ரயில் கட்டண உயர்வு வாபஸ்?

புதுடெல்லி: மானியங்கள் மற்றும் டீசல் விலையை குறைத்தாலே ரயில் கட்டண உயர்வை தவிர்க்கலாம் என ரயில்வே வாரியத் தலைவர் அருனேந்திர குமார் மத்திய அரசுக்கு யோசனை தெரிவித்துள்ளார். பயணிகள் ரயில் கட்டணம் 14.2 சதவீதமும், சரக்கு ரயில் கட்டணம் 6.5 சதவீதமும் உயர்த்தி அறிவிக்கப்பட்டது. இந்த கட்டண உயர்வுக்கு நாடு முழுவதும் கடும் எதிர்ப்பு கிளம்பியுள்ளது. எதிர்க்கட்சியி னர் பல்வேறு போராட்டம், ரயில் மறியல் ஆர்ப்பாட்டங் களை நடத்தி வருகின்றனர். அதே நேரத்தில், கட்டண உயர்வை நியாயப்படுத்துவதற்கான முயற்சியில் மத்திய அரசும் ஈடுபட்டுள்ளது. இந்நிலையில், ரயில்வே துறையில் வழங்கப்படும் அதிகமான மானியங்களால்தான் கட்டண உயர்வு தவிர்க்க முடியாததாக உள்ளது என்ற விளக்கமும் தரப்படுகிறது.

கடந்த 11 ஆண்டுகளாக, குறுகிய தூர மற்றும் புறநகர் ரயில்களின் கட்டணம் உயர்த்தப்படவே இல்லை. இத்தகைய ரயில்கள் மூலம் ஆண்டுதோறும் டிக்கெட் கட்டணமாக 7 சதவீத வருவாய் மட்டுமே கிடைக்கிறது. சுமார் 60 சதவீத, அதாவது ஆண்டுக்கு ரூ.26,000 கோடியை ரயில்வே துறை மானியமாக வழங்கி வருகிறது. ரயில்வே துறை நஷ்டத்தில் இயங்குவதற்கு இதுவும் காரணமாக உள்ளது. இது குறித்து ரயில்வே வாரியத் தலைவர் அருனேந்திர குமார் நேற்று அளித்த பேட்டியில், ‘புறநகர் ரயில்களின் சீசன் டிக்கெட் கட்டணம் இரு மடங்காக உயர்த்தப்பட்டுள்ளது. ஆனால், 50 சதவீத மானியமும் சேர்க்கப்பட்டுள்ளது தெரியவில்லை.

மானியங்களை குறைத்தாலே பல ஆயிரம் கோடி நஷ்டத்தை தவிர்க்கலாம். அதே போல, டீசல் விலையையும் குறைத்தால், ரயில் கட்டணத்தை உயர்த்த வேண்டிய அவசியமே இருக்காது‘ என யோசனை தெரிவித்துள்ளார். இந்த யோசனையை பின்பற்றி, ரயில் கட்டண உயர்வு வாபஸ் பெறப்படுமா என்ற எதிர்பார்ப்பு தற்போது நிலவுகிறது.

வாபஸ் பெற்றால் சந்தோசம்தான், அதே சமயம் டீசல், பெட்ரோல் விலையை கொஞ்சம் சரி செய்யணுமே.