துணை செய் விநாயகா!

கொ.பெ.பி.அய்யா. · 05/09/2014

துணை செய் விநாயகா.

வினைகள் தீர்த்து துணைசெய் நாயகா.
எனைநீ பார்த்து முனைவா (வி)நாயகா.
உனைநான் கேட்டேன் எனைநீ மீட்டு
அணைஉன் கூட்டாய் கணநீ நாதா.

அறிவின் திருவே அமைதியின் உருவே.
உறவின் தருவே உதவும் பெருவே.
தொழிலின் குருவே தொடரும் வரவே.
பொழிவாய் அருளே புகழின் பொருளே.

ஆணை முகனே அன்பின் அழகே.
பாணை வயிறே பண்பின் பழமே.
ஏழை இனமே எலியுன் தனமே.
ஊழை விரட்டு மறுநாள் தினமே.

உலகே சொந்தம் உனக்கென்ன பந்தம்.
பழக என்றும் சனியுன்னை அஞ்சும்.
விலகும் தோஷங்கள் விநாயகா என்றால்.
துலங்கும் நேசங்கள் கணபதி கண்டால்.

வாஸ்தும் பொய்யாகும் வாசல் நீயிருந்தால்
ஆஸ்தி செய்யாகும் ஆனை நீதெரிந்தால்.
சந்தி இடமெங்கும் சந்திக்க நீஉறைந்தால்.
முந்தி சுபமங்கு முன்னிற்கும் நீபுரிந்தால்.

ஞானத் திருமுகமே மோனப்பெரும் பொருளே
தானம் தருமருளே கோணமழி ஐங்கரனே.
பேணும் பெருமானே வேணுமுன் நல்வரமே
நானும் அருகானால் பூணுமணி தாராவேன்.

கொ.பெ.பி.அய்யா.

கொ.பெ.பி.அய்யா. · 05/09/2014

சும்மா இல்லை அம்மா

அம்மா என்றே உயிர் உள்ளே
ஆன்மா அதிரும் தமிழ் சொல்லே.
சும்மா சொல்லும் சொல்லல்ல
சொந்தம் எல்லாம் அதனுள்ளே.

அம்மா எல்லாம் தந்தாளே
அவளே கடவுள் அன்பாலே.
சும்மா இல்லை உறவாலே.
சுகமே அவளுக்கு நான்தானே.

அம்மா என்னைக் கண்டாளே,
அன்றே இன்பம் கொண்டாளே.
சும்மா எனக்கும் பேரில்லை.
சொப்பனம் வளர்த்தாள் தூங்கவில்லை.

அம்மா மனமே நான்தானே .
அவளுக்குள் இருப்பதும் வேறென்ன?
சும்மா அவளும் தூங்கவில்லை.
சுவர்க்கம் படைத்தாள் கனவுள்ளே.

அம்மா வாழ்ந்ததும் எனக்காக.
அவளுக்குள் உயிரும் நானாக.
சும்மா அவளும் உண்ணவில்லை.
சொறிந்தால் அதையே பாலாக.

அம்மா சிந்திய வேர்வையிலே
அடியேன் குளித்தேன் அறிவியிலே!
சும்மா என்னைப் பார்க்கவில்லை.
சூரிய ஒளியாய் ஆக்கிவிட்டாள்.

அம்மா வளர்ந்து உயர்ந்தாளே.
அவளை மிஞ்சநான் மகிழ்ந்தாளே.
சும்மா இல்லை அவள்கனவு.
சுற்றம் போற்ற செய்தாளே.

கொ.பெ.பி.அய்யா.

கொ.பெ.பி.அய்யா. · 05/09/2014

ஆவது தமிழால்.

அமைதி என்றால் தமிழகம்.
ஆவது அடுத்து இந்தியா.
இலங்கை இந்தியா ஒன்றாகும்.
ஈழம் இலங்கை தலையாகும்.
உலகின் முதன்மை தமிழாகும்.
ஊக்கம் அமைதி சிறப்பாகும்.
எழுந்து இந்தியா வல்லரசாகும்.
ஏற்றம் கண்டு நல்லரசாகும்.
ஐந்து நிலங்களும் பைம்பொழிலாகும்.
ஒற்றுமை அன்று உண்மையுமாகும்.
ஓதம் உணர்ந்து வெண்மையுமாகும்.
ஔவியம் அகன்று செவ்வழியாகும்.
அஃதும் தமிழால் தானுருவாகும்.

கொ.பெ.பி.அய்யா.

ஓதம்—ஞானம்,தெளிவு,அறிவு.
ஔவியம்—பொறாமை.

**krishnaamma** · **krishnaamma** Fri Sep 05, 2014 11:28 am

ரொம்ப நல்லா இருக்கு புன்னகை

உங்கள் பெயர் என்ன, எப்படி இந்த தளம் பற்றி அறிந்தீர்கள் என்று , 'அறிமுகம்' பகுதி இல் சென்று அறிமுகப்படுத்திக்கொள்ளுங்கள் புன்னகை

இந்த பதிவைத் துவங்கியவர் நன்றி கூறியுள்ளார் krishnaamma

கொ.பெ.பி.அய்யா. · 05/09/2014

krishnaamma wrote: ரொம்ப நல்லா இருக்கு உங்கள் பெயர் என்ன, எப்படி இந்த தளம் பற்றி அறிந்தீர்கள் என்று , 'அறிமுகம்' பகுதி இல் சென்று அறிமுகப்படுத்திக்கொள்ளுங்கள்

மேற்கோள் செய்த பதிவு: 1085060

கொ.பெ.பிச்சையா
தற்செயலாகத்தான் .