நாட்டில் இனிக்குதா சுதந்திரம்?

**விமந்தனி** · **விமந்தனி** Fri Aug 15, 2014 2:47 pm

என் நாட்டிற்கு கிடைத்தது
சுதந்திரம் என்றே
சொன்னவன் எவன்?
விதேசியிடமிருந்து
சுதேசியிடம் மாறியது
எங்கள் வாழ்க்கை!
அவ்வளவே!

மாறிய தினத்தைப் போய்
தவறு-
நாங்கள் ஏமாறிய தினத்தைப் போய்-
சுதந்திர தினமென்று கூறி,
இனிப்பைக் கொடுத்து, எம்
பணப்பையை பறித்த பின்னர்
இனிக்குமா சுதந்திரம்?

இகதேசிகளெல்லாம்
பரதேசிகள் ஆக,
இச்சை கொண்டு அலைகிறார்!
இரவு பகல் பாராது
கடவுச் சீட்டுக்காய் நின்று நின்று
வயதும் வாழ்வும் தொலைக்கிறார்!
வெறுத்துப் போன நாட்டில்-
இனிக்குமா சுதந்திரம்?

பறங்கியனைத் துரத்தியடித்தோம் அன்று!
அவனைத் தேடிப் போய்
பணத்துக்காகவே
கால் பிடிக்கிறோம் இன்று!
வீட்டுக்கொரு மரம்
வளர்த்தோம் அன்று!

வீட்டுக்கொரு ‘நாடு கடந்தோன்’
வளர்க்கிறோம் இன்று!
வாங்கிய சுதந்திரம்
தூங்கிப் போனதே
இனி இனிக்குமா சுதந்திரம்?

மங்கையர் இரவில்
நகைகளுடன்
நடமாட முடிந்தால் சுதந்திரம்
என்றார் தேசப் பிதா அன்று!
ஆடவராவது பகலில்
சுதந்திரமாய் நடமாட
முடிகிறதா இன்று?

தேசத்தைக் கூறு போட்டு விற்று,
விற்றதுவும் போலி என்றானால்
மனிதன் மனிதனை
சாப்பிடுகிறான் என்றானால்,
எப்படி இனிக்கும் சுதந்திரம்?

பழுத்த இலைகளுக்கு
பதவி ஆசை,
பச்சை இலைகளுக்கோ
பணத்தாசை-
பாமர மக்களுக்கோ
பகவான் போன்றதொரு
தலைவர் ஆசை!

ஒரு நாள் தந்திடும் இனிப்பாலே
நாக்கில் இனிக்குது சுதந்திரம்
நாட்டில் இனிக்குதா சுதந்திரம்?

நன்றி: முகநூல்.