மதுக்கடைகளால் நரகமாகிறது நகரம்: முக்கிய வீதிகளில் கும்மாளம்

உடுமலை: 'சத்திரம்', என்பது முற்காலத்தில், தொலை துார பயணம் மேற்கொள்ளும், பாதசாரிகள் தங்கி இளைப்பாற, அப்பகுதியை ஆட்சி செய்யும் மன்னர்களால் துவங்கப்படும் புண்ணிய காரியமாகும். இத்தகைய வரலாற்றை தாங்கி நிற்கும் உடுமலை நகர வீதியில் தற்போதைய ஆட்சியாளர்களால், 'குடிமகன்கள்' சேவைக்கு? 'டாஸ்மாக்' மதுக்கடை துவங்கப்பட்டு, அக்கடையால், பள்ளி மாணவர்களும், பெண்களும் நடமாட முடியாத நிலை உள்ளது தான் கால மாற்றமா என அப்பகுதி மக்கள் கேள்வி எழுப்புகின்றனர்.

உடுமலை நகரத்தின் பழமையை வெளிப்படுத்துவதில், பல்வேறு வீதிகளுக்கும் முக்கிய பங்கு உள்ளது. அவ்வகையில், பழநி உட்பட சுற்றுலா தலங்களுக்கு செல்லும் பக்தர்கள் மற்றும் பாதசாரிகள் தங்கி செல்வதற்காக செயல்பட்ட சத்திரத்தின் பெயர் நிலைத்து நிற்க, சத்திரம் வீதி பழைய பஸ் ஸ்டாண்ட் பகுதியில் உள்ளது. அப்பகுதியில், சுந்தரமூர்த்தி விநாயகர் கோவில், பள்ளி மற்றும் பல்வேறு வணிக கடைகள் செயல்பட்டு வருகின்றன. இவ்வாறு, மக்களும், குழந்தைகளும் சுதந்திரமாக நடமாடி வந்த வீதி இன்று முழுவதுமாக 'குடிமகன்'களின் கட்டுப்பாட்டிற்குள் சென்று விட்டது. சத்திரம் வீதியில் செயல்பட்டு வரும் 'டாஸ்மாக்' மதுக்கடையில், மது அருந்துபவர்கள், நேராக அருகிலுள்ள நகராட்சி துவக்கப்பள்ளியின் முன்பகுதியை தங்கள் ஓய்வறையாக மாற்றுகின்றனர். பள்ளி நுழைவாயிலில் குடிமகன்கள் அட்டகாசத்தை அரங்கேற்ற, அங்குள்ள குழந்தைகள் வளாகத்தை விட்டு வெளியில் வர பயப்படும் அவல நிலை உள்ளது.

காலை மற்றும் மாலை நேரங்களில், பள்ளி சுற்றுச்சுவர் அருகே, தற்காலிக கடைகள் அமைக்கப்பட்டு, 'குடிமகன்'களுக்கு சேவை வழங்கப்படுகிறது. இதனால், வணிகக்கடைகளுக்கு வரும் பெண்களுக்கு பாதுகாப்பில்லாத அவல நிலை உள்ளது. கோவிலுக்கு வரும் பக்தர்களும், பயத்துடனே சத்திரம் வீதியை கடந்து செல்கின்றனர். சமூகத்தை நல்வழிப்படுத்தும் கோவில் மற்றும் பள்ளியின் அருகில் செயல்படும் 'டாஸ்மாக்' மதுக்கடையை அகற்ற வலியுறுத்தி, நடத்தப்பட்ட போராட்டங்கள் எதையும் அரசு கண்டுகொள்ளவில்லை. சத்திரம் வீதியில், நாள்தோறும் குறிப்பிட்ட நேரங்களில், போலீசார் ரோந்து செல்வதால், 'குடிமகன்'கள் அட்டகாசத்தை சிறிது குறைக்கலாம். மதுக்கடையை இடம் மாற்றும் வரை, இந்த ஆறுதலாவது தங்களுக்கு கிடைக்குமா என அப்பகுதி மக்கள் எதிர்பார்த்துள்ளனர்.

வெங்கடகிருஷ்ணா ரோடு: உடுமலை தினசரி சந்தை, பஸ் ஸ்டாண்ட் ஆகிய முக்கிய பகுதிகளின் அருகில், வெங்கடகிருஷ்ணா ரோடு உள்ளது. இந்த ரோட்டில் செயல்பட்டு வரும் 'டாஸ்மாக்' மதுக்கடையால், தினசரி சந்தைக்கு வரும் பெண்கள் தொடர்ந்து பாதிக்கப்பட்டு வருகின்றனர்.

வாரச்சந்தை நாட்களில் 'குடிமகன்' கள் தொல்லைகளை தாண்டி, அங்கு வர பெண்கள் ஆர்வம் காட்டுவதில்லை. பஸ் ஸ்டாண்ட்டில் இறங்கி, அரசு அலுவலகங்களுக்கு மக்கள் செல்லும் இந்த ரோட்டிலுள்ள 'டாஸ்மாக்' மதுக்கடையை மாற்ற வேண்டும் என தொடர் புகார் மனுக்கள் அரசுக்கு அனுப்பப்பட்டு வருகிறது. இந்நிலையில், மதுக்கடை அருகே செயல்பட்டு வந்த பார் மூடப்பட்டுள்ளது. இதனால், 'குடிமகன்'கள் திறந்த வெளி பாராக ரோட்டை பயன்படுத்த துவங்கியுள்ளனர். இப்பிரச்னைகளுக்கு தீர்வாக மக்கள் நடமாட்டம் இல்லாத பகுதிகளில், மதுக்கடைகளை இடம் மாற்றுவதால் மக்களோடு, 'குடிமகன்'களும் மகிழ்ச்சிக்குள்ளாவார்கள்.