மகா ராஜாக்களின் வாகனம்! புல்லட்

அதிரடி ஆக்ஷன் ஹீரோக்களுக்கு இதுதான் தேர்! பட்... பட் சத்தம், கம்பீரத் தோற்றம், அதிக சக்தி வாய்ந்த இன்ஜின் - இவைதான் புல்லட்டின் அடையாளங்கள்!

புல்லட்டுகளைத் தயாரிக்கும் கம்பெனியான ராயல் என்ஃபீல்ட் நிறுவனம் இங்கிலாந்திலோ, ஜப்பானிலோ இல்லை. நம்மூரில்தான் இருக்கிறது. சென்னை திருவொற்றியூரில் ஐம்பது ஆண்டுகளுக்கும் மேலாக அமைந்திருக்கும் இந்த புல்லட் தொழிற்சாலை, பல வரலாற்றுப் பின்னணிகளைக் கொண்டது.

1982-ம் ஆண்டு ஆல்பர்ட் ஈடி மற்றும் பாப் வாக்கர் என்னும் இருவரால், இங்கிலாந்தில் தையல் இயந்திரங்கள் மற்றும் ஊசிகள் தயாரிக்கும் நிறுவனமாக ஆரம்பிக்கப்பட்ட தொழிற்சாலைதான் பிற்காலத்தில் புல்லட்டுகளைத் தயாரிக்கத் துவங்கியது.

ராயல் என்ஃபீல்ட் நிறுவனம் தயாரித்த முதல் புல்லட் 1933-ம் ஆண்டு விற்பனைக்கு வரத் துவங்கியது. 250 சிசி, 350 சிசி, 500 சிசி என மூன்று மாடல்களில் வெளிவந்தது இந்த முதல் புல்லட்.

இரண்டாம் உலகப் போரின்போது நாஜிப் படைகளுக்கு எதிராக இங்கிலாந்து போர் புரிந்தபோது, இந்த புல்லட்டுகள்தான் ராணுவத்தினரின் முக்கியப் போக்குவரத்துச் சாதனமாக விளங்கியது.

1950-ம் ஆண்டுதான் ராயல் என்ஃபீல்ட் நிறுவனத்தையும் இந்தியாவையும் இணைக்கும் ஆண்டாக அமைந்தது. தமிழ்நாட்டைச் சேர்ந்த கே.ஆர்.சுந்தரம் ஐயங்கார் மற்றும் அவரது மைத்துனர் கே.ஈஸ்வரன் இருவரும் இங்கிலாந்திலிருந்து இந்தியாவுக்கு புல்லட்டுகளை இறக்குமதி செய்வதற்காக ‘மெட்ராஸ் மோட்டார்ஸ்’ என்கிற பெயரில் ஒரு நிறுவனத்தைத் துவக்கினார்கள்.

1953-ம் ஆண்டு இந்தியாவுக்கும் பாகிஸ்தானுக்கும் எல்லைப் பிரச்னையில் போர் மேகங்கள் சூழ்ந்தபோது, இந்திய அரசாங்கம் மெட்ராஸ் மோட்டார்ஸ் நிறுவனத்தை அணுகி, ராணுவத்துக்கு உடனடியாக 350 சிசி திறன்கொண்ட 800 புல்லட்டுகளை வழங்குமாறு கேட்டுக்கொண்டது. மலைப் பாதைகள், கரடுமுரடான பாதைகளில் சென்று எல்லையைச் சோதனை செய்ய புல்லட்தான் சரியான வாகனமாக இருக்கும் என்பதால், எடுத்த முடிவு.

1955-ம் ஆண்டு புல்லட்டுகளை இந்தியாவிலேயே தயாரிக்க அனுமதி வழங்கத் தயாராக இருப்பதாக இந்திய அரசாங்கம் தெரிவிக்க... அடித்தது யோகம் ‘மெட்ராஸ் மோட்டார்ஸ்’ நிறுவனத்துக்கு! ஆண்டுதோறும் 5000 மோட்டார் சைக்கிள்களைத் தயாரிக்க அனுமதி பெற்றது இந்த நிறுவனம்.

