அஞ்சான் படத்திற்கு சான்றிதழ் பெற லஞ்சம்

by **சிவா** Tue Aug 26, 2014 10:31 pm

சூர்யா, சமந்தா நடிப்பில் சுதந்திர தினத்தை முன்னிட்டு வெளிவந்த படம் அஞ்சான்.

இப்படத்திற்கு கொடுக்கப்பட்ட ஓவர் பில்டப்புகளும், விளம்பரங்களுமே படத்திற்கு எதிராக அமைந்துவிட்டது. தற்போதைய சூழ்நிலையில் ஒரு படத்திற்கு யு சான்றிதல் கிடைப்பது அரிது. ஆனால் அஞ்சான் படத்தில் கொடூர கொலைகளும், ஓவர் கவர்ச்சியும் இடம்பெற்றிருந்தும் படத்திற்கு யு சான்றிதழ் கொடுத்தது பற்றி நிறைய விமர்சனங்கள் வந்தது. இந்த கேள்விக்கான பதிலை இப்போது சி.பி.ஐ. கண்டுபிடித்து இருக்கிறது. அஞ்சான்' படத்திற்கு தணிக்கை சான்றிதழ் வழங்க கணிசமாக லஞ்சம் தரப்பட்டிருப்பது தெரியவந்துள்ளது.

இந்திய சினிமா படங்களுக்கு சான்றிதழ் வழங்க லஞ்சம் வாங்கியதாக மத்திய சினிமா தணிக்கை வாரிய தலைவர் ராகேஷ்குமார் அண்மையில் சி.பி.ஐ. அதிகாரிகளால் கைது செய்யப்பட்டார். அவரை சி.பி.ஐ. சிறப்பு நீதிமன்றத்தில் ஆஜர்படுத்தி விசாரித்து வந்தனர். அப்போது நீதிபதிகள் முன்னிலையில் சி.பி.ஐ. அதிகாரிகள் கூறுகையில், தமிழில் தற்போது வெளியாகி ஓடிக்கொண்டிருக்கும் ‘அஞ்சான்' படம் தணிக்கைக்காக கடந்த ஜூலை மாதம் 24ஆம் தேதி ராகேஷ்குமாரிடம் அனுப்பி வைக்கப்பட்டது. அவர் 6 நாட்கள் இருப்பில் வைத்து அதன்பின்னர்தான் அந்த படத்தை பார்த்துள்ளார்.

இவ்வாறு நடைமுறைகளை முடித்த பின்னர் கடந்த 5ஆம் தேதி அஞ்சான் படத்திற்கு சான்றிதழ் வழங்கி இருக்கிறார். ‘அஞ்சான்' படத்திற்கு சான்றிதழ் வழங்க ராகேஷ் குமார் ஒரு மடிக்கணினி மற்றும் ஐ-பேட் ஒன்றினை பரிசாக பெற்றுள்ளார். இது தவிர கடந்த 9ஆம் தேதி ‘சிக்கந்தர்' என்ற தெலுங்கு படத்திற்கு சான்றிதழ் வழங்க ரூ.50 லட்சம் லஞ்சம் பெற்று இருக்கிறார்" என்று தெரிவித்தனர். லஞ்சம் வாங்குவதைப் போல லஞ்சம் கொடுப்பதும் குற்றம் என்பதால், லஞ்சம் கொடுத்த குற்றச்சாட்டின் பேரில், அஞ்சான் பட தயாரிப்பு நிர்வாகிகளும் விரைவில் கைது செய்யப்படுவார்கள் எனத் தெரிகிறது.