மாமல்லபுரம் அருகே வங்கி ஏ.டி.எம். மையத்தில் காவலாளி கழுத்தை அறுத்து படுகொலை

மாமல்லபுரம் அருகே வங்கி ஏ.டி.எம். மையத்தில் காவலாளி கழுத்தை அறுத்து படுகொலை செய்யப்பட்டார். கொள்ளையர்களால் ஏ.டி.எம். எந்திரத்தை உடைக்க முடியாததால் அதில் இருந்த பணம் தப்பியது.

ஏ.டி.எம். காவலாளி கொலை

சென்னை மாமல்லபுரம் அருகே கிழக்கு கடற்கரை சாலையில் கிருஷ்ணன்காரணை கிராமம் உள்ளது. இங்குள்ள சத்யசாய்பாபா கோவில் அருகில் ஐ.சி.ஐ.சி.ஐ. வங்கியின் நுழைவு வாயிலில் ஏ.டி.எம். மையம் உள்ளது.

இங்கு முருகன் (வயது 52) என்பவர் இரவு நேர காவலாளியாக வேலை பார்த்து வந்தார். நேற்றுமுன்தினம் இரவு சுமார் 12 மணி அளவில் காவலாளி முருகன், ஏ.டி..எம். மையத்தின் கதவை பூட்டினார். சாவியை தனது பாக்கெட்டில் வைத்துக் கொண்டு, ஏ.டி.எம். மையம் அருகே தரையில் படுத்து தூங்கிக் கொண்டிருந்தார்.

அப்போது அங்கு வந்த மர்ம ஆசாமிகள் முருகனை எழுப்பி, ஏ.டி.எம். கதவின் சாவியை கேட்டனர். ஆனால், அவர் சாவியை கொடுக்க மறுத்து கூச்சலிட்டார். இதனால் ஆத்திரம் அடைந்த கொள்ளையர்கள், மறைத்து வைத்திருந்த கத்தியை எடுத்து முருகனை கழுத்தை அறுத்து கொலை செய்தனர். இதில் ரத்த வெள்ளத்தில் அவர் பரிதாபமாக இறந்தார்.

ஏ.டி.எம். எந்திரத்தை உடைக்க முயற்சி

பின்னர் முருகனிடம் இருந்த சாவியை எடுத்து கொள்ளையர்கள் ஏ.டி.எம். கதவை திறந்து உள்ளே சென்றனர். பணத்தை கொள்ளையடிப்பதற்காக கையடக்க வெல்டிங் கருவியால் எந்திரத்திற்கு தீ வைத்து எரித்து உடைக்க முயன்றனர்.

ஆனால் எவ்வளவோ போராடியும் எந்திரத்தை உடைக்க முடியவில்லை. இதனால் கொள்ளையர்கள் ஏமாற்றத்துடன் அங்கிருந்து தப்பி ஓடி விட்டனர். சென்னை – புதுச்சேரி கிழக்கு கடற்கரை சாலையில் அமைந்துள்ள இந்த ஏ.டி.எம். மையத்தை அதிகஅளவில் வாடிக்கையாளர்கள் பயன்படுத்துவது வழக்கம். எனவே, இந்த ஏ.டி.எம். எந்திரத்தில் தினமும் ரூ.20 லட்சம் முதல் ரூ.25 லட்சம் வரை பணம் வைக்கப்படும். எந்திரத்தை கொள்ளையர்கள் உடைக்க முடியாததால் அதில் இருந்த பணம் தப்பியுள்ளது.

போலீஸ் சூப்பிரண்டு பார்வையிட்டார்

கிழக்கு கடற்கரை சாலையில் ரோந்துபணியில் ஈடுபடும் போலீசார், தினமும் நள்ளிரவு 1.30 மணி அளவில் ஏ.டி.எம். மையத்தை பார்வையிட்டு, பதிவேட்டில் கையெழுத்திட்டு செல்வது வழக்கம். இதேபோல் அங்கு ரோந்து வந்த போலீசார் ஏ.டி.எம். கதவு உடைக்கப்பட்டு இருப்பதையும், காவலாளி கொலை செய்யப்பட்டு கிடப்பதையும் கண்டு அதிர்ச்சி அடைந்தனர்.

உடனே இதுகுறித்து மாமல்லபுரம் போலீசாருக்கு தகவல் தெரிவித்தனர். சம்பவ இடத்திற்கு மாவட்ட போலீஸ் சூப்பிரண்டு விஜயகுமார், மாமல்லபுரம் டி.எஸ்.பி. மோகன், போலீஸ் இன்ஸ்பெக்டர் கோவிந்தராஜ் மற்றும் போலீசார் விரைந்து வந்து பார்வையிட்டனர். பின்னர் காவலாளி உடலை மீட்டு பிரேத பரிசோதனைக்காக செங்கல்பட்டு அரசு ஆஸ்பத்திரிக்கு அனுப்பி வைத்தனர்.

கேமராவில் பதிவான காட்சி

சம்பவ இடத்திற்கு காஞ்சீபுரத்தில் இருந்து மோப்ப நாய் உடனடியாக வரவழைக்கப்பட்டது. அது கொலை நடந்த இடத்தில் இருந்து கிழக்கு கடற்கரை சாலையில் 1,000 மீட்டர் தூரம் வரை ஓடிச்சென்றது. யாரையும் கவ்விப் பிடிக்கவில்லை. தனிப்படை போலீசார் மர்ம நபர்கள் பற்றிய தடயங்களை சேகரித்து வருகின்றனர்.

மேலும், ஏ.டி.எம். மையத்தில் பொருத்தி உள்ள கண்காணிப்பு கேமராவில் பதிவான காட்சிகளை பார்த்தால் தான், கொள்ளையர்கள் யார்? முகமூடி அணிந்து வந்தார்களா? வடமாநில கொள்ளையர்களா? என்பது தெரிய வரும் என்று போலீசார் தெரிவித்தனர்.

கடந்த சில மாதங்களுக்கு முன்பு திருப்போரூர் பகுதியில் உள்ள ஒரு ஏ.டி.எம். மையத்திலும் இதுபோன்ற கொள்ளை முயற்சி நடந்தது. அந்த கும்பலைச் சேர்ந்தவர்கள் இந்த வங்கியிலும் கைவரிசை காட்டினார்களா? என்ற கோணத்திலும் போலீசார் விசாரணையை முடுக்கி விட்டுள்ளனர்.

சாத்தான்குளத்தைச் சேர்ந்தவர்

கொலை செய்யப்பட்ட காவலாளி முருகன், தூத்துக்குடி மாவட்டம், சாத்தான்குளத்தைச் சேர்ந்தவர். இவருக்கு பாப்பா என்ற மனைவியும், 2 மகன்களும், 2 மகள்களும் உள்ளனர். கிருஷ்ணன்காரணையில் குடும்பத்துடன் வசித்து வந்தார்.

அங்கிருந்து தினமும் காவலாளி வேலைக்கு சென்று வந்துள்ளார். இவரது மகன் பிச்சுமணி ராஜன், இதே வங்கியின் மாமல்லபுரம் கிளையில் இரவு நேர காவலாளியாக வேலை பார்த்து வருகிறார்.

தினத்தந்தி