மூடு விழாவை நோக்கி 100 நாள் வேலைவாய்ப்பு திட்டம்

by **சிவா** Mon Aug 25, 2014 3:58 pm

கோவை மாவட்டத்தில், 100 நாள் வேலை திட்ட தொழிலாளர்கள், 12 ஆயிரம் பேருக்கு ஆறு வாரங்களாக சம்பளம் வழங்கவில்லை. நிதி நெருக்கடியால், இத்திட்டத்தை முடக்க தமிழக அரசு முடிவு செய்துள்ளதாக புகார் எழுந்துள்ளது.

கிராம ஊராட்சிகளில், தொழிலாளர்களுக்கு ஆண்டுக்கு, 100 நாள் வேலை தரும் மகாத்மா காந்தி தேசிய ஊரக வேலை உறுதி திட்டம் (என்.ஆர்.ஜி.எஸ்.,) 2006ம் ஆண்டு சில மாவட்டங்களில் துவங்கியது. படிப்படியாக நாட்டிலுள்ள, 650 மாவட்டங்களிலும் 2008 முதல் செயல்படுகிறது. இதில் இயந்திரங்களை பயன்படுத்தாமல் முழுக்க முழுக்க தொழிலாளர்கள் மூலம் குளம், குட்டை துார் வாருதல், சாலை பராமரிப்பு செய்தல் உள்ளிட்ட பணி செய்யப்படுகிறது. தினசரி சம்பளமாக, 168 ரூபாய், வழங்கப்படுகிறது. இத்திட்டம், கோவை மாவட்டத்தில் உள்ள 12 ஒன்றியங்களில் 228 ஊராட்சிகளில் செயல்படுகிறது.அன்னுார் ஒன்றியத்தில், 21 ஊராட்சிகளில் தினமும் 2,400 பேர் பணியாற்றி வந்தனர். ஒவ்வொரு வாரமும் வியாழனன்று, முந்தைய வார சம்பளம் வழங்கப்படும். கடந்த ஆறு வாரங்களாக சம்பளம் வழங்கப்படவில்லை.

இது குறித்து, 100 நாள் வேலை உறுதி திட்ட தொழிலாளர்கள் கூறியதாவது:வழக்கமாக, ஒரு நாள் சம்பளம் 168 ரூபாய் என கணக்கிட்டு, ஒவ்வொரு வாரமும் வியாழனன்று வங்கிக் கணக்கு மூலம் வழங்கி வந்தனர்.ஏழு வாரத்திற்கு முன், நாங்கள் பணி குறைவாக செய்திருப்பதாக கூறி, சம்பளம் 168க்கு பதில், 120 ரூபாய் தான் வழங்குவோம் என்று கூறினார்கள். அதற்கும் சம்மதித்து, தொடர்ந்து வேலை பார்த்தோம். ஆனால், கடந்த ஆறு வாரங்களாக வார சம்பளம் வழங்கவில்லை.ஒவ்வொரு வாரமும் இந்த சம்பளத்தை வாங்கித்தான் வாழ்க்கை நடத்துகிறோம். சம்பளம் கிடைக்காமல், வீட்டு செலவுக்கு பணமில்லாமல், தவிக்கிறோம். இவ்வாறு தொழிலாளர்கள் தெரிவித்தனர்.

சம்பளம் கிடைக்காததால், வேலைக்கு வருவோர் எண்ணிக்கை, அன்னுார் ஒன்றியத்தில் 2,400லிருந்து 1,000 ஆக குறைந்து விட்டது. 21 ஊராட்சிகளில், எட்டு ஊராட்சிகளில் இத்திட்டம் நிறுத்தப்பட்டு விட்டது. இத்திட்டத்தில் சம்பளம் கிடைக்காமல், வேறு விவசாய வேலையும் கிடைக்காமல் கோவை மாவட்டத்தில், 100க்கும் மேற்பட்ட ஊராட்சிகளில் 12 ஆயிரம் தொழிலாளர்கள் தவிக்கின்றனர்.அரசு இந்த திட்டம் தொடருமா, இல்லையா என்பதை தெளிவுபடுத்தினால், வேறு வேலைக்கு செல்ல வசதியாக இருக்கும் என தொழிலாளர்கள் எதிர்பார்க்கின்றனர்.

இத்திட்டத்தில் தொழிலாளர்கள் அரசு நிர்ணயித்த அளவுக்கு வேலை செய்வதில்லை. தனியார் தோட்டங்களில் வேலைக்கு ஆள் பற்றாக்குறை உள்ளது. ஸ்பின்னிங் மில், விசைத்தறி உள்ளிட்ட நிறுவனங்களுக்கு ஆட்கள் கிடைக்காமல், வெளிமாநிலங்களிலிருந்து தொழிலாளர்கள் வரவழைக்கப்படுகின்றனர். இக்காரணங்களால், அரசு இத்திட்டத்தில் வேலை செய்யும் தொழிலாளர்களின் எண்ணிக்கையை படிப்படியாக குறைந்து திட்டத்தை முடக்க முடிவு செய்துள்ளதாக, ஊராட்சி கவுன்சிலர்கள் தெரிவித்தனர்.

[note]இத்திட்டத்தில் வேலை செய்பவர்கள் அனைவரும் பெண்கள், இவர்கள் வாங்கும் சம்பளம் டாஸ்மாக்கிற்கு வருவதில்லை, இதனால் தான் இந்த வேலை வாய்ப்புத் திட்டத்தை நிறுத்த எண்ணியுள்ளது என நினைக்கிறேன்! [/note]

by rksivam Mon Aug 25, 2014 11:06 pm

மூடப்படவேண்டிய திட்டம். TASMAC குக்கு அடுத்தபடியாக மக்களை சோம்பேறிகளாக ஆக்கும் திட்டம். இது வரையில் ஒரு வேலையும் உருப்படியாக நடக்க வில்லை. அரசாங்கம் மக்களுக்கு கொடுத்த லஞ்சம் 100 நாள் வேலை திட்டம்.

சிவம்

by **Muthumohamed** Mon Aug 25, 2014 11:12 pm

rksivam wrote:மூடப்படவேண்டிய திட்டம். TASMAC குக்கு அடுத்தபடியாக மக்களை சோம்பேறிகளாக ஆக்கும் திட்டம். இது வரையில் ஒரு வேலையும் உருப்படியாக நடக்க வில்லை. அரசாங்கம் மக்களுக்கு கொடுத்த லஞ்சம் 100 நாள் வேலை திட்டம்.

சிவம்

மேற்கோள் செய்த பதிவு: 1082338

எனது கருத்தும் இது தான்