ஈராக்கில் பயங்கரவாதிகள் மீது தாக்குதல் நடத்துக: ஒபாமாவுக்கு நெருக்கடி

நியூயார்க்: ஈராக்கில், அல் குவைதா ஆதரவு பயங்கரவாதிகளின் வெறியாட்டம் அதிகரித்துள்ளதாலும், அவர்களின் பிடியில், தலைநகர் பாக்தாத் எந்த நேரமும் வீழலாம் என, எதிர்பார்க்கப்படுவதாலும், ஈராக் மீது அமெரிக்க படையெடுத்து, பயங்கரவாதிகளை ஒடுக்க வேண்டும் என்ற குரல் அமெரிக்காவில் வலுத்துள்ளது.

ஈராக்கில், அமெரிக்காவுக்கு எதிராக பேரழிவு ஆயுதங்கள் தயாரிக்கப்படுவதாக கூறி, கடந்த 2003ல், அந்நாட்டின் மீது தாக்குதல் நடத்திய அமெரிக்கா, அதிபராக இருந்த சதாம் உசேனை பதவியிலிருந்து இறக்கியதுடன், அந்நாட்டு இடைக்கால அரசால், சதாம் உசேனை தூக்கிலிடவும் செய்தது. எட்டு ஆண்டுகளுக்கு பிறகு, 2011ல், ஈராக்கில் இருந்து அமெரிக்க ராணுவம் வெளியேறியது. ஈராக்கில், அமெரிக்க படைகள் இருந்த காலகட்டத்தில், 4,500 அமெரிக்க வீரர்கள் கொல்லப்பட்டதால், மீண்டும் ஈராக்கிற்கு படைகளை அனுப்ப, அதிபர் பராக் ஒபாமா தயங்குகிறார். ஆனால், ஈராக்கில் நாளுக்கு நாள் நிலைமை மோசமாகிக் கொண்டே வருகிறது. மொசூல், திக்ரித் போன்ற முக்கிய நகரங்களை பயங்கரவாதிகள் கைப்பற்றியுள்ளனர். தலைநகர் பாக்தாத்தை அவர்கள் நெருங்கி வருகின்றனர்.

அல் குவைதா ஆதரவு, ஐ.எஸ்.ஐ.எஸ்., பயங்கரவாதிகளின் வெறியாட்டத்தில், ஆளும் ஷியா பிரிவு முஸ்லிம்களும், அவர்களுக்கு ஆதரவாக பாதுகாப்பு படையினரும் கொத்து கொத்தாக கொல்லப்படுகின்றனர். கடந்த வாரத்தில் மட்டும், 1,700 ஈராக் சன்னி போலீசாரை சுட்டுக் கொன்றதாக கூறும் பயங்கரவாதிகள், அவர்களின் இணையதளங்களில், அந்த கொடூர காட்சிகளை ஏற்றி, உலக நாடுகளையும், மக்களையும் கதிகலங்கச் செய்துள்ளனர்.

வரிசையாக தரையில் படுக்க வைக்கப்பட்டுள்ள ஈராக் போலீசாரின் பின்புறம் நிற்கும் பயங்கரவாதிகள், தங்களின் இயந்திர துப்பாக்கிகளால், சுட்டுக் கொல்லும் காட்சிகள், இணையதளங்களில் உலா வருகின்றன. அது போல், சாலைகளில் ஆட்களை ஏற்றிச் சென்ற லாரிகளை மடக்கி, ஷியா பிரிவு முஸ்லிம்களைத் தேடி, அவர்களை வரிசையாக நிறுத்தி வைத்து சுட்டுக் கொல்லும் காட்சிகளும் இணையதளங்களில், பயங்கரவாதிகளால் ஏற்றப்பட்டுள்ளன.

