எல்லைப் பிரச்சினைக்கு தீர்வு கண்டால் உலகுக்கே உதாரணமாக அமையும் - மோடி

சீன அதிபர் ஸி ஜின்பிங்கை பிரதமர் மோடி 80 நிமிடம் சந்தித்துப் பேசினார். இந்த சந்திப்பின்போது, ‘எல்லைப்பிரச்சினையில் இணக்கமான தீர்வு கண்டுவிட்டால் அது உலகுக்கே உதாரணமாக அமையும்’ என அவர் வலியுறுத்தினார்.

மோடி-ஸி ஜின்பிங் சந்திப்பு

‘பிரிக்ஸ்’ என்னும் பிரேசில், ரஷியா, இந்தியா, சீனா, தென் ஆப்பிரிக்கா ஆகிய 5 நாடுகளின் உச்சிமாநாடு, பிரேசில் நாட்டில் நேற்று தொடங்கியது. இந்த மாநாட்டில் பங்கேற்பதற்காக பிரதமர் நரேந்திர மோடி நேற்று முன்தினம் போர்ட்டலிஸா நகர் போய்ச் சேர்ந்தார். சீன அதிபர் ஸி ஜின்பிங்கும் அங்கு சென்றடைந்தார்.

அடுத்த சில நிமிடங்களில் பிரதமர் நரேந்திர மோடியும், சீன அதிபர் ஸி ஜின்பிங்கும் சந்தித்துப்பேசினர். இந்த சந்திப்பை 40 நிமிடங்கள் நடத்த திட்டமிடப்பட்டிருந்தது. ஆனால் சந்திப்பு, 80 நிமிடங்கள் நடந்தது. பிரதமர் பதவியை ஏற்ற பின்னர் நரேந்திர மோடி, ஸி ஜின்பிங்கை சந்தித்துப் பேசியது இதுவே முதல் முறை.

பெரிய அளவில் வாய்ப்புகள்

இந்தியாவுக்கும், சீனாவுக்கும் இடையே 4,057 கி.மீ. தொலைவு எல்லையில் பிரச்சினை உள்ளது. இதில் தீர்வு காண்பதற்கு 17 சுற்று பேச்சுக்கள் நடத்தப்பட்டுள்ளன. இந்த நிலையில் பிரதமர் மோடியும், சீன அதிபர் ஸி ஜின்பிங்கும் சந்தித்துப் பேசியது முக்கியத்துவம் பெற்றுள்ளது.

இந்த சந்திப்பின்போது, இந்தியாவும், சீனாவும் இரு தரப்பும் பலன் அடையத்தக்க அளவில் கூட்டு வைத்துக்கொள்வதற்கு மட்டுமல்ல, ஆசியா மற்றும் உலகளாவிய வளர்ச்சிக்கு பக்கபலமாக இருக்கவும் பெரிய அளவில் வாய்ப்புகள் உள்ளன என இரு தலைவர்களும் ஒப்புக்கொண்டனர்.

உலகமே கவனிக்கிறது

இரு தரப்பு உறவின் முக்கியத்துவம் குறித்து சீன அதிபர் ஸி ஜின்பிங் வலியுறுத்தினார். இதுபற்றி அவர் குறிப்பிடும்போது, “இந்தியாவும், சீனாவும் சந்திக்கிறபோது அதை உலகமே கவனிக்கிறது” என கூறினார்.

இந்த சந்திப்பு தொடர்பாக பிரதமர் அலுவலகம் வெளியிட்டுள்ள செய்திக்குறிப்பில், “எல்லை பிரச்சினைக்கு தீர்வு காண்பதற்கு இரு தரப்பினரும் வலியுறுத்தினர். இரு தரப்பினரும் பரஸ்பரம் ஒருவர் மீது மற்றவர் நம்பிக்கையை வலுப்படுத்திக்கொள்ளவேண்டியதின் முக்கியத்துவம் குறித்தும், எல்லையில், அமைதியையும், சமாதானத்தையும் பராமரிக்க வேண்டியது குறித்தும் பிரதமர் நரேந்திர மோடி வலியுறுத்தினார்” என குறிப்பிடப்பட்டுள்ளது.

உதாரணமாக அமையும்

சீன அதிபர் ஸி ஜின்பிங்கிடம், “இந்தியாவும், சீனாவும் எல்லைப்பிரச்சினையை இணக்கமாக தீர்த்துக்கொண்டு விட்டால், அமைதிவழி தீர்வுக்கு உலகத்துக்கே இது உதாரணமாக அமையும்” என்று பிரதமர் நரேந்திர மோடி கூறினார்.

தற்போதைய நிலப்பரப்பு சிரமங்களை கருத்தில் கொண்டு, கைலாஷ்-மானசரோவர் யாத்திரைக்கு மேலும் ஒரு வழித்தடத்தை உருவாக்க வேண்டும் என்று சீன அதிபர் ஸி ஜின்பிங்கிடம் பிரதமர் நரேந்திர மோடி வலியுறுத்தினார். இதை பரிசீலனைக்கு ஏற்றுக்கொள்வதாக ஸி ஜின்பிங் ஒப்புக்கொண்டார்.

முதலீடுகள் பெருக வேண்டுகோள்

இந்தியாவில் உள்கட்டமைப்பு துறையில் சீன முதலீடு பெருக வேண்டும் என்று கேட்டுக்கொண்ட பிரதமர் மோடி, இரு நாடுகளுக்கு இடையேயான வர்த்தக சமநிலையின்மை தீர்க்கப்பட்டுவிடும் என நம்பிக்கை தெரிவித்தார்.

அப்போது சீன அதிபர், நீடித்த பொருளாதார உறவுக்கு வர்த்தக சமநிலை அவசியம் என்பதை ஏற்றுக்கொண்டார். இந்தப் பிரச்சினையை தீர்ப்பதற்கு, இந்தியாவிலிருந்து சீனாவுக்கு சேவை ஏற்றுமதியை பெருக்குவதுதான் ஒரே வழி என அவர் கூறினார்.

மோடிக்கு அழைப்பு

இந்தியாவுக்கு செப்டம்பர் மாதம் வருகை தருவதை ஸி ஜின்பிங் உறுதி செய்தார். இதேபோன்று பிரதமர் நரேந்திர மோடி சீனாவுக்கு வருகை தர வேண்டும் என ஸி ஜின்பிங் அழைப்பு விடுத்தார். அதை நரேந்திர மோடி ஏற்றுக்கொண்டார்.

இந்த சந்திப்பு குறித்து பிரதமர் நரேந்திர மோடி, ‘டுவிட்டர்’ சமூக வலைத்தளத்தில், “சீன அதிபர் ஸி ஜின்பிங்குடனான சந்திப்பு மிகவும் பயனுள்ளதாக அமைந்தது. பரவலான பல்வேறு பிரச்சினைகள் குறித்து பேசினோம்” என குறிப்பிட்டுள்ளார்.

ஆசிய பசிபிக் மாநாடு

பிரதமர் நரேந்திர மோடி-சீன அதிபர் ஸி ஜின்பிங் சந்திப்பின் முதற்பலன், இந்த ஆண்டு நவம்பர் மாதம் சீனாவில் நடைபெறவுள்ள ‘அபெக்’ என்னும் ஆசிய பசிபிக் பொருளாதார ஒத்துழைப்பு மாநாட்டுக்கு, இந்தியாவை சீனா அழைத்துள்ளது. இது மிகவும் அபூர்வமான நிகழ்வு என கருதப்படுகிறது.

தினமலர்

இந்தியா இப்போது தான் ஒரு திறமையாக பிரதமரை பெற்றுள்ளது...!