அலசி ஆராய்வது அப்பாடக்கர்!

அ.தி.மு.கவில் பொதுச் செயலாளர் தேர்தல் நடந்தது. 2467 பேர் மனுத்தாக்கல் செஞ்சாங்க. ஆச்சர்யமா இருக்குல்ல... அத்தனை பேருமே ஜெயலலிதா பொதுச் செயலாளர் ஆகணும்னு வேட்புமனு தாக்கல் பண்ணினாங்க. ஜெயலலிதா கட்சி ஆபீஸை எட்டிப் பார்த்ததுமாதிரிகூட தெரியலை. கட்சிக் காரங்களே தேர்தல் நடத்தி, கட்சிக்காரங்களே ஜெயலலிதாவுக்காக வேட்புமனு தாக்கல் செஞ்சு, கட்சிக்காரங்களே ஜெயலலிதா ஆறாவது முறையாகப் பொதுச் செயலாளர் ஆயிட்டாங்கனு முடிவும் அறிவிச்சிட்டாங்க. இப்படி ஒரு ஜனநாயகத்தை உலகத்துக்கே கத்துக்கொடுத்த அ.தி.மு.கவுக்கு எதுவும் விருது, கிருது தர மாட்டாய்ங்களா?

'புலிப்பார்வை’ படத்துக்கு எழுந்த எதிர்ப்புகளைத் தொடர்ந்து பிரவீன் காந்தியும் தயாரிப்பாளர் மதனும் பிரஸ்மீட் நடத்திய வீடியோவைப் பார்த்தேன். அதில் பிரவீன் காந்தி ஓர் அற்புதமான கருத்தைச் சொன்னதைப் பார்த்து எனக்கு செல்லரித்தது, ஸாரி, புல்லரித்தது. பத்திரிகையாளர் ஒருவர், ''விடுதலைப் புலிகளைப் பற்றியும் பிரபாகரனைப் பற்றியும் ஆண்டன் பாலசிங்கம் தொடங்கி நெடுமாறன் வரை பல பேர் புத்தகம் எழுதியிருக்கிறார்கள். ஆனால் நீங்கள் 'புலிப்பார்வை' படத்திற்காக ஒரு புத்தகத்தையும் படித்ததுபோல் தெரியவில்லையே’ என்று கேட்கிறார். அதற்கு பிரவீன் காந்தி சொன்ன பதில்தான் 'அடடடா அப்பப்பா’ ரகம். ''நான் 6 மாசமா யுடியூப் முன்னாலேயே உக்காந்திருந்தேன். யுடியூப் பார்த்தாலே எல்லா விஷயங்களையும் தெரிஞ்சுக்கலாம். நான் என்ன புத்தகமா எழுதப்போறேன், புத்தகங்களைப் படிக்க. விஷுவலா காட்டப்போறேன். அதான் யூடியூப் பார்த்தேன்.'' என்றார். 'புத்தகம் எழுதுறவங்கதான் புத்தகம் படிக்கணும், படம் எடுக்கிறவங்க யூடியூப் பார்த்தா போதும்’ ஆஹா, இப்படியொரு கலைக் கோட்பாட்டை உலகத்தில் எந்த அறிஞரும் சொல்லல. பிரவீன் காந்தி மட்டும்தான் சொல்லியிருக்கார். 'புலிப்பார்வை’ யில் ஒரு கலைப்பார்வை, அடடே... மூணு ஆச்சர்யக்குறி!

சமீபத்தில் டி.வியில் 'கில்லி’ படம் பார்த்தபோதுதான் எனக்கு அந்த விஷயம் ஸ்ட்ரைக் ஆனது. 'கில்லி’யில் வீட்டில் இருப்பவர்களுக்கே தெரியாமல் த்ரிஷாவை விஜய் ஒளித்துவைத்திருப்பார். 'துப்பாக்கி’ படத்திலும் விஜய் தீவிரவாதியை வீட்டில் யாருக்கும் தெரியாமல் ஒளித்துவைத்திருப்பார். இதில் இருந்து ஒளித்துவைப்பதன் மூலம் உலகத்துக்கு ஏதோ விஜய் சொல்ல வர்றார்னு மட்டும் புரியுது. ஆனா என்னன்னுதான் புரியலை!

வழக்கமா ஆந்திராவில் இருந்து தமிழ்நாட்டுல நகராட்சி எப்படி செயல்படுதுனு பார்க்கிறதுக்கு அதிகாரிகள் வந்தாங்க, அம்மா உணவகம் எப்படி செயல்படுதுனு பார்க்க, உ.பியில் இருந்தோ ம.பியில் இருந்தோ அதிகாரிகள் வந்தாங்கனு செய்தி வரும். ஆனா, இந்தச் செய்தியைப் பார்த்து நான் ஆடிப்போயிட்டேன். 'தமிழ்நாட்டில் மதுபானக் கடைகள் எப்படி செயல்படுகின்றன என்று பார்க்க ஒரிசா அதிகாரிகள் தமிழகம் வருகை’. அது சரி, அங்கங்கே இருந்து தமிழ்நாட்டுக்கு வந்து எட்டிப் பார்க்கிறாங்களே, இந்தா பக்கத்துல இருக்கு கேரளா. அங்கே கொஞ்சம் கொஞ்சமா மதுவிலக்கு கொண்டுவர்றாங்க. அதை எப்படிச் செயல்படுத்துறாங்க, பொருளாதார இழப்பை எப்படி சரிக்கட்டுறாங்கனு பார்க்க, தமிழ்நாட்டில் இருந்து யாரும் கேரளா பக்கம் எட்டிப்பார்த்த மாதிரித் தெரியலையே!