தலைநகர் பாக்தாத்திலும் பல இடங்களில், கார் வெடிகுண்டு தாக்குதல் நடத்தும் பயங்கரவாதிகள், அந்த காட்சிகளையும் இணையத்தில் ஏற்றியுள்ளனர். இதனால், ஈராக்கின் இன்றைய நிலை, உலக நாடுகளுக்கு தெள்ளத் தெளிவாக தெரிவதால், உடனடியாக ராணுவ நடவடிக்கை எடுக்க வேண்டியது அவசியம் என்ற குரல் அமெரிக்காவில் வலுத்துள்ளது. எனவே, 'டிரோன்' எனப்படும் ஆளில்லா விமானங்கள் மீது, பயங்கரவாதிகள் மற்றும் அவர்கள் பிடியில் உள்ள இடங்கள் மீது குண்டுகளை வீசி தாக்குதல் நடத்தலாம் என, அமெரிக்கா முடிவு செய்துள்ளது. எனினும், இறுதியாக எந்த முடிவும் எடுக்காமல், அதிபர் ஒபாமா இழுத்தடித்து வருவதால், சன்னி பிரிவு பயங்கரவாதிகளின் பிடியில் சிக்கி, ஷியா முஸ்லிம்களும், அப்பிரிவு போலீசார்களும், கொத்து கொத்தாக கொல்லப்படுகின்றனர். இதற்கு அமெரிக்க வெளியுறவுத்துறை கடும் கண்டனம் தெரிவித்துள்ளது.

பாக்தாத்தில் உள்ள அமெரிக்க தூதரகத்திற்கு பாதுகாப்பு பலப்படுத்தப்பட்டுள்ளது. அங்குள்ள அதிகாரிகள் மற்றும் வீரர்கள், பிற நாடுகளின் தூதரகங்கள் மற்றும் பாதுகாப்பான இடங்களுக்கு அப்புறப்படுத்த, அமெரிக்கா உத்தரவிட்டுள்ளது.

தினமலர்

அமெரிக்காவில் சந்திக்க நேரிடும்!

ஈராக்கில் நிலைமை நாளுக்கு நாள் மோசமாகி வருகிறது; இதை, பார்த்துக் கொண்டிருக்கக் கூடாது. பயங்கரவாதிகளை நாம் ஈராக்கில் சந்திக்காவிட்டால், அவர்களை அமெரிக்காவில் எதிர்கொள்ள நேரிடும்.

- மைக் ரோஜர்ஸ், அமெரிக்க குடியரசு கட்சி எம்.பி.,


ஈராக்கும், சிரியாவும் சேர்ந்து, அமெரிக்காவுக்கு எதிராக, 2001ல் நடத்தியது போன்ற தாக்குதலை மீண்டும் நடத்த உள்ளன. அதை நாம் தடுக்காவிட்டால், அந்த பயங்கர சம்பவம் மீண்டும் நடைபெறும். பாக்தாத் வீழ்ந்தால், அடுத்த தாக்குதல் அமெரிக்கா மீது தான். எனவே, அமெரிக்கா, ஈராக் மீது ராணுவ நடவடிக்கை எடுக்க வேண்டும்.

-லிண்ட்சே கிரகாம், செனட் சபை எம்.பி.,


ஈராக்கிற்கு அமெரிக்க படைகளை அனுப்பாவிட்டாலும், விமான தாக்குதலை நடத்தலாம்; அதன் மூலம், ஈராக் அரசிற்கு உதவலாம்

-சுக் ஸ்மார், செனட் சபை எம்.பி.,

பயங்கரவாதிகள் கிண்டல்:

ஈராக்கின் ஷியா பிரிவு முஸ்லிம்கள், அந்தப் பிரிவு போலீசாரை சுட்டுக் கொல்லும் காட்சிகளை, இணையத்தில் ஏற்றியுள்ள, ஐ.எஸ்.ஐ.எஸ்., பயங்கரவாதிகள், அந்த காட்சிகளின் கீழ், கிண்டலாக வரிகளையும் சேர்த்துள்ளனர்.

பயங்கரவாதிகளின் பிடியில் சிக்கி விடக் கூடாது என்பதற்காக, போலீஸ் சீருடைக்கு மேலே, சாதாரண சட்டையை அணிந்துள்ள சுட்டுக் கொல்லப்பட்ட போலீஸ்காரர் பற்றி பயங்கரவாதிகள் குறிப்பிடுகையில், 'இவர்கள் சீருடையில் சிங்கம் போல இருந்தனர்; இப்போது நெருப்புக்கோழி போல தங்களை மறைத்துக் கொண்டுள்ளனர்' என, கிண்டலாக குறிப்பிட்டுள்ளனர்.

அது போல், மொத்தமாக சுட்டுக் கொல்வதற்காக, தலைக்கு மேல் கைகளை வைத்தபடி, குனிந்து நடந்து செல்லுமாறு உத்தரவிடப்பட்ட ஈராக் போலீசார் பற்றி, பயங்கரவாதிகள் குறிப்பிடுகையில், 'தங்கள் சொந்தக் கால்களால், மரணத்தை நோக்கி நடக்கின்றனர்' என, குறும்பாக எழுதியுள்ளனர்.