தங்க மகள் வித்யா!

''இது ஓர் ஆரம்பம்தான். போக வேண்டிய தூரம் இன்னும் நிறைய இருக்கு!''

- அடக்கமான வார்த்தைகளைத் தேர்ந்தெடுத்துப் பேசுகிறார், மெடல்களின் நாயகி, டாக்டர் வித்யா!

நடந்து முடிந்த மருத்துவப் பல்கலைக்கழக பட்டமளிப்பு விழாவில் 7 தங்கப் பதக்கங்கள் மற்றும் 3 வெள்ளிப் பதக்கங்களுடன், தமிழ்நாட்டின் முதல் மாணவியாக மகுடம் சூடியிருக்கும் சென்னை, மருத்துவக் கல்லூரியின் தங்க மகள் வித்யா, கழுத்து முழுக்க மெடல்களைப் பெற்றுவிட்ட கையோடு, முதுகலை படிப்பில் இடம்பிடிக்க, கோச்சிங் வகுப்பில் சேர்ந்துவிட்டார். கிளாஸுக்குக் கிளம்பிக்கொண்டிருந்த வேளையில் கிடைத்தது ஒரு சந்திப்பு!

'நான் பிறந்து வளர்ந்தது எல்லாமே சென்னைதான். அப்பா பழனியப்பன், அம்மா உமாமகேஸ்வரி ரெண்டு பேருமே ஆடிட்டர்ஸ். டென்த் வரைக்கும் செட்டிநாடு வித்யாஷ்ரம்ல படிச்சேன். அப்போ 480 மதிப்பெண்கள் எடுத்து ஸ்கூல் தேர்ட் வந்தேன். எனக்கு ஆறாம் வகுப்பில் இருந்து டாக்டர் ஆகணும், ஸ்டெதஸ்கோப், கோட் எல்லாம் போடணும்னு ஆசை, அதுவும் எம்.எம்.சி-யில படிக்கணும்னு ஒரு வெறி. அதுக்கு ஸ்டேட் போர்டு சிலபஸ்தான் சரினு, சி.பி.எஸ்.இ-ல இருந்து, மெட்ரிக் ஸ்கூலுக்கு மாறி, பயாலஜி குரூப் எடுத்தேன்.

ப்ளஸ் டூ-வில் 1,186 மார்க்ஸ் எடுத்து ஸ்டேட் தேர்ட் ரேங்க் - சம்ஸ்கிருத மொழிப்பாடத்துல ஸ்டேட் ஃபர்ஸ்ட். 199.5 மெடிக்கல் கட் ஆஃப் வெச்சுருந்தேன். எம்.எம்.சி-ல முதன் முதலா காலடி எடுத்து வெச்ச அந்த நிமிஷம் நான் அடைஞ்ச ஆனந்தத்துக்கு அளவே இல்ல. என்னோட லட்சியத்துக்காக எடுத்து வெச்ச முதல் அடி அதுதான்!'' எனும் வித்யா, முதலாமாண்டில் இருந்தே 80% மதிப்பெண்களோடு யுனிவர்சிட்டி டாப்பராக இருந்து வந்திருக்கிறார். பிசியாலாஜி, பயோ கெமிஸ்ட்ரி, பேத்தாலாஜி, மெடிசன், இறுதியாண்டுப் பாடங்கள் மற்றும் பார்ட் 1, 2 பாடங்களில் முதல் மதிப்பெண், பெஸ்ட் அவுட் கோயிங் எம்.பி.பி.எஸ் ஸ்டூடென்ட் ஆஃப் தி இயர் என வித்யா பெற்றுள்ள மெடல்களின் பட்டியல் நீள்கிறது.

''பிடிச்சதைப் படிக்கும்போது என்ன கஷ்டம் இருக்கப் போகுது? ஸ்கூல் மாதிரி முட்டி மோதிப் படிக்கணும்னு எல்லாம் காலேஜில் அவசியமில்ல. ரிலாக்ஸ்டா, ஆனா சின்ஸியரா படிச்சா போதும். எவ்வளவு நேரம் படிக்கிறோம் என்பதைவிட, எப்படிப் படிக்கிறோம் என்பதுதான் முக்கியம். மற்றபடி வகுப்புகளை ஒழுங்கா கவனிச்சாலே போதும்... வேறெந்த ஸ்பெஷல் கோச்சிங்கும் தேவையில்ல.

