ஊழல்... போராட்டம்... உலகக் கோப்பை!!

தென் அமெரிக்கக் கண்டம் மற்றும் லத்தீன் அமெரிக்கா பிராந்தியத்திலேயே மிகப் பெரிய நாடு பிரேசில். சோறு சாப்பிடுகிறார்களோ இல்லையோ... ஃபுட்பால் விளையாடுவார்கள். இதுவரை ஐந்து முறை உலகக் கோப்பையைத் தக்கவைத்து வலுவான அணியைக்கொண்ட தேசம் இது. ஃபிஃபா எனப்படும் Fédération Internationale de Football Association  உலகக் கால்பந்து சம்மேளனம் இந்த ஆண்டு பிரேசிலில் கால்பந்தாட்டப் போட்டிகளை நடத்துகிறது. நான்கு ஆண்டுகளுக்கு ஒருமுறை நடக்கும் இந்தப் போட்டியை இந்த முறை பிரேசில் ஏற்று நடத்துகிறது. 32 நாடுகள் மோதும் இந்தப் போட்டிகள், பிரேசிலின் 12 நகரங்களில் நடைபெறுகிறது. ஒரு மாதத்துக்கு முன்பிருந்தே கால்பந்துதான் பிரேசிலின் பெருமை என்பதுபோல் தீம் மியூஸிக் மற்றும் விளம்பரங்கள் அணிவகுத்தன. தெருவெங்கும் சம்பா நடன மங்கைகள், ஃபுட்பால் பதாகைகள் தாங்கிய ஆடைகளுடன் கிளுகிளுப்பாய் நடனமாடி உலகக் கோப்பைப் போட்டிகளை வரவேற்றார்கள். ஆனால், இதன் மறுபுறத்தில் போராட்டமும் ஆர்ப்பாட்டமும்தான் இப்போது ஃபிஃபா எதிர்ப்புக்காரர்களின் தீம் மியூஸிக்.
 போட்டி ஆரம்பித்த ஜூன் 12-ம் தேதி விளம்பரத்தில் வந்த குழந்தைகளுக்குப் போதிய உணவில்லை என்றும் சம்பா நடனமாடிய மங்கைகள் தங்களுக்குப் போதுமான ஊதியம் அளிக்கப்படவில்லை என்றும் போராட்டத்தில் குதித்தது தனிக்கதை. உள்ளூர் ஆட்டத்துக்கு மட்டுமே லாயக்கான அரங்குகளை வைத்துக்கொண்டு உலகக் கோப்பை நடத்த ஒப்புக்கொண்டது தவறு என உள்ளூர் அரசியல் எதிர்க்கட்சியினர் ஆளும் கட்சிக்கு எதிராகப் போர்க்கொடி தூக்க விவகாரம் விஸ்வரூபமானது. போதாக்குறைக்கு அவசர அடியில் கட்டப்பட்ட பல ஸ்டேடியங்களின் கட்டுமானப் பணியின்போது விபத்துகள் ஏற்பட, பல அப்பாவி உயிர்கள் பறிபோன விவகாரமும் சேர்ந்துள்ளது.



அடுத்து 2018 உலகக் கோப்பைப் போட்டிகளை ரஷ்யா நடத்துகிறது. அதற்கு அடுத்த போட்டியானது மத்தியக்கிழக்கு நாடான கத்தாரில் 2022-ல் நடக்கிறது. அதற்கு இப்போதே ஃபிஃபாவுக்கு எதிராகக் கண்டனக் குரல்கள் கேட்க ஆரம்பித்துள்ளன. 50 டிகிரி சென்டிகிரேடுக்கும் அதிகமான வெப்பநிலை உள்ள ஒரு தேசத்தில் முதன்முறையாக போட்டிகளை நடத்த கோடிகளை லவட்டி உள்ளது என குற்றச்சாட்டு எழுந்துள்ளது. ஜூரிச்சை தலைமையிடமாகக்கொண்ட ஃபிஃபா, பணம் பதுக்கும் இடமான சுவிட்சர்லாந்தின் நிதித் துறை விதிமுறைகளைக் கையில் எடுத்துக்கொண்டு பணத்தை வகைதொகையில்லாமல் தங்கள் சொந்தச் செலவுகளுக்குப் பயன்படுத்திய விவகாரமும்  வெளிச்சத்துக்கு வந்துள்ளது. முன்னாள் ஃபிஃபா பிரசிடென்ட் ஹாவெலாங்கே தற்போதைய பிரசிடென்ட்டான செப் பிளாட்டருக்கு எதிராகக் களம் இறங்கி உள்ளார்.
'2002-லிருந்து தொடர்ந்து எப்படி ஒருவரே தலைமைப் பொறுப்பில் இருக்க முடியும்?’ என்ற நியாயமான கேள்வியை முன்வைக்கிறார் அவர். ஃபிஃபா கூட்டமைப்பில் இருக்கும் சிறுநாடுகளின் பிரதிநிதிகளைக் கைக்குள் போட்டுக்கொண்டு கண்துடைப்பாக வெளிஉலகத்துக்குத் தேர்தல் நடத்தி தொடர்ந்து ஒருவரே பிரசிடென்ட்டாகவும் குறிப்பிட்ட சிலரே உறுப்பினர்களாகவும் இருந்துள்ளார்கள். மொத்தத்தில் ஃபிஃபாவால் தற்போது நடத்தப்படும் உலகக் கோப்பை என்பதே பெரும் வியாபாரம் என்கிறார்கள்.



ஸ்டேடியத்துக்காக அப்பாவி மக்களின் நிலங்கள் கையகப்படுத்தப்பட்டு ஒரே நாளில் ஆதரவற்றவர்கள் ஆக்கப்பட்டார்கள். மீடியாக்களின் உதவியால் மெள்ள வெளிச்சத்துக்கு வந்திருக்கும் இந்த விவகாரத்தால் ஃபிஃபாவுக்குக் கடுமையான கட்டுப்பாடுகளை விதிக்க வேண்டும் என பல அமைப்புகள் போர்க்கொடி தூக்கி உள்ளன.

[thanks]- ஆர்.சரண்
விகடன்![/thanks]