இஸ்லாத்தின் இனிய வழி

by **Admin** Mon Feb 23, 2009 1:48 am

இறைவனின் தூதர் (ஸல்) அவர்கள் ஒருநாள் தங்கள் உரையை முடித்தபோது அன்சார்களில் ஒருவர் ஒரு மூட்டை நிறைய பொருட்களைக் கொண்டு வந்தார். அந்த மூட்டை அவரால் தூக்கமுடியாத அளவிற்கு பொருட்களைக் கொண்டதாக இருந்தது.

ஏனையவர்களும் அதுபோல் பொருட்களைக் கொண்டுவந்து குவித்தார்கள். இறுதியில் அங்கு இரண்டு பெரும் குவியல் உணவுப் பொருட்களும், துணிமணிகளும் வந்து குவிந்தன. அப்போது இறைவனின் தூதர் (ஸல்) அவர்களின் முகம் இரண்டு பெரும் பொற்குவியல்களைப் பார்த்ததுபோல் மலர்ந்திருந்தது. பின்னர் பெருமானார் (ஸல்) அவர்கள் சொன்னார்கள்.

இஸ்லாத்தில் ஒரு நல்ல வழிமுறைமையைக் கொண்டு வருபவருக்கு அதற்குரிய கூலி கிடைக்கும். அந்த நல் வழி முறையைச் செயல்படுத்துபவர்களுக்குக் கிடைக்கும் நற்கூலியும் கிடைக்கும்.

- இதில் அந்த நல்ல வழிமுறையைப் பின்பற்றுபவர்களுக்குக் கிடைக்கும் கூலி சற்றும் குறைந்துவிடாது. இஸ்லாத்தில் ஒரு தீய முறைமையைக் கொண்டு வருபவருக்கு அதற்குரிய தண்டனை தரப்படும். இன்னும் அந்தத் தீய முறைமையைப் பின்பற்றி நடப்பவர்களுக்கு உரிய தண்டனையும் சேர்த்துத் தரப்படும். இதில் அந்தத் தீய முறைமையைப் பின்பற்றி நடப்பவர்களுக்குத் தரப்படும் தண்டனை சற்றும் குறைக்கப்படமாட்டாது (முஸ்லிம்)

இந்த நபிமொழிகள் நாம் நன்மைகளைச் செய்வதில் ஒருவருக்கொருவர் போட்டிப் போட்டு முந்திச் செய்யவேண்டும் என நம்மை உந்தித் தள்ளுகின்றன. அதேபோல் இந்த நபிமொழிகள் சமுதாயத்தில் தீமையான பழக்கவழக்கங்களைப் புகுத்துபவர்களை வன்மையாக எச்சரிப்பனவாகவும் அமைகின்றன. சமுதாயத்தில் தீய பழக்க வழக்கங்களைப் புகுத்திவிடுபவர்களுக்குத் தரப்படும் தண்டனை மிகவும் கடுமையானதாகவும், கடினமானதாகவும் இருப்பதால் இதில் ஒன்றுக்கு நு}று முறை ஒதுங்கி இருப்பது நல்லது.