ஞானமா நன்னடத்தையா?

சோமபுரம் என்றொரு நாட்டை சோமசுந்தர் என்ற அரசர் ஒருவர் ஆட்சிபுரிந்து வந்தார். அவருக்குத் தன் மந்திரிகளை விடவும், ராஜகுருவின் மீது அளவு கடந்த மதிப்பும், மரியாதையும் இருந்தது. ராஜகுரு பலதுறைகளிலும் மிகுந்த ஞானம் பெற்று விளங்கினார். அதனால், "அதிஞான மேதை' என்ற பட்டத்தை அளித்து ராஜகுருவைக் கவுரவித்தார் மன்னர்.

ராஜகுரு, அரசவைக்கு வரும் போதெல்லாம், மன்னர் சோமசுந்தர் எழுந்து சென்று, அவரை வரவேற்று, உரிய ஆசனத்தில் அமர வைப்பது வழக்கம்.

மன்னர் தனக்கு அளித்துவரும் அளவு கடந்த மரியாதையைக் கண்டு ராஜகுரு மனம் மகிழ்ந்தார். ஆனால், நீண்டநாளாக, ராஜகுரு ஒரு விஷயத்தைத் தெரிந்துகொள்ள விரும்பினார்?

அப்படிப்பட்ட விஷயம் என்ன?

"தனக்கு எதனால் மரியாதை கிடைக்கிறது?' என்பதை அறிந்துகொள்ள வேண்டும் என்ற விஷயம் தான் அது!

இந்த விஷயத்தைத் தெரிந்துகொள்ள ஒரு சோதனையையும் மேற்கொண்டார் ராஜகுரு.

ஒருநாள்!

ராஜகுரு அரசவையிலிருந்து தன்னுடைய வீட்டுக்குத் திரும்பிக்கொண்டிருந்தார்!

அப்போது...!

பணப்பெட்டியையும், நிறைய ஆபரணங்களையும் எடுத்துக் கொண்டு எதிரில் வந்தார் கருவூல அதிகாரி.

ராஜகுரு கருவூல அதிகாரியைத் தடுத்து நிறுத்தி, பணப்பெட்டியிலிருந்து இரண்டு முத்துக்களை எடுத்துத் தன்னுடைய சட்டைப் பையில் போட்டுக் கொண்டு சென்றுவிட்டார்.

அரசரின் நன் மதிப்பைப் பெற்ற ராஜகுரு, முத்துக்களை எடுத்துப் பையில் போட்டுக்கொண்டு செல்வதைப் பார்த்து, என்ன செய்வதென்று தெரியாமல் சிலை போல் நின்றார் கருவூல அதிகாரி.

இதே காரியம், அடுத்தடுத்த நாட்களிலும் நடந்தது. இதற்கு மேலும் பொறுக்க முடியாது என்று எண்ணினார் கருவூல அதிகாரி. அரசனிடம் சென்று விவரத்தைக் கூறினார். அரசர் நடந்த விவரம் பற்றித் தெரிந்துக்கொண்டார்.

அடுத்த நாள்...!

வழக்கம் போல் ராஜகுரு அரண்மனைக்கு வந்தார். அவரைப் பார்த்து, எழுந்து சென்று வரவேற்பதற்குப் பதிலாக, அரசர் சிம்மாசனத்தில் கம்பீரமாக உட்கார்ந்து, ராஜகுருவின் முகத்தை ஏறிட்டுப் பார்த்தார்.

அரசரின் பார்வை ஒன்றே எல்லா விவரங்களையும் உணர்த்திவிட்டது.

அரசர் ராஜகுருவைப் பார்த்து, ""நீங்கள் கருவூல அதிகாரியிடமிருந்து முத்துக்களை எடுத்தீர்களா?'' என்று கேட்டார்.

""ஆம்! அரசே முத்துக்களை நான் தான் எடுத்தேன்,'' என்றார் ராஜகுரு.

""ஏன் எடுத்தீர்கள்?'' மீண்டும் கேட்டார் அரசர்.

""அரசே! நான் ஒரு சோதனை செய்து பார்க்க விரும்பினேன்,'' என்று பதிலளித்தார் ராஜகுரு.

""என்ன சோதனை?'' என்று கேட்டார் அவர்.

""அரசே ஞானம் பெரிதா? நடத்தை பெரிதா? என்ற சோதனை! அதாவது, எனக்குக் கிடைக்கும் புகழுக்கும், கவுரவத்திற்கும் காரணம் ஞானமா அல்லது நடத்தையா?'' என்று அறிந்துகொள்ள விரும்பினேன்.

""ஆனால், இன்று மிகப்பெரிய உண்மையைத் தெரிந்து கொண்டேன். என்னுடைய ஞானம் என்னிடமே உள்ளது. அதில் சிறிதும் வித்தியாசம் இல்லை. என்னுடைய நடத்தையில் தான் மாற்றம் வந்தது. ஆம்! நான் தங்களின் அனுமதி இல்லாமல் முத்துக்களை எடுத்தேன். அதனால், தங்களுக்குக் கோபம் வந்ததை உணர்ந்தேன். எப்போதும் எழுந்து நின்று என்னை வர வேற்கும் நீங்கள், விசாரணை நடத்தும் நிலை உருவானது. ஆகவே, ஒரு நல்ல நடத்தைதான் ஒரு மனிதனுக்குக் கிடைக்கும் மதிப்பு மரியாதைக்குத் காரணம் என்பதை உணர்ந்து கொண்டேன்,'' என்று கூறினார் ராஜகுரு.

ராஜகுருவின் மதிப்பு அன்று முதல் முன்பைக் காட்டிலும் அதிக அளவு கூடியது.

***
சிறுவர் மலர்