இடைத்தேர்தல்: கர்நாடகாவிலும் பா.ஜ.வுக்கு பின்னடைவு

**சிவா** · **சிவா** Mon 25 Aug 2014 - 18:28

பெங்களூரு: பீகாரை தொடர்ந்து கர்நாடக மாநிலத்தில் நடைபெற்ற இடைத் தேர்தலிலும்,பா.ஜனதாவுக்கு பின்னடைவு ஏற்பட்டுள்ளது.

தேர்தல் நடைபெற்ற 3 தொகுதிகளில் 2 தொகுதிகளில் காங்கிரஸ் கட்சி வெற்றி பெற்றுள்ளது. பா.ஜனதா ஒரு தொகுதியில் வெற்றி பெற்றுள்ளது.

அதிலும் பா.ஜனதாவுக்கு வலுவான தொகுதியாக கருதப்பட்ட கனிம வளங்கள் நிரம்பிய பெல்லாரி தொகுதியை காங்கிரஸ் கைப்பற்றி உள்ளது.

அதேப்போன்று இடைத்தேர்தல் நடைபெற்ற சிக்கொடி என்ற தொகுதியிலும் காங்கிரஸ் வெற்றி பெற்று, அத்தொகுதியை தக்கவைத்துக்கொண்டுள்ள நிலையில், பெல்காமில் உள்ள ஷிகரிபூர் தொகுதியில் மட்டும், மிகக்குறைந்த வாக்கு வித்தியாசத்தில் பா..ஜனதா வெற்றி பெற்றுள்ளது. இத்தொகுதியில் முன்னாள் முதல்வர் பி.எஸ். எடியூரப்பா மகன் ராகவேந்திரா போட்டியிட்ட நிலையில், மிகவும் கவுரவ பிரச்னையாக கருதப்பட்ட இத்தொகுதியை ஒரு வழியாக எடியூரப்பா குடும்பம் தக்க வைத்துக்கொண்டுள்ளது.

கடந்த மே மாதம் நடைபெற்ற நாடாளுமன்ற தேர்தலில் எடியூரப்பா பா.ஜனதா சார்பில் போட்டியிட்டு வெற்றி பெற்றதால், அவர் ஷிகரிபூர் தொகுதி எம்.எல்.ஏ. பதவியை ராஜினாமா செய்ததால், அங்கு இடைத்தேர்தல் நடத்த வேண்டிய நிலை உருவானது. மீதமுள்ள 2 தொகுதிகளிலும் இதே காரணத்திற்காகவே இடைத்தேர்தல் நடைபெற்றது.

இதனிடையே தேர்தல் முடிவுகள் குறித்து கருத்து தெரிவித்த எடியூரப்பா, போட்டியிட்ட 3 தொகுதிகளில் இரண்டில் பா.ஜனதா தோல்வியடைந்துள்ளதால், தேர்தல் முடிவு தமக்கு மகிழ்ச்சியை அளிக்கவில்லை என்றும், வெற்றி பெற்ற ஷிகரிபூர் தொகுதியில் கூட மிகக்குறைந்த வாக்கு வித்தியாசத்திலேயே வெற்றி பெற்றிருப்பது தமக்கு திருப்தி அளிக்கவில்லை என்றும் கூறினார்.

பீகார் இடைத்தேர்தலில் மொத்தமுள்ள 10 தொகுதிகளில் ஏழு தொகுதிகளில் லாலு- நிதிஷ்- காங்கிரஸ் கூட்டணி முன்னிலையில் உள்ளது குறிப்பிடத்தக்கது.

**சிவா** · **சிவா** Mon 25 Aug 2014 - 18:43

எம்.பி தேர்தலில் செய்த தவறை மக்கள் திருத்திக் கொண்டனர்: இடைத்தேர்தல் வெற்றி குறித்து லாலு கருத்து

நாடாளுமன்றத் தேர்தலில் செய்த தவறை மக்கள் திருத்திக் கொண்டதாக ராஷ்ட்ரீய ஜனதாதளம் கட்சித் தலைவர் லாலு பிரசாத் யாதவ், இடைத்தேர்தல் வெற்றி குறித்து கருத்து தெரிவித்துள்ளார்.

பீகார் சட்டசபையில் காலியாக உள்ள 10 இடங்களுக்கு நடந்த இடைத்தேர்தலில் ஆளும் ஐக்கிய ஜனதாதளம், லாலு பிரசாரத்தின் ராஷ்ட்ரீய ஜனதாதளம், காங்கிரஸ் கூட்டணி 6 தொகுதிகளில் வெற்றி பெற்றுள்ளது. பா.ஜனதா கட்சி 4 தொகுதிகளில் மட்டுமே வெற்றி பெற்றுள்ளது.

இடைத்தேர்தல் வெற்றி வெற்றி குறித்து டுவிட்டரில் கருத்து பதிவு செய்துள்ள லாலு பிரசாத், "இந்த மகா கூட்டணியை வெற்றி பெற செய்த பீகார் மக்களுக்கு நன்றியை தெரிவித்துக் கொள்கிறேன். நாடாளுமன்ற தேர்தலில் செய்த தவறை நாட்டு மக்கள் திருத்திக் கொண்டனர்" என்று குறிப்பிட்டுள்ளார்.

ஐக்கிய ஜனதா தளம் கட்சியின் தலைவரும், முன்னாள் பீகார் முதல்வருமான நிதிஷ் குமார் கூறுகையில், "நாங்கள் சட்டமன்ற இடைத்தேர்தல் வெற்றியில் மிகவும் திருப்தி அடைந்துள்ளோம்" என்றார்.

இதற்கிடையே, இன்று காலை உடல்நலம் பாதிப்பு காரணமாக லாலு, மும்பை பாந்த்ராவில் உள்ள இதய நோய் மருத்துவமனையில் அனுமதிக்கப்பட்டுள்ளார்.