1955-ம் ஆண்டு இந்தியாவிலேயே முதல் மோட்டார் சைக்கிள் தயாரிப்பு நிறுவனமாக, சென்னையில் உள்ள திருவொற்றியூரில் உதயமானது ‘ராயல் என்ஃபீல்ட் இந்தியா’ நிறுவனம். .

1956-ம் ஆண்டு, அதாவது தொழிற்சாலை அமைத்து ஓராண்டில் 350 சிசி திறன் கொண்ட 163 புல்லட்டுகளை வெளியிட்டது ராயல் என்ஃபீல்ட். 1960-ம் ஆண்டு இந்தியா முழுக்க 145 இடங்களில் விற்பனை நிலையங்களும், சர்வீ ஸ் சென்டர்களும் திறக்கப்பட்டன.

அப்போது புல்லட், இந்தியாவில் ‘மகாராஜாக்களின் வாகனம்’ என்று பெருமையுடன் அழைக்கப்பட்டது.

1965-ம் ஆண்டு ராயல் என்ஃபீல்ட் நிறுவனத்துக்குச் சோதனையான காலம் என்றுதான் குறிப்பிட வேண்டும். இங்கிலாந்தில் இருந்து வரவேண்டிய உதிரி பாகங்கள் எதுவும் சென்னை தொழிற்சாலைக்கு வராததால், தயாரிப்பில் கடும் சரிவைச் சந்தித்தது. அதற்கு அடுத்த ஆண்டே இங்கிலாந்தில் உள்ள ராயல் என்ஃபீல்ட் நிறுவனம் இழுத்து மூடப்பட்டது.

இருப்பினும், இந்தியத் தொழிற்சாலை வளரத் துவங்கியது. 1973-ம் ஆண்டு 173 சிசி திறன்கொண்ட குருசேடர், 200 சிசி திறன்கொண்ட மினி புல்லட்டுகள் விற்பனைக்கு வந்தன. 1983-ல் ‘டிவிஎஸ்-50’-க்குப் போட்டியாக 50 சிசி திறன்கொண்ட ‘சில்வர் பிளஸ்’ மற்றும் ‘எக்ஸ்ப்ளோரர்’ என்ற பெயரில் மோட்டார் சைக்கிள்களை அறிமுகப்படுத்தியது ராயல் என்ஃபீல்ட்.

1984-ம் ஆண்டு ராயல் என்ஃபீல்ட் மோட்டார் சைக்கிள்கள் முதன்முதலாக இந்தியாவிலிருந்து இங்கிலாந்து மற்றும் ஐரோப்பிய நாடுகளுக்கு ஏற்றுமதி செய்யப்பட்டது.

1989-ம் ஆண்டு இந்தியாவிலேயே முதன்முறையாக 500 சிசி திறன்கொண்ட புல்லட்டை அறிமுகப்படுத்தியது ராயல் என்ஃபீல்ட் நிறுவனம்.

1990-ல் ராயல் என்ஃபீல்ட் நிறுவனத்தை ஐஷர் ( EICHER ) நிறுவனம் விலைக்கு வாங்கியது.

1993-ம் ஆண்டு மோட்டார் சைக்கிள்கள் வரலாற்றில் ஒரு சாதனையாக டீசலில் இயங்கும் ‘டாரஸ்’ என்னும் புல்லட்டை வெளியிட்டது ராயல் என்ஃபீல்ட்.

2002-ம் ஆண்டு ‘தண்டர்பேர்டு’ என்கிற நவீன ரக மோட்டார் சைக்கிளோடு களம் இறங்கி, தற்போது ஆறு வகையான மோட்டார் சைக்கிள்களைத் தயாரித்து வருகிறது.

ராயல் என்ஃபீல்ட் இங்கிலாந்து பின்னணி கொண்டிருந்தாலும் முழுக்க முழுக்க இந்தியக் கரங்களால் தயாராகும் வண்டி.

காலங்கள் பல உருண்டோடினாலும் இன்றும் புல்லட் என்றால் எப்போதுமே மவுசுதான்!

விகடன்