மோசமான வரவேற்பை பெற்றது இந்தியாவில் தான்: ஏர் ஏசியா

by **சிவா** Sat Jul 05, 2014 5:26 am

மலேசியாவின் குறைந்த கட்டண சேவை நிறுவனமான ஏர் ஏசியா கடந்த மாதம் இந்தியாவில் தனது விமான சேவையைத் தொடங்கியது. பெங்களூரிலிருந்து சென்னைக்கும், கோவாவிற்கும் இரண்டு விமான சேவைகள் இந்நிறுவனத்தால் செயல்படுத்தப்பட்டு வருகின்றன.

கடந்த 13 ஆண்டுகளுக்குமுன் 2,00,000 பயணிகளுடன் இருந்த இந்த விமான நிறுவனத்தின் சேவை தற்போது 51 மில்லியன் என்ற எண்ணிக்கையைத் தொட்டுள்ளது. தங்களது இந்திய செயல்பாடு குறித்து ஏர் ஏசியா நிறுவனத்தின் தலைமை நிர்வாகியான டோனி பெர்னாண்டஸ் சமீபத்தில் பத்திரிகையாளர்களிடம் பேட்டியளித்தார்.

அதில் தென்கிழக்கு ஆசிய சந்தையிலே மோசமான வரவேற்பைப் பெற்றது இந்தியாவில்தான் என்று அவர் குறிப்பிட்டுள்ளார்.இங்குள்ள பிற விமான நிறுவனங்கள் விரோதப் போக்குடனும், எதிர்மறை நடவடிக்கையுடனும் நடந்துகொள்வதாக அவர் கூறினார்.

மலேசியாவில் புதிய விமான சேவைகள் அறிமுகப்படுத்தப்படும்போது நாங்கள் அதனை நேரடியாகத் தொழில்போட்டியில் எதிர்கொள்கின்றோம், அவற்றைத் தடுப்பதென்பது சக்தியை வீணாக்கும் செயலாகும், ஒரு நிறுவனத்தின் வெற்றியை மக்கள் தீர்மானிக்கட்டும். ஏகபோகம், கூட்டமைப்பு என்பதற்கான காலம் மாறிவிட்டது என்றும் அவர் தெரிவித்தார்.

கடந்த 14 மாதங்களில் அதிகப்படியான வழக்குகளை இந்தியாவில் எதிர்கொள்ள நேர்ந்தது எனபதை அவர் சுட்டிக்காட்டினார். ஏர் ஏசியா நிறுவனம் இந்த வருட இறுதிக்குள் இன்னும் ஆறு விமானங்களை இந்திய சேவையில் அறிமுகப்படுத்த உள்ளது.

வடக்கு மற்றும் வடகிழக்கு பகுதிகள் உட்பட மொத்தம் 13 நகரங்களை இணைக்கும் திட்டத்தில் இந்நிறுவனம் செயல்பட்டு வருகின்றது. இதுமட்டுமின்றி வளைகுடா பகுதிகள், ஆப்பிரிக்கா, தென்கிழக்கு ஆசியா, மாலத்தீவுகள் போன்ற நாடுகளுக்கும் தங்களின் சேவைகளை விரிவுபடுத்த எண்ணுகின்றது.

ஆனால் இது இந்திய அரசின் 5/20 விதிமுறையைப் பொறுத்து நிர்ணயிக்கப்படும் என்று கூறப்பட்டுள்ளது. இந்த விதிமுறைப்படி இந்திய விமான நிறுவனங்கள் ஐந்து வருட உள்நாட்டு சேவையை நிறைவு செய்து 20 விமானங்களைக் கொண்டிருக்கும்பட்சத்தில் மத்திய அரசு வெளிநாட்டு சேவைகளுக்கு அந்நிறுவனத்திற்கு அனுமதி அளிக்கும்.

இந்த விதிமுறை மற்றும் எரிபொருள் வரிவிதிப்பில் மாற்றங்கள் செய்யப்பட்டால் இந்திய விமான சேவை மலேசியாவைவிட அதிக வளர்ச்சி கொண்டதாக இருக்கும்.மிகப் பெரிய நிறுவனமாக மாறக்கூடிய ஏர் ஏசியா இந்தியாவில் 500 விமானங்கள வரை இங்கு செயல்படுத்தமுடியும் என்று பெர்னாண்டஸ் குறிப்பிட்டார்.