திபெத்தியர்களின் வலிமைக்கு 8000 ஆண்டுகளுக்கு முன் ஏற்பட்ட மரபணு மாற்றமே காரணம்

by **சிவா** Tue Aug 19, 2014 10:03 pm

வாஷிங்டன் : திபெத் நாடானது கடல் மட்டத்திலிருந்து சுமார் 16,000 அடி உயரத்தில் அமைந்துள்ளது. உலகின் உயரமான இடத்தில் இது அமைந்துள்ளதால், அதற்கு ‘உலகின் கூரை‘ என்ற பெயரும் உண்டு. வடதுருவம், தென்துருவம் தவிர்த்து உலகின் மூன்றாவது துருவம் என்றும் திபெத் அழைக்கப்படுகிறது. கடல் மட்டத்திலிருந்து அதிக உயரத்தில் இருப்பதால், திபெத்தில் கடுமையான குளிர் நிலவும். அதேபோன்று, சுவாசிப்பதற்கு போதுமான அளவில் ஆக்ஸிஜனும் கிடைக்காது. இதனால், வெளிநாட்டவர்¢ திபெத்துக்கு செல்லும்பட்சத்தில் ரத்த அழுத்தம், நெஞ்சுவலி போன்ற சிரமங்களை அனுபவிக்க நேரிடும்.இருப்பினும், கடுங்குளிர், ஆக்ஸிஜன் தட்டுப்பாடு போன்றவை திபெத்தியர்களை எந்த விதத்திலும் பாதிப்பதில்லை. இதற்கு, அவர்களின் உடலில், 8,000 ஆண்டுகளுக்கு முன் ஏற்பட்ட மரபணுக்களின் (ஜீன்) மாற்றமே காரணம் என, அமெரிக்க ஆய்வாளர்கள் கண்டுபிடித்துள்ளனர்.

8,000 ஆண்டுகளுக்கு முன்னர், இஜிஎல்என்1 என்ற ஜீன், ஒற்றை டிஎன்ஏவை அடிப்படையாகக் கொண்ட இரட்டை ஜீன்களாக மாற்றம் அடைந்தது. 88 சதவித திபெத்தியர்களிடம் இந்த வகை ஜீன்கள் உள்ளன. இவற்றின் காரணமாக, குறைந்த அளவு ஆக்ஸிஜனை திபெத்தியர்கள் சுவாசித்தாலும் கூட, அவர்களுக்கு எவ்வித பாதிப்பும் ஏற்படுவதில்லை என கண்டறியப்பட்டுள்ளது.ஆனால், ஆசியாவின் கடல் மட்டத்தில் அமைந்த, நாடுகளில் உள்ளவர்களிடம், இந்த வகை ஜீன்கள் இல்லை. இதனால், குறைந்த அளவு ஆக்ஸிஜனை அவர்கள் சுவாசித்தால், ரத்த அழுத்தம் ஏற்படும். நீண்ட காலத்துக்கு குறைந்த ஆக்ஸிஜனை சுவாசித்தால், இதயம் செயலிழந்து போகும்.

திபெத் சுற்றுலா செல்வோருக்கு தெரிவிக்கப்படும் அறிவுரைகள்

1. இருமல், சளியால் பாதிக்கப்பட்டவர்கள் திபெத்துக்குள் நுழைய கூடாது. மீறி நுழைந்தால், சீக்கிரத்தில் குணமடையாது; சுவாசிப்பதில் பெரும் சிரமத்தை ஏற்படுத்தும்.

2. மருந்துகளை எப்போதும் கைவசம் வைத்திருக்க வேண்டும்.

3. விமானம் மூலம் நேரடியாக லாசாவுக்கு (3700 மீட்டர் உயரம்) செல்லாமல், கிங்காய்க்கு (3200 மீட்டர் உயரம்) சென்று, அங்கிருந்து ரயில் மூலம் லாசாவுக்கு செல்ல வேண்டும்.

4. திபெத்துக்கு வந்ததும் நன்றாக ஓய்வெடுத்து, தண்ணீரும் நன்றாக குடிக்க வேண்டும். முதல்நாளே ஷவரில் குளிக்க கூடாது. முதல் மூன்று நாட்களுக்கு தலைவலி, வாந்தி, நெஞ்சு பதைபதைப்பு போன்றவை சாதாரணமாகவே ஏற்படும்.

5. புகைபிடித்தல், குடிப்பழக்கம் அறவே கூடாது. மீறினால் விபரீதம் ஏற்பட்டு விடும்.

6. ஆக்ஸிஜன் பற்றாக்குறை காரணமாக மூச்சுத் திணறல் ஏற்பட்டால், ஓட்டல்களில் வழங்கப்படும் ஆக்ஸிஜன் பெட்டிகளை பயன்படுத்தி சுவாசித்து கொள்ளலாம்.

7.சுவாசிப்பதில் சிரமம் இல்லாவிட்டால், ஆக்ஸிஜன் பெட்டிகளை பயன்படுத்தக் கூடாது. ஏனெனில் அதிக உயரங்களுக்கு செல்லும்போது அவர்கள் சிரமப்பட நேரிடும்.

[thanks]தினகரன்[/thanks]