காவிரி விவகாரத்தில் ஜெயலலிதா அரசியல் நடத்துகிறார்: மத்திய அமைச்சர் அனந்த குமார்

'காவிரி மேலாண்மை வாரியம் அமைக்கும் விவகாரத்தில் தமிழக முதல்வர் ஜெயலலிதா அரசியல் நடத்துகிறார். இந்த விவகாரம் தொடர்பான மனுக்கள் உச்ச நீதிமன்றத்தில் நிலுவையில் இருக்கும் போது, அவர் பிரதமர் மோடிக்கு கடிதம் எழுதுவது அரசியல் உள்நோக்கம் கொண்டது என மத்திய ரசாயன மற்றும் உரத்துறை அமைச்சர் அனந்த குமார் தெரிவித்துள்ளார்.

காவிரி மேலாண்மை வாரியம் அமைக்க வேண்டும் என்று தமிழக முதல்வர் ஜெயலலிதா, பிரதமர் நரேந்திர மோடிக்கு கடிதம் எழுதியிருந்தார்.

அக்கடிதத்தில் காவிரி மேலாண்மை வாரியம் குறித்து மத்திய அமைச்சர்களான அனந்த குமார், வெங்கய்ய நாயுடு ஆகியோர் தெரிவித்த கருத்து பற்றி தமது அதிருப்தியையும் வெளிப்படுத்தி இருந்தார்.

இதுபற்றி மத்திய அமைச்சர் அனந்த குமார் பெங்களூரில் சனிக்கிழமை பேசுகையில், "காவிரி மேலாண்மை வாரிய விவகாரத்தில் தமிழக முதல்வர் ஜெயலலிதா அரசியல் நடத்துகிறார்.

இந்த விவகாரம் தொடர்பாக கர்நாடகாவும், தமிழ்நாடும் தாக்கல் செய்துள்ள பல மனுக்கள் உச்ச நீதிமன்றத்தில் நிலுவையில் இருக்கின்றன.

இந்நிலையில் உடனடியாக காவிரி மேலாண்மை வாரியம் அமைக்கும்படி பிரதமருக்கு அவர் கடிதம் எழுதி இருப்பது அரசியல் உள்நோக்கம் கொண்டதாக தெரிகிறது. காவிரி விவகாரத்தில் பிரச்சினையை ஏற்படுத்த ஜெயலலிதா தொடர்ந்து முயன்று வருகிறார்.

கர்நாடக அரசியல் கட்சிகளின் சார்பாகவும், கர்நாடகாவை சேர்ந்த மத்திய அமைச்சர்களின் சார்பாகவும் பிரதமர் மோடியை நேரடியாக சந்தித்து, காவிரி மேலாண்மை வாரியம் அமைக்கக் கூடாது என தெரிவித்திருக்கிறோம்.

மத்திய அரசு ஒருபோதும் கர்நாடகத்திற்கு எதிராக நடவடிக்கை எடுக்காது. அதனால் கர்நாடக மக்கள் ஜெயலலிதாவின் கடிதத்தை பொருட்படுத்த தேவையில்லை'' என்றார்.

சித்தராமையாவும் எதிர்ப்பு

காவிரி மேலாண்மை வாரிய விவகாரம் குறித்து கர்நாடக முதல்வர் சித்தராமையா பேசுகையில், “இந்த விவகாரம் தொடர்பான வழக்கில் கர்நாடக அரசு கவனம் செலுத்தும்.ஏற்கெனவே மோடியை சந்தித்து காவிரி குறித்த அனைத்து விவரங்களையும் கூறி இருக்கிறோம்.

எனவே அரசியல் உள்நோக் கத்துடன் தமிழக முதல்வர் ஜெயலலிதா பிரதமருக்கு கடிதம் எழுதுவதால் ஒன்றும் நடக்காது. காவிரி மேலாண்மை வாரியம் எப்போதும் அமைக்கப்பட‌ மாட்டாது'' என்றார்.

அரசியல்ல இதெல்லாம் சாதாரணம் தானே. அக்கா ஆட்சி எதுவும் நடக்கலாம்.

டாடிக்கிட்ட நாற்காலி இருந்தா லேடி எதிர்ப்பாங்க...
லேடிகிட்ட நாற்காலி இருந்தா டாடி எதிர்ப்பாரு...
இப்பத்தான் மோடி வந்துருக்காரு...இந்த காவேரி மேட்டர்ல மோடி எதுனா நல்லது நடக்குற மாதிரி வித்தைய காட்டுனா நல்லாருக்கும்...