வரும் 26ம் தேதி அமாவாசை: அ.தி.மு.க.,வில் கலக்கம்

அமைச்சரவையிலும், கட்சியிலும் மாற்றங்கள் செய்ய, முதல்வர் திட்டமிட்டுள்ளதாக கூறப்படுகிறது. இச்சூழ்நிலையில், 26ம் தேதி அமாவாசை வருவதால், பதவியில் இருப்போர் கலக்கத்திலும், பதவியை எதிர்பார்ப்போர் கனவிலும் உள்ளனர்.

லோக்சபா தேர்தலில், அ.தி.மு.க., அமோக வெற்றியை பெற்றாலும், தேர்தலில் முறையாக பணி செய்யாதவர்கள் மீது தயவு தாட்சண்யமின்றி, ஜெயலலிதா நடவடிக்கை எடுத்து வருகிறார். அமைச்சரவையில் செல்வாக்குடன் இருந்த, முனுசாமியின் அமைச்சர் பதவி பறிக்கப்பட்டது. அதேபோல், பச்சைமால், ரமணா போன்றோர், அமைச்சர் பதவி இழந்தனர். புதிய அமைச்சர்கள் இடம் பெற்றனர்.அதேபோல், குற்றப் புகாருக்குள்ளானவர்கள், அதிரடியாக கட்சியை விட்டு நீக்கப்படுகின்றனர். இதுபோன்ற அதிரடி நடவடிக்கையால், காஞ்சிபுரம், கிருஷ்ணகிரி, அரியலுார், கோவை உட்பட, சில மாவட்ட செயலர்கள் பதவி மற்றும் பல்வேறு அமைப்புகளின்பதவிகள் காலியாக உள்ளன.

இவற்றுக்கு விரைவில், புதிய நிர்வாகிகள் நியமிக்கப்படுவர் என எதிர்பார்க்கப்படுகிறது. அதேபோல், அமைச்சரவையிலும் மாற்றம் ஏற்படுத்த, முதல்வர் முடிவு செய்திருப்பதாக கூறப்படுகிறது. தற்போது முக்கிய துறைகளை கவனிக்கும் பொறுப்பில் இருக்கும் சில அமைச்சர்களின் செயல்பாடு மீது, முதல்வருக்கு திருப்தி ஏற்படவில்லை. எனவே, அவர்களை கட்சி பொறுப்புகளுக்கு அனுப்பி விட்டு, புதியவர்களை அமைச்சரவையில் சேர்க்க
உள்ளதாக கூறப்படுகிறது.

கடந்த வாரம் முழுவதும், முதல்வர், தலைமைச் செயலகம் வரவில்லை. நாளை மீண்டும் தலைமைச் செயலகம் வர உள்ளார். அதற்கு மறுநாள், அமாவாசை என்பதால், அன்று அமைச்சரவையில் மாற்றம் வருமோ என, அமைச்சர்கள் கலக்கத்தில் உள்ளனர்.அதேநேரம், அமைச்சரவை மாற்றம் செய்யப்பட்டால், தங்களுக்கு பதவி கிடைக்கலாம் என, எம்.எல்.ஏ.,க்களாக இருக்கும் பலரும், கனவுடன் உலா வருகின்றனர்.குரு பெயர்ச்சி மற்றும் ராகு, கேது பெயர்ச்சி முடிந்து வரும் அமாவாசையில், முதல்வர், மாற்றத்தை ஏற்படுத்துவாரா அல்லது சகாக்களை எச்சரித்து விடுவாரா என்பது, ஓரிரு நாளில் தெரிந்து விடும்.