வேட்டி கட்டி சென்றதால் நீதிபதி– 2 வக்கீல்களுக்கு அனுமதி மறுப்பு

by **ராஜா** Sat Jul 12, 2014 11:55 am

பாரம்பரியம்...

இதுதான் ஒரு நாட்டின் அடையாளம். எனவே பாரம்பரியமும், கலாச்சாரமும் பேணி பாதுகாக்கப்பட வேண்டும் என்ற உணர்வு பலரிடம் உள்ளது.

மேற்கத்திய கலாச்சார தாக்கம் நமது பாரம்பரியத்தை சிதைத்து விடக்கூடாது என்பதற்காக பல்வேறு அமைப்புகள் விழிப்புணர்வை ஏற்படுத்தி வருகின்றன.

வேட்டி– சட்டை அணிவது தமிழர்களின் பாரம்பரிய கலாச்சாரம். இந்த கலாச்சார பெருமையை பாதுகாக்க அரசே வேட்டி தினத்தை அறிவித்தது. பல அலுவலகங்களில் வாரத்தில் ஒருநாள் வேட்டி மற்றும் சேலை அணியும் பழக்கம் உருவாகி உள்ளது. இது ஒரு நல்ல அறிகுறி என்று எல்லோரும் பெருமை படுகிறோம்.

அதே நேரத்தில் சென்னையில் இருக்கும் பல நட்சத்திர ஓட்டல்கள், கிளப்புகளில் வேட்டி அணிந்து சென்றால் அனுமதிப்பதில்லை. ஷுவை தவிர மற்ற காலணிகள் அணிந்து சென்றால் அனுமதிப்பதில்லை என்று அனுமதி மறுக்கப்படுகிறது.

டி சர்ட், பேண்ட் அல்லது கோட் சூட் அணிந்து காலில் ஷுவுடன் டிப் டாப்பாக வவேண்டும் என்ற விதிமுறையை வகுத்து வைத்துள்ளனர். மற்றவர்களுக்கு அனுமதி இல்லை என்பதை பகிரங்கமாக அழைப்பிதழ்களிலேயே அச்சிட்டு கொடுக்கிறார்கள்.

தமிழகத்தின் தலைநகர் சென்னையில் தமிழர் கலாச்சாரத்தை அவமதிக்கும் இந்த ஓட்டல்களுக்கும், கிளப்புகளுக்கும் மணி கட்டுவது யார்? என்று தமிழ் பற்றாளர்கள் குமுறி கொண்டிருக்கிறார்கள்.

இந்நிலையில் வேட்டி கட்டி சென்ற ஒரே காரணத்துக்காக ஐகோர்ட் நீதிபதியையே கிரிக்கெட் சங்க கிளப்புக்குள் அனுமதிக்காத சம்பவம் பெரும் அதிர்ச்சியை ஏற்படுத்தி உள்ளது.

சென்னை சேப்பாக்கத்தில் தமிழக கிரிக்கெட் சங்கம் உள்ளது. இங்குள்ள கிளப்பில் நடந்த தனியார் புத்தக வெளியீட்டு விழாவுக்கு ஐகோர்ட்டு நீதிபதி ஹரிபரந்தாமன் அழைக்கப்பட்டு இருந்தார்.

நீதிபதி ஹரிபரந்தாமன் மற்றும் அவருடன் அந்த விழாவுக்கு வந்த மூத்த வக்கீல் காந்தி, மதுரையைச் சேர்ந்த வக்கீல் ஜி.ஆர்.சுவாமிநாதன் ஆகியோர் வேட்டி சட்டை அணிந்து விழாவுக்கு வந்தனர்.

வேட்டி சட்டை அணிந்து சென்றதால் மூன்று பேரையும் உள்ளே அனுமதிக்க ஊழியர்கள் மறுத்துவிட்டனர். இதனால் விழாவுக்கு செல்லாமல் அவர்கள் திரும்பிவிட்டனர். இந்த சம்பவம் கடும் அதிருப்தியை ஏற்படுத்தி உள்ளது.

இதுபற்றி நீதிபதி ஹரிபரந்தாமன் தனது அதிருப்தியை வெளியிட்டுள்ளார். அவர் கூறியதாவது:–

கிரிக்கெட் கிளப்பில் நடந்தது தனியார் பொது நிகழ்ச்சி. மாலை 5.30 மணிக்கு விழா நடைபெறுவதாக அழைப்பிதழில் அறிவிக்கப்பட்டு இருந்தது. நான் எனது அலுவலக காரில் மாலை 5.25 மணிக்கு சென்றேன். வேட்டி கட்டி இருந்ததால் அங்கிருந்த ஊழியர் உள்ளே அனுமதிக்க மறுத்துவிட்டார். அதை கேட்டதும் மிகவும் அதிர்ச்சி அடைந்தேன்.

இந்த செயல் வியப்பாக உள்ளது. கிரிக்கெட் கிளப்பை உருவாக்கியபோது ஆங்கிலேயர்கள் அவர்களது ஆடை வரையறையை உருவாக்கி இருக்கிறார்கள். சுதந்திரத்துக்கு பிறகும் அதே ஆடை கட்டுப்பாட்டை தொடர்ந்து பின்பற்றுவதும், நமது பாரம்பரிய ஆடைகளுக்கு தடை விதிப்பதும் வியப்பாக உளளது என்றார்.

இதேபோல் 1980–ல் முன்னாள் சுப்ரீம்கோர்ட்டு நீதிபதி வி.ஆர்.கிருஷ்ணய்யர் வேட்டி கட்டி சென்றதால் ஜிம்கானா கிளப்புக்குள் அனுமதிக்கப்படவில்லை. இதுபற்றி அவர் தனது எதிர்ப்பை விருந்தினர் வருகை பதிவேட்டில் பதிவு செய்தது குறிப்பிடத்தக்கது.

ஆங்கிலேயேனை விரட்டியடித்து 65 ஆண்டுகளுக்கு மேலாகி விட்டது. இந்த ஆங்கிலேய மோகம் விரட்டியடிக்கப்படுவது எப்போது?

-maalaimalar

by **ராஜா** Sat Jul 12, 2014 11:59 am

அரபு நாடுகளில் உள்ள 5 அல்லது 7 நட்சத்திர விடுதிகளில்.

அரபியர்களின் பாரம்பரிய உடையான (வெள்ளை - ஆண்கள் , கருப்பு - பெண்கள்) அணிந்து வந்தால் தாரளமாக அனுமதிப்பார்கள். அவர்களுக்கு முன்னுரிமையும் தருவார்கள்.

ஏன் தமிழ்நாட்டில் மட்டும் தமிழர்களின் பாரம்பரிய உடையணிந்து வந்தால் அவமதிக்கிறார்கள்?! சோகம்

by **ayyasamy ram** Sat Jul 12, 2014 12:22 pm

அழைப்பிதழில் இப்படித்தான் வர வேண்டும்
என்று அச்சிட்டு கொடுத்திருக்கும்போது வேறு
மாதிரி சென்றது ஏன்?
-
விளம்பரம் பெறுவதற்காகவா...?
-
சங்க கூட்டத்தில் விதிமுறைகளை தளர்த்த
தீர்மானம் கொண்டு வந்திருக்க வேண்டும்
-