சர்க்கரை விலை உயருகிறது: இறக்குமதி வரி 40% ஆக அதிகரிப்பு!

by **சிவா** Mon Jun 23, 2014 6:08 pm

புதுடெல்லி: சர்க்கரைக்கான இறக்குமதி வரியை 15 சதவீதத்தில் இருந்து 40 சதவிகிதமாக மத்திய அரசு உயர்த்தியுள்ளது. இதன் காரணமாக சர்க்கரை விலை உயரும் நிலை ஏற்பட்டுள்ளது.

டெல்லியில் இன்று நடைபெற்ற உயர்நிலைக் குழு கூட்டத்திற்கு பின்னர் செய்தியாளர்களிடம் பேசிய மத்திய உணவு மற்றும் பொது விநியோகத்துறை அமைச்சர் ராம்விலாஸ் பஸ்வான், உள்நாட்டு சர்க்கரை தொழிலை காக்க சர்க்கரைக்கான இறக்குமதி வரி உயர்த்தப்பட்டுள்ளது என்றார்.

சர்க்கரை ஆலைகளுக்கு கூடுதலாக ரூ.4,400 கோடி வட்டியில்லா கடன் வழங்கப்படும் என்றும், கரும்பு விவசாயிகளுக்கு ஆலைகள் தரவேண்டிய நிலுவைத் தொகை தர வட்டியில்லா கடன் உதவும் என்றும் அவர் தெரிவித்தார்.

மேலும், ஒரு டன்னுக்கு ரூ.3,300 என்ற சர்க்கரை ஏற்றுமதி மானியம் செப்டம்பர் வரை நீட்டிக்கப்படும் என்றும் ராம்விலாஸ் பஸ்வான் கூறினார்.

இந்நிலையில் சர்க்கரை மீதான இறக்குமதி வரி உயர்வு காரணமாக சர்க்கரை விலை கிலோ ஒன்றுக்கு ரூல் 2 முதல் 3 வரை உயரலாம் என தகவல்கள் தெரிவிக்கின்றன.