கால்சென்டரில் பணி நிரந்தரம் பெறுவதற்கு போலி பட்டம் வழங்கி மோசடி

சென்னை: பணி நிரந்தரம் பெற கால்சென்டர், கம்ப்யூட்டர் நிறுவனங்களில் டிகிரி படித்து இருக்க வேண்டும். அப்படி படிக்காதவர்களின் விவரங்களை சேகரித்து, நூற்றுகணக்கானோரிடம் பல லட்சம் ரூபாய் மோசடி செய்த ஈரோடு வாலிபர் கைது செய்யப்பட்டார். சென்னை போலீஸ் கமிஷனர் அலுவலகத்தில், பெரம்பூர் நெடுஞ்சாலை டெசி காலனியை சேர்ந்த சுனில் குமார் சிங் (28) என்பவர் புகார் மனு ஒன்றை அளித்தார். அதில், கூறப்பட்டுள்ளதாவது: நான் கம்ப்யூட்டர் நிறுவனம் ஒன்றில் பணி செய்து வந்தேன். என்னுடன் ஈரோடு கோபிசெட்டி பாளையத்தை சேர்ந்த கதிரேசன் (33) என்பவரும் பணி செய்து வந்தார். எங்களது நிறுவன விதிமுறைகளின்படி பணி நிரந்தரமாக, அங்கீகரிக்கப்பட்ட பல்கலைக் கழகத்தில் டிகிரி முடித்து இருக்க வேண்டும். நான் பட்டம் படிக்கவில்லை என்பதால், பணி நிரந்தரம் பெறவில்லை. எனவே, எனக்கு டிகிரி சான்றிதழ் தேவைப்பட்டது.

அப்போது, ஹைதராபாத்தில் இருக்கும் சிவக்குமார் என்பவர் மூலம் அங்கீகரிக்கப்பட்ட பல்கலை கழகத்தின் பட்டப்படிப்பு சான்றிதழ் வாங்கி தருவதாக கதிரேசன் கூறினார்.

இதற்கு ரூ.1 லட்சத்து 50 ஆயிரம் செலவாகும் என்று தெரிவித்தார். குறிப்பாக, அலகாபாத் பல்கலைக் கழகத்தின் 3 ஆண்டு பட்டப்படிப்பை, ஓர் ஆண்டில் தேர்வு எழுதி பட்டம் வாங்க வாய்ப்பிருப்பதாக சொன்னார். அதை நம்பி பி.சிஏ பட்டம் வாங்குவதற்கு ரூ.1 லட்சத்து 35 ஆயிரத்தை கதிரேசனிடம் கடந்த ஆண்டு கொடுத்தேன். இந்நிலையில் தனக்கு சம்பந்தப்பட்ட பல்கலைக் கழகத்தில் இருந்து சான்றிதழ் தரப்பட்டது. அதில், எனக்கு சந்தேகம் ஏற்பட்டது. எனவே, சம்பந்தப்பட்ட அலகாபாத் பல்கலை கழகத்தை தொடர்பு கொண்டு கேட்டபோது, தனக்கு கொடுக்கப்பட்டது போலியான சான்றிதழ் என தெரியவந்தது. என்னைப் போல் பலரும் கதிரேசனிடம் ஏமாந்துள்ளனர். எனவே, சம்பந்தப்பட்ட கதிரேசன் மீது நடவடிக்கை எடுக்க வேண்டும். பணத்தை திருப்பி பெற்றுத் தர வேண்டும். இவ்வாறு மனுவில் கூறப்பட்டு இருந்தது.

இதுகுறித்து, உரிய நடவடிக்கை எடுக்க போலீசாருக்கு கமிஷனர் ஜார்ஜ் உத்தரவிட்டார். தனிப்படையினர் நடத்திய விசாரணையில் கதிரேசன் இதுபோல் பலரிடம் பல லட்சம் ரூபாய் மோசடி செய்தது தெரிய வந்தது. இதைத் தொடர்ந்து அவரை போலீசார் நேற்று கைது செய்தனர். அவரிடம் இருந்து போலியான பட்டப்படிப்பு சான்றிதழ்கள், லேப்டாப், 3 செல்போன்கள் பறிமுதல் செய்யப்பட்டது. தொடர்ந்து கதிரேசனிடம் இதுவரை ஏமாந்துள்ளவர்களின் பட்டியலும் தயார் செய்யப்பட்டு வருகிறது. கதிரேசன் போலீசாரிடம் கூறியுள்ளதாவது: தனியார் கம்ப்யூட்டர் நிறுவனம் மற்றும் கால் சென்டர்களில், பட்டப்படிப்பு படித்து இருந்தால் மட்டுமே பணி நிரந்தரம் செய்யப்பட்டனர்.

இதை எனக்கு சாதகமாக முடிவு செய்தேன். எனவே, , கால்சென்டர்களில் பட்டப்படிப்பு பெறாமல் பணி செய்து வரும் நபர்களின் விபரங்களை சேகரித்தேன். அவர்களிடம் நேரடியாக சென்று உங்களுக்கு டிகிரி சான்றிதழ்களை குறுகிய காலக்கட்டத்தில் வாங்கி தருவதாகவும் கூறினேன். போலி சான்றிதழ்களை ஐதராபாத்தில் உள்ள எனது நண்பர் சிவக்குமார் மூலம் போலியாக தயார் செய்து கொடுத்தோம். இதற்காக ஒவ்வொரு சான்றிதழ்களுக்கும் தலா ரூ.50 ஆயிரம் முதல் ரூ.1 லட்சத்து 50 ஆயிரம் வரை வசூல் செய்தோம் என்று தங்களிடம் கதிரேசன் கூறியதாக போலீசார் தெரிவித்தனர்.