காட்கோபரில் துணிகரம் தனியார் வங்கியில் புகுந்து ரூ.54 லட்சம் கொள்ளை மர்ம ஆசாமிக்கு போலீஸ் வலைவீச்சு

காட்கோபரில் துணிகரம் தனியார் வங்கியில் புகுந்து ரூ.54 லட்சம் கொள்ளை மர்ம ஆசாமிக்கு போலீஸ் வலைவீச்சு


மும்பை,

காட்கோபரில், தனியார் வங்கியில் புகுந்து கள்ளச்சாவி மூலம் பெட்டகத்தை திறந்து ரூ.54 லட்சத்தை கொள்ளையடித்து சென்ற மர்ம ஆசாமியை போலீசார் வலைவீசி தேடி வருகிறார்கள்.

பணம் கொள்ளை

மும்பை காட்கோபர் மேற்கு பகுதியில் ஒரு தனியார் வங்கி உள்ளது. சம்பவத்தன்று வங்கி ஊழியர் ஒருவர் பரிவர்த்தனை தேவைக்காக பணம் எடுப்பதற்காக வங்கி ரகசிய அறையில் உள்ள பணப்பெட்டகத்தை திறந்தார். அப்போது, அதில் பணம் ஏதும் இல்லை. அதில் இருந்த ரூ.54 லட்சம் காணாமல் போயிருந்தது.

இதனால் அதிர்ச்சி அடைந்த அவர், இதுபற்றி வங்கி மேலாளர் மற்றும் காசாளரிடம் தெரிவித்தார். இதனால் பதறிப்போன அவர்கள் சம்பவம் குறித்து காட்கோபர் போலீஸ் நிலையத்தில் புகார் கொடுத்தனர்.

வங்கி ஊழியர்களுக்கு தொடர்பா?

போலீசார் சம்பவ இடத்திற்கு சென்று வங்கியில் உள்ள கண்காணிப்பு கேமராவை ஆய்வு செய்தனர். அப்போது, இரவு நேரத்தில் முகத்தை துணியால் மூடிய மர்ம ஆசாமி ஒருவர் வங்கிக்குள் புகுந்து, கள்ளச்சாவி மூலம் ரகசிய அறையை திறந்து பெட்டகத்தில் இருந்த ரூ.54 லட்சத்தை கொள்ளை அடித்துவிட்டு தப்பிச்சென்ற காட்சி அதில் பதிவாகி இருந்தது. அந்த ஆசாமி ரகசிய அறையில் தான் பயன்படுத்திய கள்ளச்சாவிகளை விட்டு சென்றிருந்தான். அங்கு கிடந்த 11 கள்ளச்சாவிகளை போலீசார் பறிமுதல் செய்தனர்.

இந்த கொள்ளை சம்பவத்தில் வங்கி ஊழியர்கள் யாருக்காவது தொடர்பு இருக்கலாம் என போலீசார் சந்தேகிக்கின்றனர். இதுதொடர்பாக வங்கி ஊழியர்களிடம் போலீசார் தனித்தனியாக விசாரணை மேற்கொண்டுள்ளனர். மேலும் சம்பவம் குறித்து வழக்குப்பதிவு செய்து கொள்ளையனை வலைவீசி தேடி வருகிறார்கள்.

நன்றி தினத்தந்தி ..

வங்கிகளில் எவ்வளவு நவீன சாதனங்கள் இருந்தும் இப்படி நடக்கத்தான் செய்கிறது .