அதிகாரிகளின் சான்றொப்பம் தேவையில்லை

பிரதமர் நரேந்திரமோடி பதவி ஏற்றதுமே, அரசின் திட்டங்களை மக்களுக்கு எடுத்துச்செல்லும் அதிகாரிகள் செய்யவேண்டியதும், செய்யக்கூடாததும் என்பதுபற்றி சொல்லி வருகிறார். அதிகாரிகளுக்கு முழுச்சுதந்திரம் கொடுத்துள்ள நரேந்திரமோடி, தொடக்கத்தில் இருந்தே பழையகால சட்டங்கள், விதிகள் எவை–எவை? எந்தெந்த சட்டங்கள், விதிகளையெல்லாம் மாற்றி அமைக்கலாம்? என்றும், எந்தெந்த திட்டங்கள் தேவையில்லை? என்றும் அதிகாரிகளிடம் கருத்து கேட்டு இருந்தார். இதுமட்டுமல்லாமல், அதிகாரிகள் எப்போதும் தம்மை எளிதாக தொடர்புகொள்ளலாம் என்றும் தெரிவித்திருந்தார். தன்னை, அதிகாரிகள் எளிதாக நேரிலும், இணையதளம் மூலமும் தொடர்புகொள்ள முடிவதைப்போல, அதிகாரிகளும், பொதுமக்களோடு எளிதான தொடர்பில் இருக்கவேண்டும் என்றும் கூறிவருகிறார். அதுபோல, அரசு அதிகாரிகள் மக்களுக்கு அனைத்து சேவைகளும் எளிதாக கிடைப்பதில் முழுகவனமும் செலுத்தவேண்டும் என்றும் சொல்லி வருகிறார். அதில், ஒரு நல்ல முயற்சியாக காலம்காலமாக அனைத்து விண்ணப்பங்கள், கோரிக்கைகளோடு இணைக்கப்பட்டு இருக்கும் சான்றிதழ்களுக்கு ‘அட்டஸ்டேஷன்’ என்று கூறப்படும் சான்றொப்பம் வாங்கும் முறைக்கு ஒரு மூடு விழா நடத்திவிட்டார்.

பழைய காலங்களில் மட்டுமல்லாமல், இப்போதும் ஏதாவது வேலைக்கு விண்ணப்பம் செய்தாலும் சரி, உயர்கல்வியில் சேர வேண்டுமானாலும் சரி, அரசின் எந்த திட்டங்களுக்கு விண்ணப்பித்தாலும் சரி, அவரவர்களுடைய கல்விச்சான்றிதழ் மற்றும் தஸ்தாவேஜூகளின் நகல்களை இணைக்க வேண்டியதிருக்கும். அப்போது எல்லாம் ‘ஒரிஜினல்’ சான்றிதழ்களை பார்த்து, அப்படியே தட்டச்சு எந்திரம் என்று கூறப்படும் ‘டைப்ரைட்டரில் டைப்’ அடிப்பார்கள். அந்த நகல்களை தாக்கல் செய்யும்போது ஒரிஜினலில் உள்ள தகவல்கள்தான், ‘டைப்’ அடிக்கப்பட்ட நகல்களிலும் இருக்கிறது என்பதை ‘கெஜட்டட் ஆபிசர்களிடம்’ சான்றொப்பம் வாங்கவேண்டும். ஒவ்வொரு நகல் சான்றிதழ்களிலும், சான்றொப்பம் வழங்கிய அதிகாரியின் கையெழுத்தோடு, அவருடைய பதவியை குறிக்கும் முத்திரை கண்டிப்பாக இருக்கவேண்டும். அந்தநேரங்களில், கிராமப்புறங்களில் உள்ள மாணவர்கள் ‘கெஜட்டட்’ அதிகாரிகளை தேடி நகர்ப்புறங்களுக்கு வரவேண்டிய கஷ்டம் இருந்தது. சில அதிகாரிகள் வேலைப்பளு நிமித்தம், இப்போது சரிபார்த்துக் கொண்டிருக்க முடியாது, பிறகு வா என்று அலைக்கழிப்பார்கள். அதில் சில அதிகாரிகள், ‘அட்டஸ்டேஷனுக்கு’ பணம் வாங்குவதும் உண்டு. சில நேரங்களில், அதிகாரிகளின் கவனக்குறைவாலும், தட்டச்சு செய்யும்போது ஏற்படும் தவறுகள் கண்ணில்படாமல் போவதும் உண்டு. இப்படி சான்றொப்பம் வாங்குவது ஒரு மிகப்பெரிய வேலையாக நிலவி வந்தது.

