டே ஒண்ணு கேட்கலாமா?''

''என்ன?'' என்றார் நம்மவர்.

''எல்லா இடத்துலேயும் பயணச் சீட்டைத் தேடுறீங்க... ஆனால், ஒரு இடத்துல மட்டும் தேடலையே!''

''என்ன சொல்றீங்க?''

''உங்கள் சட்டைப் பையில் மட்டும் நீங்கள் தேடவே இல்லையே?'' என்று கேட்டார் அருகில் இருந்தவர்.

உடனே நம்மவர், ''உண்மைதான்! அந்த ஓர் இடத்தில்தான் பயணச் சீட்டு இருக்கும் என்று நம்புகிறேன்!'' என்றார்.

''அப்புறம் ஏன் அங்கு தேடாமல் இருக்கிறீர்கள்?''

இந்தக் கேள்விக்கு நம்மவர் பதில் சொன்னார் ''அந்த நம்பிக்கையை இழக்க நான் தயாராக இல்லை!''

நண்பர்களே! அவரது இந்த பதில், நம்மில் சிலரை சிரிக்க வைக்கலாம். சிலரை சிந்திக்கவும் வைக்கலாம்.

வாழ்க்கைப் பயணத்தில், 'இருக்கிறதா? இல்லையா?' என்பது முக்கியம் இல்லை; நம்பிக்கையே முக்கியம்!

சிலரது பயணம் இன்னும் வேடிக்கையானது.

ரயிலில் பயணித்துக் கொண்டிருந்தான் ஒருவன். பரிசோதகர் வந்தார். அவன் பயணச்சீட்டை தன் பைக்குள் தேடினான். பயணச் சீட்டு தொலைந்து விட்டது. கிடைக்கவில்லை. அழ ஆரம்பித்து விட்டான்.

எதிரில் இருந்தவர் ஆறுதல் சொன்னார் ''போகட்டும் விடுங்க; வேறு பயணச் சீட்டு வாங்கிக்கலாம்!''

''நான் அதுக்காக அழலீங்க!'' என்றான் இவன்.

''வேற எதுக்காக?''

''அந்த சீட்டு கிடைச்சாத்தானே நான் எந்த ஊர்லே இறங்கணும்ங்கறது தெரியும்?''

இன்றைய மனிதர்களின் பயணம் இப்படித்தான். இலக்கில்லாமல் போய்க் கொண்டிருக்கிறது!