புரோ கபடியில் ஜெயித்தது ஜெய்ப்பூர் அணி,,,

மும்பை: ‘புரோ’ கபடி லீக் தொடரின் முதல் சாம்பியன் பட்டத்தை ஜெய்ப்பூர் அணி தட்டிச் சென்றது. பரபரப்பான பைனலில் மும்பை அணியை 35–24 என்ற புள்ளிக்கணக்கில் மிகச் சுலபமாக வீழ்த்தியது.
ஐ.பி.எல்., ‘டுவென்டி–20’ கிரிக்கெட் பாணியில், முதலாவது ‘புரோ’ கபடி லீக் தொடர் இந்தியாவில் வெற்றிகரமாக நடந்தது.இதில், 8 அணிகள் பங்கேற்றன.
ரசிகர்கள் ஆர்வம்: நேற்று மும்பையில் நடந்த பைனலில் பாலிவுட் நடிகர் அபிஷேக் பச்சனின் ஜெய்ப்பூர் பிங்க் பான்த்தர்ஸ் அணி, மும்பை அணியை சந்தித்தது. இந்திய மண்ணில் பிறந்த விளையாட்டு கபடி என்பதால், அரங்கம் நிரம்பி வழிந்தது. ‘டிவி’ நேரடி ஒளிபரப்பிலும் ஏராளமான ரசிகர்கள் போட்டியை கண்டு களித்தனர்.
ஆக்ரோஷ ஆட்டம்: இரு அணிகளும் ஆக்ரோஷமான ஆட்டத்தை வெளிப்படுத்தின. துவக்கத்தில் கேப்டன் அனுாப் குமார் அசத்த, மும்பை அணி 4–2 என முன்னிலை பெற்றது. இதற்கு பின் ஜெய்ப்பூர் அணி முழுமையாக ஆதிக்கம் செலுத்தியது. இந்த அணியின் மனிந்தர் சிங்(7 புள்ளி), ராஜேஷ் நர்வல்(5) அசத்தினர்.
தற்காப்பு பலம்: ஜெய்ப்பூர் அணிக்கு தற்காப்பு பகுதி பலமாக இருந்தது. எதிரணி வீரர்களை சுலபமாக மடக்கினர். இதன் மூலம் 13 புள்ளிகளை பெற்றது. மும்பைக்கு தற்காப்பு பகுதி தான் பலவீனமாக இருந்தது. கேப்டன் அனுாப் குமாரையே(11 புள்ளி) பெரிதும் சார்ந்திருந்தது. இவர், பிடிபட்டு வெளியேறியதால் பெரும் பின்னடைவை சந்தித்தது. முதல் பாதியில் ஜெய்ப்பூர் அணி 18–13 என்ற வலுவான முன்னிலை பெற்றது.
ஜஸ்விர் மிரட்டல்: இரண்டாவது பாதியிலும் ஜெய்ப்பூர் அணி தான் மிரட்டியது. இந்த அணியின் ஜஸ்விர் சிங் தனிநபராக பம்பரமாக சுழன்று ஆடினார். கபடி...கபடி என மூச்சுவிடாமல் முணுமுணுத்தவாறு, ஒரே ‘ரெய்டில்’ நான்கு புள்ளிகளை அள்ளினார். இவரது ஆட்டத்துக்கு ஈடுகொடுக்க முடியாத மும்பை அணி, கடைசி வரை மீளவில்லை. இறுதியில் ஜெய்ப்பூர் அணி 35–24 என்ற புள்ளிக்கணக்கில் வெற்றி பெற்று முதலாவது கோப்பையை கைப்பற்றியது.
பாட்னா 3வது இடம்: முன்னதாக நடந்த மூன்றாவது இடத்துக்கான போட்டியில் அசத்திய பாட்னா பைரேட்ஸ் அணி, பெங்களூரு புல்ஸ் அணியை 29–22 என்ற புள்ளிக்கணக்கில் வீழ்த்தியது.
thinamalar