மோட்டார் சைக்கிள் பந்தயத்தில் கலக்கும் ஒர்க்ஷாப் தொழிலாளி..!

திருநெல்வேலி : நெல்லையை சேர்ந்த இளைஞர் மோட்டார் சைக்கிள் பந்தயங்களில் வெற்றிபெற்று சாதனைகளை எதிர்நோக்கியிருக்கிறார்.

திருநெல்வேலி மாவட்டம் வள்ளியூரை அடுத்துள்ள நந்தகோபாலசமுத்திரத்தை சேர்ந்தவர் திரவியம், அன்னக்கொடி தம்பதியின் மூன்றாவது மகன் ராமகிருஷ்ணன். கன்கார்டியா பள்ளியில் எட்டாம் வகுப்பு வரை படித்தவர். குடும்ப சூழல் காரணமாக, பெற்றோரின் குடும்ப சுமையை பங்குபோட்டுக்கொள்ள தமது 14 வயதிலேயே வள்ளியூரில் மோட்டார் சைக்கிள் ஒர்க்ஷாப்பில் வேலைக்கு சேர்ந்தார். வழக்கமாக இதுபோல வேலையை கற்றுக்கொள்பவர்கள், புதிதாக பக்கத்திலேயே இடம் பார்த்து இன்னொரு ஒர்க்ஷாப் வைப்பதில்தான் குறியாக இருப்பார்கள். ஆனால் ராமகிருஷ்ணனோ, மோட்டார் சைக்கிளின் தொழில்நுட்பத்தை ஆர்வமாக கற்றுக்கொண்டதோடு அதனை வேகமாகவும் லாவகமாக ஓட்டக்கற்றுக்கொண்டார். அவரது ஆர்வம் காரணமாக இன்றைக்கு தேசிய அளவிலான மோட்டார் சைக்கிள் பந்தயங்களில் பங்கெடுத்து பரிசுகள் பெற்றுவருகிறார். கடந்த மார்ச் மாதம், கோவையில் நடந்த இந்திய அளவிலான ஐஎம்எல் மோட்டார் சைக்கிள் பந்தயத்தில் 130 சிசி பிரிவில் மூன்றாவது இடம் பிடித்தார். முறையாக பயிற்சி எடுத்துக்கொள்ளாமல் தாம் பங்கேற்ற முதல்போட்டியிலேயே மூன்றாம் இடம் பிடித்து சாதனை படைத்தார். தொடர்ந்து பந்தய நுட்பங்களை கற்றுத்தேரும் ராமகிருஷ்ணன் வரும் ஜூலை ஆறாம் தேதி ஆறாம் தேதி முதல் மூன்று நாட்கள் சென்னையில் நடக்கும் எப்எம்எஸ்சிஐ அகில இந்திய அளவிலான போட்டியில் பங்கு பெற தேர்வு செய்யப்பட்டுள்ளார். வழக்கமாக மோட்டார் சைக்கிள் பந்தயங்களில் பங்கேற்க வருபவர்கள் பணக்கார வீட்டு வாரிசுகளாகவும், பொழுதுபோக்கிற்காகவும் பங்கேற்கிறார்கள். பயிற்சிக்காகவும் தங்களது வண்டிகளை தயார் செய்யவும் லட்சக்கணக்கில் செலவு செய்கிறார்கள். ஆனால் ராமகிருஷ்ணனுக்கு அத்தகைய வசதியில்லை. சென்னையில் போட்டி நடக்கும் டிராக் வளாகத்திலேயே தங்கியிருந்து பயிற்சிபெற்றுவருகிறார்.

இதுகுறித்து அவர் கூறுகையில், பெரிய அளவில் படிப்பறிவு இல்லை. இருப்பினும் பைக் ரேசில் சாதிக்கவேண்டும் என்ற ஆர்வம் இருந்தது. இதற்காக சில நண்பர்களின் உதவியோடு சென்னை சென்றேன். முதல் போட்டியிலேயே சாதித்தேன். ஸ்பார்க் ரேஸிங் என்ற அமைப்பின் சார்பில் பங்கேற்கிறேன். சென்னையில் வசிப்பவர்கள், எளிதாக பயிற்சி பெற முடியும். நான் ஒவ்வொரு போட்டிக்கு முன்னதாகவும் பயிற்சி எடுத்துக்கொள்ள நெல்லையில் இருந்து சென்று வர ஆயிரக்கணக்கில் செலவாகிறது. வெற்றிபெற்றவர்களுக்கு அடுத்தடுத்து நிலைகளுக்கு கொண்டுசெல்ல ஸ்பான்ஷர்ஷிப் கிடைக்கிறது. ஆனால் நான் அதற்கு முயற்சிக்கவில்லை. இருப்பினும் நடக்க இருக்கும் போட்டிகளில் சாதிப்பேன் என்ற நம்பிக்கை இருக்கிறது என்றார். கோவையில் இவர் வெற்றிக்கோப்பையோடு திரும்பியதை பார்த்த ஒரு திருநெல்வேலி தொழிலதிபர், நீ நம்மூராடே..பரவாயில்லையே மக்கா..நல்லா பயிற்சி எடுத்திருக்கிறாயே என பாராட்டினாராம். நெல்லையில் மோட்டார் சைக்கிள் ரேஸ் குறித்த புரிதலோ, பயிற்சிக்கான களமோ இல்லாத நிலையில் பயிற்சிக்காக சென்னை சென்றுவருகிறேன் என்றார்.

நெல்லை வள்ளியூரில் தமது மோட்டார் சைக்கிள் ஒர்க்ஷாப் தொழிலையும் பார்த்துக்கொண்டு தமது 24 வயதில், தேசிய அளவில், சர்வதேசஅளவில் சாதிக்க துடிக்கும் ராமகிருஷ்ணனுக்கு நீங்களும் உத்வேகமளிக்க நினைத்தால் 9994961028 என்ற எண்ணில் பகிரலாமே..!

தினமலர்..