முன்னாள் அமெரிக்க அதிபரின் காதல் கடிதங்கள் பிரசுரம்

அமெரிக்க அதிபரின் சில முகங்கள் பற்றி வெளி உலகம் அறிந்து கொள்வதை அவர்களின் குடும்பத்தினரே விரும்ப மாட்டார்கள்.

உதாரணத்துக்கு சுமார் ஒரு நூறாண்டுக்கு முன்னர் முதலாம் உலகப் போர் காலத்தில் பிரபலமான, குடியரசுக் கட்சியைச் சேர்ந்த அமெரிக்க அதிபர் வாரன் ஹார்டிங்கின் உதாரணத்தை எடுத்துக்கொள்ளுங்களேன்.

அவர் 1921 இல் அமெரிக்க அதிபராகப் பதவியேற்ற காலகட்டத்திலேயே, அவர் அவரது நெருங்கிய நண்பர் ஒருவரின் மனைவியுடன் கள்ள உறவு வைத்திருந்தாராம்.

அத்தோடு விடாமல், அவர், அந்த உறவு வைத்திருந்த பெண்ணுக்குக் காம ரசம் ததும்பும் பல கடிதங்களையும் எழுதித் தள்ளியிருக்கிறார். பிரச்சினை என்னவென்றால், இப்போது அந்தக் கடிதங்கள் எல்லாம் பொது மக்கள் பார்வைக்கு விடப்பட்டிருக்கின்றன.

வாரன் ஜி. ஹார்டிங் அமெரிக்காவின் அதிபர் பதவியை அலங்கரித்தவர்களில் அவப்புகழ் பெற்றவர்களில் ஒருவர். ஊழல் மிகுந்த மற்றும் திறமையற்ற நிர்வாகத்தை நடத்தினார் என்று அவர் மீது குற்றச்சாட்டு உண்டு.

கடந்த 50 ஆண்டுகளாகவே அவரது குடும்பத்தினர் அவரது "நற்பெயருக்கு" மேலும் களங்கம் ஏதும் ஏற்படுவதைத் தடுக்க முயன்று கொண்டிருந்தனர்.

அவர் அவரது காதலி கேரி ஃபுல்டன் பிலிப்ஸ் என்ற பெண்ணுக்கு எழுதிய காதல் கடிதங்களை யாரும் பிரசுரிக்காவண்ணம் 1964 ஆம் ஆண்டில் சட்டரீதியான நடவடிக்கை எடுத்திருந்தனர்.

இந்த சட்டரீதியான தடை இப்போது விலக்கப்பட்டு, அந்தக் கடித வாசகங்கள் எல்லாம் வெளியே வந்துவிட்டன.

அந்தக் கடிதங்களிலிருந்து ஒரு சில துளிகள்:

"நான் நூலகத்தில் உன்னுடன் கழித்த இரவை நினைத்துக்கொண்டிருக்கிறேன்"

1918 இல் செனட் அவையில் உறுப்பினராக இருந்த போது ஹார்டிங் எழுதினார் " நீ எனக்கு என்ன மாதிரி இன்பத்தைத் தந்தாய்"

கடிதங்களில் காமம் பல இடங்களில் மேலும் பெருக்கெடுத்தோடத் தொடங்குகிறது

"உன் நேர்த்தி எனக்குப் பிடித்திருக்கிறது. உன் அழகான கட்டுக் கோப்பான தொடைகள் எனக்குப் பிடித்திருக்கிறது. அவை என்னைப் பிணைக்கும் வேளையில் அது ஒரு சொர்க்கம்"

இன்னும் வெளிப்படையான விவகாரங்களைப் பற்றிப் பேச அதிபர் ஹார்டிங் பூடகமான, சங்கேத வார்த்தைகளைப் பயன்படுத்துகிறார்.

இந்தக் கடிதங்களைப் பற்றி ஒரு புத்தகம் எழுதியிருக்கும் ஜிம் ரோப்நால்ட் இவை பாலியல் உறவை வெளியிலிருந்து பார்க்கும் சுகத்தைத் தாண்டிய ஒரு விஷயத்தை தருகின்றன என்கிறார்.

ஆனால் இந்த அதிபரின் திருமண பந்தத்துக்கு வெளியேயான உறவு சோகத்தில்தான் முடிந்தது. அதிபரானதும், தனது கள்ளக்காதலியும் அவரது கணவரும் இந்த விவகாரத்தைப் பற்றி வெளியே பேசாமலிருக்க ஆண்டொன்றுக்கு 5,000 டாலர்கள் தர சம்மதித்தார். 1923 இல் ஹார்டிங் இறந்ததன் பின்னர், யார் இந்தப் பெண் என்பது குறித்த யூகங்கள் தொடர்ந்தன.

அவர் ஒரு ஜெர்மன் உளவாளி என்றும், முதல் உலகப் போரின்போது அந்தப் பெண், தனது ஜெர்மன் ஆதரவை வெளிப்படையாகவே கூறினார் என்றும் வாதிடுகிறார் ஜிம் ரோப்நால்ட்.

ஆனால் இது வெறும் கற்பனை என்று கூறும் அதிபர் ஹார்டிங்கின் குடும்பத்தினர், பிலிப்ஸ் அமெரிக்காவின் மிகவும் சக்தி வாய்ந்த அரசியல்வாதி மீது காதல் கொண்ட ஒரு சாதாரணப் பெண்தான் என்றும் கூறுகின்றனர்.