இந்திய வேளாண் விஞ்ஞானி சஞ்சய் ராஜாராமுக்கு சர்வதேச விருது

உலகில் வாழும் மக்கள் அனைவருக்கும் ஊட்டச்சத்துடன் நிலையான உணவு வழங்கப்படுவதன் முக்கியத்துவத்தை உணர்ந்து செயல்படும் நபர்களை கண்டறிந்து, அவர்களுக்கு உலக உணவு தினமான அக்டோபர் 16-ந் தேதி, 'சர்வதேச விருது' வழங்கி அமெரிக்காவில் இயங்கி வரும் உலக உணவு பரிசு நிறுவனம் கவுரவித்து வருகிறது.

அதன்படி, இந்த ஆண்டு கோதுமை உற்பத்தியில் புரட்சியை ஏற்படுத்திய இந்தியாவை சேர்ந்த வேளாண் விஞ்ஞானி சஞ்சய் ராஜாராம் விருதுக்காக தேர்ந்தெடுக்கப்பட்டுள்ளார்.

இதுதொடர்பாக உலக உணவு விருதை தேர்ந்தெடுக்கும் குழுவின் தலைவரும், உலகின் சர்வதேச உணவு விருதினை 1987-ம் ஆண்டு முதல் முறையாக பெற்றவரும், சென்னை தரமணியில் அமைந்துள்ள எம்.எஸ்.சுவாமிநாதன் ஆராய்ச்சி நிறுவனத்தின் தலைவருமான எம்.எஸ்.சுவாமிநாதன் சென்னையில் நேற்று நிருபர்களிடம் கூறியதாவது:-

இந்தியாவை சேர்ந்த வேளாண் விஞ்ஞானி சஞ்சய் ராஜாராமுக்கு சர்வதேச உணவு விருது கிடைத்திருப்பதை எண்ணி இந்தியர்கள் அனைவரும் பெருமிதம் கொள்ள வேண்டும்.

சஞ்சய் ராஜாராம், கோதுமைப் பயிரில் சுமார் 480 புதிய வகைகளை உருவாக்கியதில் பெரும்பங்காற்றியவர். அவரால் உருவாக்கப்பட்ட பயிர் ரகங்கள் உலகின் 51 நாடுகளில், 58 மில்லியன் 'ஹெக்டேர்' பரப்பில் வளர்க்கப்பட்டு வருகிறது.

இந்திய அளவில் மட்டுமின்றி உலக அளவில் வேளாண் துறையில் புகழ் பெற்ற சஞ்சய் ராஜாராம், 'கோதுமை மற்றும் மக்காச்சோளத்தின் சர்வதேச மேம்பாட்டு மையத்தின்' முன்னோடியாக திகழ்கிறார்.

வேளாண்மை துறையில் தலைமைத்துவத்திற்கான 'டாக்டர் எம்.எஸ். சுவாமிநாதன் விருது', சஞ்சய் ராஜாராமுக்கு 2010-ம் ஆண்டு வேளாண்மை அறிவியல் முன்னேற்ற நிறுவனத்தால் வழங்கப்பட்டது.

ஐக்கிய நாடுகள் சபையின் சார்பில் அக்டோபர் 16-ந் தேதி கொண்டாடப்படும், உலக உணவு தின விழாவில் சஞ்சய் ராஜாராமுக்கு உலக உணவு விருது வழங்கப்பட உள்ளது.

இவ்வாறு எம்.எஸ்.சுவாமிநாதன் கூறினார்.

சர்வதேச உணவு விருதுக்கு தேர்ந்தெடுக்கப்பட்டுள்ள சஞ்சய் ராஜாராம் 1943-ம் ஆண்டு உத்தரபிரேத மாநிலம் வாரணாசியில் பிறந்தார். ஆஸ்திரேலியாவில் உள்ள சிட்னி பல்கலைக்கழகத்தில் டாக்டர் பட்டம் பெற்றவர்.

வேளாண்மை துறையில் 400 ஆராய்ச்சி கட்டுரைகளை வெளியிட்டுள்ளார். இந்தியாவில் பிறந்த சஞ்சய் ராஜாராம் தற்போது மெக்சிகோ நாட்டில் குடியுரிமை பெற்று வசித்து வருகிறார். சஞ்சய் ராஜாராமுக்கு விருதுடன் 2½ லட்சம் அமெரிக்க டாலர் (இந்திய ரூபாய் மதிப்பின்படி ரூ.1½ கோடி) வழங்கப்பட உள்ளது.

சஞ்சய் ராஜாராமுக்கு 'உலக உணவு விருது' வழங்கப்படுவது குறித்த அதிகாரபூர்வ தகவலை அமெரிக்காவின் மாநில துறை செயலாளர் ஜான் கேரி, 'உலக உணவு பரிசு' நிறுவனத்தின் தலைவர் கேன்த் எம்.கியூன் ஆகியோர் நேற்றிரவு 9.30 மணிக்கு (அமெரிக்க நேரப்படி பகல் 11 மணி) அறிவித்தனர்.