இன்னும் இரண்டு நாட்களுக்கு 105 டிகிரி வெயில் கொளுத்தும்

சென்னை: தமிழகத்தில் இரண்டு நாட்களுக்கு வறண்ட வானிலை காணப்படும். அதைத் தொடர்ந்து வெயிலின் அளவு 105 டிகிரி பாரன்ஹீட் வரை உயரும் என்று சென்னை வானிலை ஆய்வு மையம் தெரிவித்துள்ளது. தமிழகத்தில் மே மாதத்துடன் கோடை காலம் முடிகிறது. அதில் 28 நாட்கள் கத்திரி வெயில் காலம் நிலவியது. அந்த நேரத்தில் அதிகபட்சமாக தமிழகத்தில் 110 டிகிரி வரை வெயில் சுட்டெரித்தது. இதனால் தமிழக மக்களின் இயல்பு வாழ்க்கை பாதிக்கப்பட்டது. ஜூன் மாதத்தில் தென் மேற்கு பருவமழை கேரளாவில் தொடங்குவது வழக்கம். இந்த ஆண்டு ஜூன் 5ம் தேதி தென் மேற்கு பருவமழை தொடங்கியது. அதனால் தொடர்ச்சியாக மழை பெய்யும் என்றும் தமிழகத்தில் வெயிலின் தாக்கம் குறையும் என்று எதிர்பார்க்கப்பட்டது.

அதற்கேற்ப கேரளாவில் தென் மேற்கு பருவமழை அதிக அளவில் பெய்யத் தொடங்கியது. இடையில் அரபிக் கடலில் குறைந்த காற்றழுத்த தாழ்வு நிலை ஒன்று கடந்த வார தொடக்கத்தில் உருவானது. அது மேலும் வலுப்பெற்றதால் கேரளாவில் தென் மேற்கு பருவமழை தீவிரம் அடையத் தொடங்கியது. கனமழையும் பெய்தது. இதனால் கேரளாவை ஒட்டிய தமிழக எல்லையிலும் மழை பெய்தது. இதனால் தமிழகத்தில் பரவலாக வெயிலின் தாக்கம் குறைந்தது. இந்நி லையில் அரபிக் கடலில் உருவான குறைந்த காற்றழுத்த தாழ்வு நிலை புயலாக மாறியதுடன் கேரளா, தமிழக கரைப் பகுதியில் இருந்த ஈரப்பதத்தையும் உறிஞ்சியது. மேலும் அந்த புயல் மேற்கு நோக்கி நகர்ந்து சென்று விட்டது. இதனால் கேரளாவில் பெய்ய வேண்டிய பெரும் மழை பெய்யாமல் போய்விட்டது.

அதற்கு பிறகு கடந்த 12ம் தேதி முதல் மழையின் அளவு அங்கு குறையத் தொடங்கியது. தமிழகத்திலும் மழை பெய்வது நின்றது. மேலும் கடல் பகுதியில் இருந்து வீச வேண்டிய குளிர் காற்று வீசாமல் போனதால் தரைக் காற்றின் வெப்பம் அதிகரிக்கத் தொடங்கியது. இதன்மூலம் மேலும் வெயிலின் தாக்கம் தலைதூக்கத் தொடங்கிவிட்டது. தமிழகத்தில் கடந்த இரண்டு நாட்களாக வெயிலின் தாக்கம் 100 டிகிரியை தாண்டியே இருந்தது. நேற்று அதிகபட்சமாக புதுச்சேரியில் 105 டிகிரி இருந்தது. சென்னை, மதுரை 104 டிகிரி, கடலூர், திருச்சி, தூத்துக்குடி 102 டிகிரி வெயில் நிலவியது.

மற்ற மாவட்டங்களில் சராசரியாக 100 டிகிரி என்ற அளவில் இருந்தது. இந்நிலையில் தென்மேற்கு பருவமழை பெய்வதற்கான சூழல் அரபிக் கடல் பகுதியில் ஏற்படவில்லை. இதனால் நேற்று கேரளாவில் பெரிதாக மழையேதும் பெய்யவில்லை. தமிழகத்தில் இன்றும் நாளையும் 105 டிகிரி அளவுக்கு வெயில் இருக்கும் என்று எதிர்பார்க்கப்படுகிறது.

ஆந்திராவில் வெயிலுக்கு 169 பேர் பலி

ஆந்திராவில் வெயில் கொளுத்துகிறது. இங்கு அதிபட்சமாக 43 டிகிரி முதல் 44 டிகிரி செல்சியஸ் வரை வெப்பம் நிலவி வருகிறது. அத்துடன் அனல் காற்றும் வீசுவதால் பொதுமக்களின் இயல்பு வாழ்க்கை பெரிதும் பாதிக்கப்பட்டுள்ளது. வெயில் மற்றும் அனல் காற்றுக்கு ஆந்திராவில் இதுவரை 169 பேர் பலியாகி உள்ளனர். அதிகபட்சமாக விசாகப்பட்டினம் மாவட்டத்தில் 45 பேர் இறந்துள்ளனர்.

வெயில் தாக்கி உயிரிழந்தவர்களின் குடும்பத்துக்கு, தலா ரூ.1 லட்சம் இழப்பீடு வழங்கப்படும் என முதல்-மந்திரி சந்திரபாபு நாயுடு அறிவித்துள்ளார்.