எங்க பேராசிரியர்கள் எல்லாரும் அவ்வளவு ஈடுபாட்டோட வகுப்பெடுப்பாங்க. அதுதான் என் வெற்றிக்கும் காரணம். எம்.பி.பி.எஸ்-ஐ பொறுத்தவரைக்கும் தியரி தியரியா படிச்சி மனப்பாடம் செய்றதைவிட, பிராக்டிகலா நிறைய கத்துக்கணும். வார்ட் ரவுண்ட்ஸை எல்லாம் நன்றாக பயன்படுத்திக்கணும். அதுவே பரீட்சைக்கு படிச்ச மாதிரிதான். இங்க ராஜிவ் காந்தி மருத்துவமனையில் பயிற்சிக் காலத்தில் நாங்க பார்த்த ஒரு பிரசவத்தில் ஒரு பெண்ணுக்கு நான்கு குழந்தைகள் பிறந்துச்சு. அதெல்லாம் மறக்க முடியாத பாடம் மட்டுமில்ல, அனுபவமும் கூட'' எனும் வித்யா, படிப்பில் மட்டுமல்ல, விளையாட்டு, இசை, என்.சி.சி என அனைத்திலும் ஆல் ரவுண்டர். பள்ளியில் ஸ்கவுட்டில் பயிற்சிபெற்று அப்போதைய தமிழக கவர்னர் சுர்ஜித் சிங் பர்னாலாவிடம் இருந்து 'ராஜ்புரஸ்கர் விருது’ பெற்றுள்ள இவர், பேட்மின்டன் மற்றும் கேரம்மில் யுனிவர்சிட்டி சாம்பியன். நேரம் கிடைக்கும்போதெல்லாம் பல சபாக்களில் கர்னாடிக் இசைக் கச்சேரி என கலக்கும் வித்யா, சிறந்த ஆர்ட்டிஸ்ட்டும் கூட!

''எங்க காலேஜ்ல வித்யா ஒவ்வொரு விஷ யத்திலும் வித்தியாசமா, சிறப்பா தன்னை வெளிப்படுத்திக்குவா. படிப்பையும் தாண்டி எதிலும் சின்ஸியரா இருப்பா. இவளோட ஓவியங்கள் இல்லாம எங்க காலேஜ் மேக ஸின்ஸ் எதுவும் இருந்ததில்ல. எம்.எம்.சி-யோட 'பெஸ்ட் ஸ்டூடென்ட்’டுக்கான ஜான்சன்ஸ் அவார்டும் இந்த வருஷம் அவளுக்குத்தான்!'' என்கிறார்கள் வித்யாவின் கல்லூரிப் பேராசிரியர்கள், சந்தோஷத்துடன்.

மகிழ்சிகரமான தகவல்கள் , தமிழ்நேசன் அவர்களே !

வித்யா , பெயரிலேயே , சரஸ்வதி தேவி , வேறென்ன வேண்டும் .

வாழ்த்துக்கள் வித்யா , சேவை புரிய அரிய வாய்ப்புகள் .மேலும் பெருமை பட !

ரமணியன்

வாழ்த்துக்கள் வித்யா... மருத்துவ சேவை என்பது மிக அற்புதமான சேவை, அதை செய்யுங்கள் எம் மக்களுக்கு, உங்களை மகேசன் ஷேமமாய் காப்பான்..

பிடித்த அனைத்திலும் கலக்குகிறார் - வாழ்த்துகள்

பிடித்ததை செய்தால்
பிடிக்கும்படி செய்வாய்

நல்ல முன்னுதாரணம் வித்யா...

மனமார்ந்த வாழ்த்துகள் வித்யா தன் ஆசைக்குத்தான் படிக்கணும்.........அப்போதான் இப்படி திறமைகள் வெளிப்படும்.......அடுத்தவா இல்ல ......அப்பா அம்மாகாக...........இல்ல......அவா ஆசைக்காக படித்தால் கஷ்டம்தான்

வாழ்த்துக்கள்