மாதம் 16 லட்சம் வாடகையில் ஆடம்பர பங்களாவில் குடியேறும் கபில் சிபல்

அரசு ஒதுக்கிய வீட்டை காலி செய்யும், முன்னாள் மத்திய அமைச்சர் கபில் சிபல் மாதம் 16 லட்சம் வாடகையில் டெல்லியில் புதிய பங்களாவில் குடியேற உள்ளார். டெல்லியிலேயே இதுதான் அதிக வாடகை கொண்ட பங்களா.மக்களவை தேர்தலில் தேர்ந்தெடுக்கப்பட்ட புதிய எம்.பி.க்கள், மற்றும் புதிய அமைச்சர்கள் என 316 பேருக்கு டெல்லியில் விரைவில் அரசு வீடு ஒதுக்கப்பட உள்ளது. கடந்த ஆட்சியில் எம்.பி.யாக தேர்ந்தெடுக்கப்பட்டு தற்போதைய தேர்தலில் போட்டியிடாமலும், போட்டியிட்டு தோல்வியடைந்தவர்களுமாக சுமார் 265 எம்.பி.க்கள் தங்கள் அரசு வீடுகளை இன்னும் காலி செய்யாமல் உள்ளனர்.

அவர்களை காலி செய்ய மத்திய அரசு உத்தரவிட்டுள்ளது. சிலர் அவகாசம் பெற்று, அரசு வீட்டில் தங்கி உள்ளனர்.இவ்வாறு ஆகஸ்ட் மாதம் வரை அவகாசம் பெற்று அரசு வீட்டில் தங்கியிருக்கிறார் முன்னாள் சட்ட அமைச்சர் கபில் சிபல். ஐக்கிய முற்போக்கு கூட்டணி அரசில் 10 ஆண்டாக அமைச்சர் பதவி வகித்த இவர், மக்களவை தேர்தலில் தோல்வியை தழுவினார். இதையடுத்து, லுத்யன்ஸ் டெல்லி எனப்படும் பாரம்பரிய மற்றும் கலைநயம்மிக்க கட்டிடங்கள் அமைந்துள்ள பகுதியில் புதிய பங்களா ஒன்றில் வாடகைக்கு குடியேற உள்ளார் கபில் சிபல்.

ஜோர் பாக்கில் 11 ஆயிரம் சதுரஅடி பரப்பளவில் அமைந்துள்ள இந்த பங்களா டெல்லியை சேர்ந்த தொழில் அதிபர் சித்தார்த் சாரீனுக்கு சொந்தமானது. இந்த ஆடம்பர பங்களாவின் வாடகை மாதம் ரூ.16 லட்சம் என கூறப்படுகிறது. இதுதான், டெல்லியிலேயே அதிகமான வாடகை கொண்ட பங்களாவாகும். வாடகை ஒப்பந்தத்தில் கையெழுத்திட்டதை கபில் சிபலும், சித்தார்த்தும் ஒப்புக்கொண்ட போதிலும், வாடகை ஒப்பந்தம் குறித்த தகவல்களை வெளிபடுத்த மறுத்துவிட்டனர்.ஆகஸ்ட் 1ம் தேதி முதல் கபில் சிபல் தனது புதிய வாடகை பங்களாவுக்கு குடியேற உள்ளார்.

அதிலேயே அவரது சட்ட அலுவலகமும் செயல்படும் என அவர் தெரிவித்துள்ளார். உச்ச நீதிமன்ற முன்னணி வக்கீலான இவர் பிர்லா, பெப்சி மற்றும் பல்வேறு பன்னாட்டு நிறுவனங்களின் சட்ட ஆலோசகராக பணியாற்றியவர். அமைச்சரானதால் வக்கீல் தொழிலிலிருந்து விலகியிருந்த கபில் சிபல் மீண்டும் தனது பணியை துவங்க உள்ளதாகக் கூறப்படுகிறது.

எம்பிக்கள் படையெடுப்பு வாடகை அதிகரிப்பு

லுத்யன்ஸ் டெல்லி பகுதி நாடாளுமன்றத்தை ஒட்டி அமைந்துள்ளது. இங்கு சுமார் 1,000 பங்களாக்கள் அமைந்துள்ளன. இதில் பெரும்பாலானவை அரசுக்கு சொந்தமானவை. 10 சதவீதம் மட்டுமே தனியாருக்கு சொந்தமானது. இதில், முன்னணி தொழிலதிபர்கள், பெரும் பணக்காரர்கள் மட்டுமே தங்கியுள்ளனர். முன்னாள் எம்பிக்கள் பலரும் லுத்யன்ஸ் டெல்லி பகுதியிலேயே குடியேற விரும்புகின்றனர். பலரும் இப்பகுதிக்கு படையெடுத்து வருவதால் பங்களாக்களின் வாடகை தாறுமாறாக உயர்ந்துள்ளதாக கூறப்படுகிறது. முன்னதாக, 2013ல் மும்பை தொழிலதிபரும், அமைச்சருமான கமல் மொரார்கா ஜோர் பாக் பகுதியில் மாதம் 18 லட்சம் வாடகையில் பங்களா ஒன்றில் குடியிருந்துள்ளது குறிப்பிடத்தக்கது.

-- தினகரன்