பெண்கள் உலக கோப்பை ஹாக்கியில் நெதர்லாந்து அணி வெற்றி

நெதர்லாந்து நாட்டில் நடைபெற்ற பெண்கள் ஹாக்கி உலக கோப்பை இறுதி போட்டியில் நெதர்லாந்து மற்றும் ஆஸ்திரேலிய அணிகள் மோதின. இந்த போட்டி கியோசெரா மைதானத்தில் நடந்தது. இதில், ஆஸ்திரேலிய அணியை 2-0 என்ற கோல் கணக்கில் வீழ்த்தி நெதர்லாந்து கோப்பையை கைப்பற்றி சென்றது.

ஆட்டத்தின் 12வது நிமிடத்தில் கிடைத்த பெனால்டி ஸ்டிரோக் வாய்ப்பை நெதர்லாந்து அணி கோலாக மாற்றியது. இதனை தொடர்ந்து 29வது நிமிடத்தில் தனக்கு கிடைத்த 2வது வாய்ப்பில் கோல் கீப்பர் ரேச்சல் லின்ச்சிடம் பந்து செல்லாமல் தான் அடித்த ஷாட்டை கோலாக்கினார் கிம் லேமர்ஸ். இதனால் 2-0 என்ற கோல் கணக்கில் நெதர்லாந்து அணி வெற்றி பெற்றது. உலக கோப்பை இறுதி போட்டியில் இந்த இரு நாடுகளும் மோதி கொள்வது இது 4வது முறையாகும். அவற்றில் 3 போட்டிகளில் நெதர்லாந்து அணி வெற்றி பெற்றுள்ளது.

கடந்த 1974ம் ஆண்டில் பெண்களுக்கான போட்டி சேர்க்கப்பட்டதில் இருந்து நடைபெற்ற 13 போட்டிகளில் நெதர்லாந்து அணி 7 போட்டிகளில் வெற்றி பெற்றுள்ளது. இதேபோன்று, ஆண்கள் இறுதி போட்டி இன்று நடைபெற உள்ளது. இதில் வெற்றி பெற்றால் ஆண்கள் மற்றும் பெண்கள் என இரு பிரிவினரும் சொந்த நாட்டில் ரசிகர்கள் முன்னிலையில் பட்டம் வென்ற அணியாக நெதர்லாந்து இருக்கும்.

கடந்த 1990ம் ஆண்டில் நடைபெற்ற உலக கோப்பை ஹாக்கி போட்டியில் ஆண் மற்றும் பெண் பிரிவில் நெதர்லாந்து அணி வெற்றி கோப்பையை தட்டி சென்றது. அந்த போட்டிகள் வேறு வேறு நாடுகளில் நடந்தன. கடந்த 1998ம் ஆண்டில் டச்சு நாட்டின் உட்ரெச்ட் நகரில் நடந்த போட்டியில் நெதர்லாந்து ஆண்கள் பிரிவு கோப்பையை வென்றது. ஆனால், பெண்கள் பிரிவு அணி ஆஸ்திரேலியாவிடம் தோல்வி அடைந்தது.