பேஸ்புக்கில் காமராஜர் பற்றி அவதூறு வெளியிட்ட மத்திய அரசு அதிகாரி கைது

தாம்பரம் அருகே பெருந்தலைவர் காமராஜர் மற்றும் வியாபாரிகள் குறித்து பேஸ்புக்கில் அவதூறு தகவல் வெளியிட்ட மத்திய அரசு அதிகாரியை போலீசார் கைது செய்தனர்.

பேஸ்புக்கில் அவதூறு

சென்னையை அடுத்த கிழக்கு தாம்பரம் வேளச்சேரி சாலை பூண்டி பஜார் பகுதியில் பெருந்தலைவர் காமராஜர் சிலை உள்ளது. இந்த சிலை இரும்புக்கம்பி கூண்டு வைத்து பூட்டப்பட்டிருப்பது குறித்து ரவிக்குமார் ஸ்டீபன் என்பவர் ‘பேஸ்புக்’கில் படத்துடன் செய்தி வெளியிட்டிருந்தார். பெருந்தலைவர் காமராஜர் சிலையை கூண்டு போட்டு அடைத்து வைத்திருப்பது தமிழர்கள் வெட்கப்பட வேண்டிய விஷயம் என்றும் அவர் அதில் குறிப்பிட்டிருந்தார்.

இதில் பலர் தங்கள் கருத்துக்களை தெரிவித்திருந்தனர். கிழக்கு தாம்பரத்தைச் சேர்ந்த ஜெயசந்திரதாஸ் (வயது 52) என்பவர், போக்குவரத்துக்கு இடையூறாக உள்ள காமராஜர் சிலையை அந்த இடத்தில் இருந்து அகற்ற வேண்டும் என்றும், வியாபாரிகள் குறித்து சில அவதூறான கருத்துக்களையும் அதில் வெளியிட்டிருந்தார். இதற்கு பலத்த எதிர்ப்பு கிளம்பியது.

மத்திய அரசு அதிகாரி கைது

இது தொடர்பாக காஞ்சீபுரம் கிழக்கு மாவட்ட வணிகர் சங்கங்களின் பேரவை தலைவர் வெ.ஆ.கருணாநிதி சேலையூர் போலீசில் புகார் செய்தார். அதில், வியாபாரிகளின் தொழிலை கொச்சைபடுத்தும் விதமாகவும், வியாபாரிகளின் மனதை புண்படுத்தும் விதமாகவும் ஜெயசந்திரதாஸ் கருத்து தெரிவித்து உள்ளார். வன்முறை செயல்களை தூண்டும் அவர் மீது நடவடிக்கை எடுக்க வேண்டும் என்று கூறியிருந்தார்.

இது குறித்து சேலையூர் போலீஸ் இன்ஸ்பெக்டர் குணவர்மன் வழக்கு பதிவு செய்து அவதூறு கருத்தை வெளியிட்ட ஜெயசந்திரதாசை கைது செய்தார். இவர் மத்திய அரசு அலுவலகத்தில் அதிகாரியாக வேலை பார்த்து வருகிறார்.