கத்தி' பட பிரச்னை: விளம்பரங்களை தேடிக்கொள்ள செய்யும் மேஜிக்- எஸ்.ஏ.சந்திரசேகர்

(30/08/2014)

தேனி: 'கத்தி' படத்தை எதிர்ப்பது, சிலர் தங்களுக்கு விளம்பரங்களை தேடிக்கொள்ள செய்யும் மேஜிக் என இயக்குநர் எஸ்.ஏ.சந்திரசேகர் கூறினார்.

சுமார் இரண்டு வருட இடைவெளிக்கு பின் 'டூரிங் டாக்கீஸ்' என்ற திரைப்படத்தை இயக்கி, தயாரித்து வருகிறார் எஸ்.ஏ.சந்திரசேகர். அந்த படத்தின் படப்பிடிப்பு தேனியில் நடைபெற்று வருகிறது. படப்பிடிப்பின் இடைவேளையில் பத்திரிகையாளரைச் சந்தித்து பேசினார் எஸ்.ஏ.சந்திரசேகர்.

அவர் கூறுகையில், ''ரெண்டு வருடமாக வீட்டுல சும்மாவே இருந்தேன். அதுக்குமேல இருக்க முடியல. என் பையன் விஜய், என்னிடம், 'நீங்க ஓய்வெடுங்க, இப்ப வேலை செய்ய வேண்டாம்' என்று சொன்னான். இது என்னுடைய கடைசிப்படமுன்னு சொல்லிப்பார்த்தேன். அமைதியா இருந்தான். கொஞ்ச நாள்ல கதையை ரெடி பண்ணிட்டுபோய் மறுபடியும் அவன்கிட்ட நின்னேன். கதையை கேட்டுட்டு யோசிச்சு சொல்றேன்னு ரெண்டு மாசம் வரை இழுத்தடிச்சான். கடைசியில ஒரு வழியா ஒத்துக்கிட்டான். படத்தை ஆரம்பிச்சுட்டேன்.

தற்போதைய சூழலில் சிறுவயது குழந்தைகள், குறிப்பாக பெண் குழந்தைகள் மீதான பாலியல் வன்கொடுமை, எழுபது வயது கிழவனுக்கும் வரும் காதல். வெளிநாட்டிற்கு படிக்க சென்று, தமிழக, இந்திய கலாச்சாரத்தை மனதளவில் மறந்து, மீண்டும் இங்கே வரும் பெண் திடீரென நடக்கும் திருமணத்தால் சந்திக்க வேண்டிய பிரச்னைகள் என மூன்று கதைகளின் தொகுப்புதான் இந்த 'டூரிங் டாக்கீஸ்'. இவ்வளவு நாள் வரை சிறு, சிறு வேடங்களில் மட்டுமே நடித்த நான், இந்த படத்தில் எழுபது வயது காதல் கொள்ளும் முதியவராகவும் வருகிறேன்'' என்ற அவரிடம் சில கேள்விகளை முன்வைத்தோம்.


பெரும்பாலும் புதுமுகங்களை வைத்து படம் பண்ணுகிறீர்களே?

என்னுடைய படங்களில் கதைதான் ஹீரோ. நம்பர் ஒன் குதிரையின் மீது பந்தயம் கட்டி ஜெயிப்பது சுலபம். புதிய, புதிய குதிரைகளை ஓட வைக்கும்போதுதான் ஒர் சுவாரஸ்யம், பயம், டென்சன் இருக்கும். கூடவே ஜெயிக்கனும்ங்கிற வெறியும் இருக்கும்.

நீங்கள் சினிமாவில் போதுமான உயரத்தை எட்டிப்பிடித்து விட்டீர்கள் என நினைக்கிறீர்களா?

இல்லை. இன்னும் நிறைய புதுப்புது விசயங்களை, கருத்துக்களை கொண்டு வரணுமுன்னு ஆசை இருக்கு.

உங்கள் மகன் விஜய்? (கேள்வியை கேட்கும் முன்னரே...)

விஜய் இன்னும் அச்சீவ் பண்ணனும்.

விஜய்யின் மக்கள் இயக்கம் எப்படி செயல்படுகிறது?

சமூக நோக்கத்தோடு நல்ல முறையில் போய்க்கொண்டிருக்கிறது. ஒவ்வொரு கிராமத்திலும் மக்கள் இயக்க தொண்டர்கள் விஜய்க்காக உழைக்கிறார்கள். நல்ல பேரை எடுத்துக்கொடுக்கின்றனர்.

உங்கள் பேரன் சஞ்சீவ் பற்றி?

நன்றாக படிக்கிறான். அவனுக்கு கிரிக்கெட்டுல ஆர்வம் அதிகம். காலை, மாலை ப்ராக்டிஸ் செய்கிறான். விரைவில் அவனை விளையாட்டு வீரனாக பார்க்கலாம்.

'கத்தி' பட பிரச்னை?

எனக்கு அது பிரச்னையாகவே தெரியவில்லை. சிலர் விளம்பரங்களை தேடிக்கொள்ள செய்கின்ற மேஜிக் என்பது என்னோட கருத்து.

தொடர்ச்சியாக அவருடைய படங்கள் எதிர்ப்புகளை சந்தித்து வருகிறதே?

வளர, வளர எதிர்ப்புகள் வரத்தான் செய்யும். இவற்றை பார்க்கும்போது விஜய் வேகமாக வளர்கிறான் என நினைக்கிறேன்.

விஜயின் மக்கள் இயக்கம் அரசியல் இயக்கமாக மாறுமா?

அதுபற்றி விஜய்யிடம்தான் கேட்க வேண்டும்.-