வாசகர்களின் துணையோடு சவாலில் ஜெயிப்பேன்! - ஓவியர் வேதா

**ayyasamy ram** · **ayyasamy ram** Thu Aug 14, 2014 6:17 am

-
கல்கி குழுமத்தோடு கைகுலுக்கி பயணிக்கும் வாசகர்களுக்கு வேதா என்கிற வேதகணபதியின் ஓவியங்கள் மிகவும் பரிச்சயம். இப்போது பொன்னியின் செல்வன் வரலாற்று புதினத்துக்கு வண்ணங்களால் புதிய அலங்காரம் செய்யத் தொடங்கிவிட்டார் வேதா. இந்த ஓவிய அனுபவம் எப்படியானது? அவர் கடந்து வந்த பாதை எத்தகையது என்பதையெல்லாம் அவரிடம் கேட்டதிலிருந்து...

முதல் ஓவியம், எங்கே, எப்போது உங்களை வந்தடைந்தது?
-
எட்டாவது படிக்கும்போது சயன்ஸ் நோட்டில் படம் வரையாமல் போயிட்டேன். வாத்தியார் கோபப்பட்டு ஒரு அறை விட்டார். அன்று அவர் அறைந்ததில்தான் என் காது கொஞ்சம் மந்தமானது. அன்றைக்கு நான் நோட்டில் போட்டதுதான் முதல் டிராயிங். அன்று ஆரம்பித்து இதோ இந்த 54 வயது வரை வரைந்த கொண்டே இருக்கிறேன். 1980ல் ஓவியக் கல்லூரியில் சேர்ந்தேன். எனக்கு ஓவியம் மணியம் செல்வன் தான் பக்கபலமாக இருந்தார். என் குருவும் அவர்தான்.

உங்களை வரையத் தூண்டிய ஓவியர் யார்?
-
ஓவியர் மணியம். அவரை நான் பார்த்தது இல்லை. ஆனால் அவருடைய ஓவியங்களை பார்த்துப் பார்த்த வரைய பயிற்சி எடுத்துக் கொண்டவன் நான்.

புராண, வரலாற்று ஓவியங்கள் வரையும் ஸ்பெஷலிஸ்ட்டானது விரும்பியா? எதிர்பாராமல் அமைந்ததா?
கல்கியில் 1981ல் தலைப்புகள் வரைந்து கொடுத்தேன். பின் 83ல் நவராத்திரி சிறப்பிதழுக்கு சாமி படங்கள் வரைந்தேன். பிறகு அதுவே இயல்பாக என்னிடம் அடைக்கலமாகி விட்டது. கல்கி ராஜேந்திரனின் உறுதுணையால் 10 வருடங்களுக்கும் மேலாக கல்கி தீபாவளி மலர் அட்டைப்படமும் தொடர்ந்து வரைந்த வருகிறேன். இது என் அப்பாவின் ஆசியும் கூட.

பெரும் ஜாம்பவான்கள் பொன்னியின் செல்வனுக்கு மூன்று முறை மூன்று விதமான பார்வைகளில் வரைந்து முடித்தபின் நான்காவதாக நீங்கள் வரைகிறீர்கள். இந்த சவாலை எப்படி எதிர்கொள்வீர்கள்?
-
என் ஓவிய முன்னோர்கள் ஆசியுடன் கல்கி வாசகர்களின் வாழ்த்துடன் இந்தச் சவாலை எதிர்கொள்ள முடியும் என்று நம்புகிறேன். யாருக்கு என் பிராப்தமோ அதுதான் நிகழும். மேலும் ஓவியம் நான் விரும்பி ஏற்ற துறை. வேலையில்லாத போது பொன்னியின் செல்வன் வாசிப்பதே வேலை. வேலை கிடைத்தபோது மூன்று முறை பொழுது போக்குக்கு வாசித்தேன். இப்போது மீண்டும் ஓவிய வேலைக்காக ஐந்தாவது முறையாக மீண்டும் படிக்கிறேன். இந்த ஓவியங்களில் நம் இஷ்டப்படி ஆடை அணிகலன்கள் கற்பனை என்ற பெயரில் மாற்ற முடியாது. ஆதாரபூர்வமான சான்றுகளை ஒப்பிட்டுச் சரிபார்த்தே வரைய வேண்டும். அதுதான் இந்த ஓவிய சவால். இந்தப் பணி என் வாழ்வின் சாதனையாக அமையும் என்று இறைவன் பெயரால் நம்புகிறேன். அதை விட என்னை வழிநடத்த தேர்ந்த கல்கி வாசகர்கள் இருக்கும்போது எனக்கென்ன கவலை?
-
- கவிதா (கல்கி)

