மீனவர் பிரச்சனை: பிரதமர் மோடிக்கு முதல்வர் 12வது கடிதம்

சென்னை : 'தமிழக மீனவர்கள், 64 பேரை விடுவிக்க நடவடிக்கை எடுக்க வேண்டும்; மீனவர்கள் பிரச்னைக்கு நிரந்தர தீர்வு காண வேண்டும்' என, பிரதமர் மோடிக்கு, தமிழக முதல்வர் ஜெ., கடிதம் எழுதி உள்ளார்.

பிரதமராக மோடி பதவி ஏற்ற பின், காவிரி பிரச்னை, மீனவர் பிரச்னை உள்ளிட்ட பல்வேறு காரணங்களுக்காக, முதல்வர் ஜெயலலிதா கடிதம் அனுப்பி வருகிறார். இதுவரை, 11 கடிதங்களை அனுப்பி உள்ளார். இதில், மூன்று கடிதங்கள் மீனவர் பிரச்னை தொடர்பானது. இந்நிலையில், நேற்று, 12வது கடிதத்தை, பிரதமர் மோடிக்கு, அவர் அனுப்பி உள்ளார். இது, மீனவர் பிரச்னை தொடர்பானது.

முதல்வர் அனுப்பிய கடிதம்:புதுக்கோட்டை மாவட்டம், ஜெகதாபட்டினம் மற்றும் கோட்டை பட்டினத்தைச் சேர்ந்த, 11 மீனவர்கள், 23ம் தேதி இரவு, மூன்று படகுகளில், மீன் பிடிக்கச் சென்றனர்.அவர்களை, இலங்கை கடற்படையினர் கைது செய்து, காங்கேசன் துறைக்கு கொண்டு சென்றுள்ளனர். இதே போல், கடந்த 19ம் தேதி, ஒரு படகில் மீன் பிடிக்கச் சென்ற, நாகை மாவட்டத்தைச் சேர்ந்த, ஏழு மீனவர்கள் கைது செய்யப்பட்டு உள்ளனர்.கடந்த 18ம் தேதி, 46 மீனவர்கள், 11 படகுகளுடன், இலங்கை படையினரால் கைது செய்யப்பட்டு, இதுவரை விடுவிக்கப்படாதது குறித்து, ஏற்கனவே கடிதம் எழுதியுள்ளேன்.இதற்கு முன், இதே போன்ற சம்பவங்கள் நடந்த போது, நான், உங்கள் கவனத்திற்கு கொண்டு வந்தேன். தாங்கள் உடனடியாக நடவடிக்கை எடுத்ததால், தமிழக மீனவர்கள் அனைவரும் விடுவிக்கப்பட்டனர். ஆனால், பறிமுதல் செய்யப்பட்ட படகுகள் மற்றும் மீன்பிடி சாதனங்கள் இதுவரை வழங்கப்படவில்லை. நீண்ட காலம், பயன்படுத்தாமல் இருந்தால், படகுகள் மற்றும் மீன்பிடி உபகரணங்கள் பாழாகிவிடும்.

இதனால், எழை மீனவர்கள் மிகப்பெரிய இழப்பு ஏற்படும். எனவே, விரைவில், அந்த படகுகளையும், மீன்பிடி உபகரணங்களையும் விடுவிக்க நடவடிக்கை எடுக்க வேண்டும். இப்பிரச்னைக்கு நிரந்தர தீர்வு காண, கச்சத்தீவை மீட்க வேண்டும் என்று, கடிதங்களில் தெரிவித்திருந்தேன். இந்தியா - இலங்கை இடையிலான, 1974 மற்றும், 1976ம் ஆண்டு ஒப்பந்தங்களை ரத்து செய்து, மீனவர்களின் உரிமைகளை மீட்டெடுக்க வேண்டும்.இவ்வாறு, கடிதத்தில் கூறப்பட்டு உள்ளது.

ம்.... வெறும் காகிதம் மட்டும் அனுப்பி என்ன பயன்... மோடி ஜி கொஞ்சம் கருணை காட்டுங்க ஜி. தமிழ் நாட்டுல உங்க கட்சிக்கு ஓட்டுப் போட்டவங்களும் இருக்காங்க.