சிறுநீரகத்தை தானமாக கொடுத்து கணவர்களை காப்பாற்றிய மனைவியர்!

**krishnaamma** · **krishnaamma** Mon Sep 08, 2014 9:22 pm

புதுடில்லி: டில்லியில், இரு பெண்கள் தங்கள் சிறுநீரகங்களை தானமாக வழங்கியதின் மூலம், ஒருவருக்கொருவர் மற்ற கணவரின் உயிரை காப்பாற்றியுள்ளனர்.

மத்திய அரசின், 'செயில்' நிறுவனத்தில் பணியாற்றி ஓய்வு பெற்ற, டில்லியைச் சேர்ந்த எஸ்.பி.ராம், 61, சிறுநீரக கோளாறால் பாதிக்கப்பட்டு, மருத்துவமனையில் சிகிச்சை பெற்று வந்தார். அவரின் சிறுநீரகம் செயல் இழந்ததால், கடந்த ஓராண்டாக அவருக்கு, 'டயாலிசிஸ்' சிகிச்சை அளிக்கப்பட்டு வந்தது.

இந்நிலையில், மற்றொரு மத்திய அரசு அதிகாரியான, சந்த் ராம், 57, சிறுநீரகம் பாதிக்கப்பட்டு, அதே மருத்துவமனையில் அனுமதிக்கப்பட்டிருந்தார். இருவருக்கும் சிறுநீரக மாற்று அறுவை சிகிச்சை செய்ய வேண்டியிருந்தது.எனினும், அவர்களுக்கு பொருந்தக்கூடிய சிறுநீரகம் கிடைக்காததால், அறுவை சிகிச்சை செய்வதில் தாமதம் ஏற்பட்டது. எங்கெங்கோ தேடியும், இருவருக்கும் சிறுநீரகம் கிடைக்காததால், இருவரின் குடும்பத்தாரும் விரக்தி அடைந்தனர்.

இந்நிலையில், இரு, 'ராம்'களின் மனைவியரை பரிசோதித்த டாக்டர்கள், எஸ்.பி.ராமின் மனைவியின் சிறுநீரகம், சந்த் ராமுக்கு பொருந்துவதாக தெரிவித்தனர். அதே போல், சந்த் ராம் மனைவியின் சிறுநீரகம், எஸ்.பி.ராமுக்கு பொருந்தியது.இதனால் மகிழ்ச்சி அடைந்த இருவரின் மனைவியரும், தங்கள் சிறுநீரகங்களை தானமாக வழங்க சம்மதம் தெரிவித்தனர். இதையடுத்து, இரு ராம்களுக்கும் அறுவை சிகிச்சை மூலம், சிறுநீரகம் பொருத்தப்பட்டது.

இரு ராம்களின் மனைவியர், தங்களின் சிறுநீரகங்களை மற்றவரின் கணவன்மார்களுக்கு வழங்கி, இருவரின் உயிரையும் காப்பாற்றினர். இதனால், இரு குடும்பத்தாரும் மகிழ்ச்சி அடைந்துள்ளனர்.