இப்போது, ‘போட்டோ காப்பி’ (ஜெராக்ஸ்) மூலம் நகல் எடுக்கும் தொழில்நுட்பம் வந்தபிறகு, ஒரிஜினலில் என்ன இருக்கிறதோ, அதையே அப்படியே படம் எடுத்துவிடுகிறது. ஆனாலும், பழைய முறைப்படி, இப்போதும் ஜெராக்ஸ் நகலில்கூட ‘அட்டஸ்டேஷன்’ வாங்கவேண்டிய நிலைமை தொடர்ந்து நீடித்து வருகிறது. தற்போது, மத்திய அரசாங்கம், ‘கெஜட்டட் அதிகாரிகளிடம்’ சான்றொப்பம் வழங்கவேண்டிய தேவையில்லை. அவரவர்களே சுயமாக சான்றொப்பம் வழங்கினால்போதும் என்ற உத்தரவை பிறப்பித்துள்ளது. நிச்சயமாக இது வரவேற்கத்தகுந்த ஒரு முறையாகும். எப்படியும் விண்ணப்பம் அனுப்பி, பிறகு சான்றிதழ் சரிபார்ப்பு என்று வரும்போது, கண்டிப்பாக அதிகாரிகள் ‘ஒரிஜினலோடு’ சரிபார்ப்பார்கள். யாராவது இதில் தவறு ஏதும் செய்திருந்தால், அது கண்டுபிடிக்கப்பட்டுவிடும். அந்த நேரத்தில், அந்த விண்ணப்பத்தை தள்ளுபடி செய்து, அவர்கள்மீது நடவடிக்கை எடுக்க வாய்ப்பு இருக்கிறது.

பிரதமர் பிறப்பித்த இந்த உத்தரவை நடைமுறைப்படுத்தும் விதமாக, சென்னை மண்டல ‘பாஸ்போர்ட்’ அதிகாரி செந்தில் பாண்டியன், பாஸ்போர்ட்டுக்காக விண்ணப்பம் செய்பவர்கள் யாரும் இனி கல்விச்சான்றிதழ், இருப்பிடச்சான்றிதழ், வருமானச்சான்றிதழ் போன்ற சான்றிதழ்களின் ஜெராக்ஸ் நகல்களை இணைக்கும்போது, ‘கெஜட்டட்’ அதிகாரியின் சான்றொப்பம் வாங்கவேண்டிய தேவையில்லை. அவரவரே சுய சான்றொப்பம் செய்தால் போதுமானது என்று அறிவித்து, நடைமுறைக்கும் கொண்டு வந்துவிட்டார். இது ‘பாஸ்போர்ட்டுக்கு’ விண்ணப்பம் செய்பவர்களுக்கு பெரிதும் பலன் அளிக்கிறது. மத்திய அரசாங்கத்தின் இந்த உத்தரவை ‘பாஸ்போர்ட்‘ அலுவலகம்போல, அனைத்து மத்திய–மாநில அரசு அலுவலகங்களும், பள்ளிக்கூடங்கள், கல்லூரிகள், பல்கலைக்கழகங்களிலும் பின்பற்றினால், மாணவர்களுக்கும், பொதுமக்களுக்கும் வேலை எளிது. ‘கெஜட்டட்’ அதிகாரிகளுக்கும் பணிச்சுமை குறைவு.

தினத்தந்தி