Waajid M A · Waajid M A Thu Aug 14, 2014 8:56 pm

நான் குறிப்பிட்ட மூன்று பேரின் ( மணியம் மணியம் செல்வம் மற்றும் வினு ) ஓவியங்களையும் பார்த்தவன். கருப்பு வெள்ளை நிறத்தில் இருந்த அந்த ஓவியங்கள் கொடுத்த அளவிலாத மகிழ்ச்சியை எனக்கு திரு வேதா அவர்களின் ஓவியங்கள் கொடுக்கவில்லை. என்னுடைய எண்ண அலைகளில் கம்பீரமாக அமர்ந்து ஆட்சி செய்யும் வந்தியத்தேவன் திரு வேதா அவர்கள் வரைந்திருக்கும் வந்தியத்தேவன் அல்ல. வண்ணத்தில் இருக்கும் படங்களாக இருக்கிறதே அன்றி வேறு இல்லை. இப்போது கல்கியில் வெளிவரும் கதைக்கு கல்கி பத்திரிகை நிறைய பக்கங்களை ஒதுக்கி புகழாரம் சேர்க்கிறது. மணியம் அல்லது வினுவின் ஓவியங்களை வண்ண மயமாக்கி இப்படிப்பட்ட பக்கங்களை ஒதுக்கியிருக்கும் பட்சத்தில் இன்னும் நன்றாக இருந்திருக்கும். திரு வேதா அவர்கள் என்னை மன்னிக்க வேண்டும். அவர் நன்றாகத்தான் வரைகிறார் ஆனால் என்னால் தான் ஜீரணிக்க முடியவில்லை. இதுவே வேறு ஒரு சரித்திரக்கதைக்கு அவர் படம் வரைந்திருந்தால் அது வேறு விஷயம். இன்றைய நிலையில் நாடோடி மன்னன் திரைப்படத்தை நல்ல நடிகர் ஒருவரை வைத்து எடுத்து அவர் நன்றாகவே நடித்திருந்தாலும் எம்ஜியாரை பார்த்த கண்கள் அவரை ஏற்றுக்கொள்ளாது அதைப்போலத்தான் இதுவும். கல்கி ஆசிரியர் குழுவினரும் என்னை மன்னிக்க வேண்டும்.

**ayyasamy ram** · **ayyasamy ram** Thu Aug 14, 2014 11:41 pm

என்னாலும்தான் ஜீரணிக்க முடியவில்லை..!
-
இந்த சரித்திரக் கதையின் தொடர்ச்சியாக
வேறு ஒருவரால் எழுதப்பட்ட சரித்திரக் கதையில்
சோழ இளவல் ஒருவனுக்கு உறுதுணையாக
முதியவராக வந்தியத்தேவன் வருவார்...
-
அவருக்கு வேறொரு மனைவி மூலம் பிறந்த
பெண்ணைப் பார்க்க அவர் சென்று வருவதாக
கதையில் வரும்...
-
வந்தியத்தேவன் மற்றும் குந்தவைதேவியின்
காதலை கல்கியின் வர்ணனையில் படித்துவிட்டு
அப்படிப்பட்ட ஹீரோ வந்தியத்தேவனுக்கு வேறொரு
சம்சாரம் இருப்பதாக சொல்லப்பட்ட புதினத்தை
என்னால் ஜீரணிக்க முடியவில்லை...!!
-

Sponsored content · Sponsored content

வாசகர்களின் துணையோடு சவாலில் ஜெயிப்பேன்! - ஓவியர் வேதா

வாசகர்களின் துணையோடு சவாலில் ஜெயிப்பேன்! - ஓவியர் வேதா

Re: வாசகர்களின் துணையோடு சவாலில் ஜெயிப்பேன்! - ஓவியர் வேதா

Re: வாசகர்களின் துணையோடு சவாலில் ஜெயிப்பேன்! - ஓவியர் வேதா

Re: வாசகர்களின் துணையோடு சவாலில் ஜெயிப்பேன்! - ஓவியர் வேதா

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக