இப்படியும் ஒரு 'திரில்' அனுபவம்!

காற்று வாங்க, தண்ணீரில் நிற்க, அலைகளுக்கு நடுவே புகுந்து விளையாட, நீச்சலடிக்க போன்றவற்றுக்கு தானே நாம் கடற்கரைக்கு செல்வோம். ஆனால், டச்சு நாட்டு கடற்பகுதியில் உள்ள காரபியன் தீவுகளில் ஒன்றான செயின்ட் மார்டென் என்ற கடற்கரையை ஒட்டிய பகுதிவாழ் மக்கள், தாழ்வாக பறக்கும் விமானத்தின் கீழ் நிற்கவே விரும்புகின்றனர்.

செயின்ட் மார்டென் தீவை ஒட்டி, ஜூலியானா சர்வதேச விமான நிலையம் உள்ளது. விமானத்தின் ஓடுபாதை, 2,300 மீட்டர் நீளமுள்ளது. விமான நிலையத்தில் விமானம் இறங்கும்போதும், மேலே எழும் போதும், அவை இக்கடற்கரையை மிகக்குறைந்த உயரத்தில், கடந்து செல்லும்.

விமானம் செல்வதால் எழும் காற்று, கடற்கரையில் உள்ள மக்களில் சிலரை நிலை குலைய செய்துவிடும்; சத்தம், காதுகளை செவிடாக்கும். ஆனால், இங்கு வரும் மக்கள், அதைப் பற்றி கவலைப்படுவதில்லை. 'விமான காற்று எப்படி நம்மை தூக்கி எறிகிறது பார்ப்போம்...' என்று, அங்கேயே நிற்பர்.இங்குள்ள ஓட்டல்களில், விமானங்கள் வந்து செல்லும் நேரங்களை போர்டுகளில் எழுதி வைக்கின்றனர் என்றால் பார்த்துக் கொள்ளுங்கள்.



இந்த அறிவிப்பை பார்த்து, விமானம் வந்து செல்லும் நேரத்துக்கு சரியாக கடற்கரையில் கூடி விடுவர் மக்கள்.
விமான நிலையத்தில் விமானம் நிற்கும்போது, எப்படி அதன் முழு நீளத்தையும், கம்பீரத்தையும் ரசிக்க முடியுமோ, அதேபோல், கடற்கரையில் நின்றும் முழுமையாக ரசிக்கலாம்.

விமான நிலைய எல்லை வேலி, கடற்கரையை ஒட்டி அமைந்துள்ளதால், விமானம் கிளம்பும் போது எழும் காற்று, அங்கு நிற்பவர்களை கடலில் தூக்கி எறிந்து விடும் அபாயம் உள்ளது. இதனால், உடலில் காயமும், சில சமயம் மரணம் கூட நேரலாம் என, எச்சரிக்கை அறிவிப்பும் வைத்துள்ளனர்.

இந்த அறிவிப்பு பற்றியெல்லாம் கவலைப்படாமல், பலர் வேலி அருகிலேயே துணிந்து நிற்பர். இதனால், விமான நிலைய அதிகாரிகள் தற்போது, மேலும் ஒரு வேலியை அமைத்துள்ளனர்.இருந்தாலும், கிளம்பும் விமானத்தின் காற்றின் சீற்றத்தை எதிர்கொள்ள, மக்கள் தொடர்ந்து வருகின்றனர்.இதுதவிர, கடற்கரை ஓரம் அலைகளின் ஏற்ற இறக்கத்திற்கு ஏற்ப, பல விளையாட்டுகளில் ஈடுபடுவோரும் உள்ளனர்