சிந்தித்தீரா

by karaumalaithamizhazhan Tue 16 Sep 2014 - 14:16

சிந்தித்தீரா
பாவலர் கருமலைத்தமிழாழன்

என்னயில்லை இந்தநாட்டில் எனறே நாளும்
எழுதுகிறோம் பேசுகின்றோம் எல்லோ ருக்கும்
சின்னவொரு வீடொன்றும் மூன்று வேளை
சிறிதளவு உண்பதற்கும் வாய்த்த துண்டா
பன்னீரில் ஒருசாரர் குளிக்கப் பல்லோர்
பருகுதற்கும் நீரின்றித் தவிக்கின் றார்கள்
முன்னுக்குப் பின்முரணாய் இருப்ப தற்கு
முன்நிற்கும் தன்னலந்தான் சிந்தித் தீரா !

எல்லாமும் உள்ளதிந்த நாட்டி லென்றே
ஏறிமேடை வாய்கிழிய முழங்கு கின்றோம்
எல்லோர்க்கும் உள்ளதுவா என்றே நெஞ்சில்
எண்ணுவோர்கள் எத்தனைப்பேல் உள்ளா ரிங்கே
வல்லவராய் வன்முறையில் இருப்ப வர்கள்
வளமாக வாழ்வதுவும் ஏது மின்றி
நல்லவர்கள் துடிப்பதுவும் நாட்டி லின்று
நடப்பதற்குத் தன்னலந்தான் சிந்தித் தீரா !

ஒன்றாக ஒருவீட்டில் இருப்ப தலே
ஒற்றுமையோ வந்திடாது மனங்க ளெல்லாம்
ஒன்றாகி உணர்வெல்லாம் ஒன்றாய் ஆகி
ஒருவருக்குள் ஒருவராகக் கலக்கும் போதே
தன்னலங்கள் இல்லாத ஒருமைப் பாடு
தழைத்திங்கே குடும்பத்தில் மகிழ்ச்சி பொங்கும்
நன்மையிங்கே அனைவருக்கும் கிடைப்ப தற்கு
நாட்டிலின்றோ இவ்வுணர்வே நமக்கு வேண்டும் !

****************

by **மாணிக்கம் நடேசன்** Tue 16 Sep 2014 - 15:42

சிந்திக்க அது வேணும்ல, அதான் இல்லையே, அதங்க மூளை,அது இருந்தா எந்த மூலையில இருந்தாலும் தெரியும், புரியும்.

சிந்தித்தீரா

சிந்தித்தீரா

Re: சிந்தித்தீரா