எப்போது ஒன்றாவார்

karaumalaithamizhazhan · karaumalaithamizhazhan Tue Sep 16, 2014 12:51 pm

எப்போது ஒன்றாவார்
பாவலர் கருமலைத்தமிழாழன்

அடிபட்டு உதைப்பட்டு மானம் கெட்டே
அடிமையராய் வாழ்வதற்குக் கற்க வேண்டின்
முடிமன்னர் மூவராண்ட தமிழ கத்தில்
முடியில்லாத் தமிழரினைக் கண்டால் போதும்
தடிகொண்டு அடித்தாலும் தடவிக் கொண்டு
தலைமீது மாற்றாரை ஏற்றிக் கொண்டு
தடிமாடாய் வாழ்பவனைக் காண வேண்டின்
தமிழகத்துத் தெருக்களிலே நின்றால் போதும் !
தன்மானம் இல்லாமல் தமிழ ரல்லார்
தலைமையினை ஏற்றவர்க்குத் தொண்ட ராகி
வன்முறையில் தம்மினத்தை அடித்துக் கொல்லும்
வரலாற்று நிகழ்ச்சிகளைக் காண வேண்டின்
முன்னோராம் மூவேந்தர் வழியில் நாளும்
மூத்தகுடி எனச்சொல்லி எச்சில் நாயாய்
தன்னினத்தைக் கடிக்கின்ற தமிழர் வாழும்
தமிழகத்து வீதிகளில் நின்றால் போதும்!
தண்ணீரைத் தரமறுக்கும் மாநி லத்தைத்
தன்னுழைப்பால் செழிப்பாக்கி ஏள னத்தில்
கண்ணீரில் வாடுகின்ற தம்மி னத்தை
கடல்கடந்து பிறநாட்டைச் செழிக்கச் செய்து
புண்ணாகி வாடுகின்ற தம்மி னத்தைப்
புரப்பதற்கு நினையாத ஓரி னத்தை
மண்மீதில் காணவேண்டின் தமிழ கத்து
மறம்மறந்த வீடுகள்முன் நின்றால் போதும் !
தொப்புளொடு உறவென்று நாளும் பேசித்
தோட்டாவால் உயிர்பறிக்கப் பார்த்தும் நெஞ்சில்
கொப்பளிக்கும் இனவுணர்வில் ஒன்று சேர்ந்து
கொடுமையினை எதிர்ப்பதற்கு முனைந்தி டாத
தப்பான ஓரினத்தைக் காண வேண்டின்
தமிழனென்னும் தறுதலைமுன் நின்றால் போதும்
எப்போது இந்நிலைதான் மாறும் ஒன்றாய்
எந்தமிழர் சேர்ந்துபகை முடித்தல் கூடும் !