சுழலத் துவங்கியது மோடியின் சாட்டை

by **சிவா** Thu Jun 12, 2014 1:30 am

புதுடில்லி: நாட்டிற்கான வளர்ச்சியை முன்னிறுத்தி, பிரதமர் நரேந்திரமோடியால் தீட்டப்பட்ட திட்டங்களை அடிப்படையாக கொண்ட ஜனாதிபதியின் உரையை தொடர்ந்து, அத்திட்டங்களை செயல்படுத்துவதில் அனைத்து அமைச்சரகங்களும் மும்முரமாக இறங்கி உள்ளன.

நாட்டின் 16வது லோக்சபாவின் முதல் கூட்டத் தொடரில், இரு அவைகளின் கூட்டுக் கூட்டத்தில் ஜனாதிபதி பிரணாப் முகர்ஜி உரை நிகழ்த்தினார். இந்த உரை, மோடியின் வளர்ச்சி திட்டங்களை உள்ளடக்கியதாக இருந்தது. ஜனாதிபதியின் உரை வாசிக்கப்பட்ட சில மணி நேரங்களிலேயே, திட்டங்களை உடனடியாக செயல்படுத்த தேவையான நடவடிக்கைகளில் மத்திய அமைச்சரகங்கள் ஈடுபட்டுள்ளன. ஒவ்வொரு அமைச்சரகத்தையும் தொடர்பு கொண்ட பிரதமர் அலுவலகம், செயல்படுத்த உள்ள திட்டங்கள் குறித்த வரைவுகளை உடனடியாக தயார் செய்து, 24 மணி நேரத்தில் பிரதமர் அலுவலகத்திற்கு அனுப்பும்படி கூறி உள்ளது. எந்தெந்த திட்டங்களை முதலில் செயல்படுத்த வேண்டும், எந்தெந்த திட்டங்களுக்கு முன்னுரிமை கொடுக்க வேண்டும் என்ற குறிப்பும் பிரதமர் அலுவலகத்தால் கொடுக்கப்பட்டுள்ளது.

குடிநீர், சுகாதராம் முன்னுரிமை:

இதையடுத்து, திட்டங்களுக்கான வரைவுகளை தயார் செய்யும் பணியில் அமைச்சரகங்களின் அதிகாரிகள் முழுவீச்சில் ஈடுபட்டுள்ளனர். கடந்த திங்கட்கிழமை (9ம் தேதி) ஜனாதிபதி உரை நிகழ்த்தினார். செவ்வாய்கிழமை முதல் (10ம் தேதி) அமைச்சரகங்களில் உள்ள அதிகாரிகள் ரொம்பவும் 'பிசி' ஆகிவிட்டனர். உயர் அதிகாரிகள் கூட, நேரம் காலம் பார்க்காமல், திட்ட வரைவுகளை தயார் செய்து, தலைமை செயலர் மூலமாக பிரதமர் அலுவலகத்திற்கு அனுப்புவதில் குறியாக உள்ளனர். இது குறித்து உயர் அதிகாரி ஒருவர் கூறுகையில், 'புதிய அரசு சுத்தமான குடிநீர், முழு அளவிலான சுகாதாரம் உள்ளிட்ட சில திட்டங்களுக்கு முன்னுரிமை கொடுத்துள்ளது. இந்த திட்டங்களை மிக விரைவில் செயல்படுத்த வேண்டும் என பிரதமர் மோடி விரும்புவதால், அதற்கான பணிகள் வேகமாக நடந்து வருகின்றன,' என்றார்.

இந்த வகையில், நுகர்வோர் விவகாரத்துறை அமைச்சகம் மிகவும் பரபரப்பாக காணப்படுகிறது. முக்கிய உணவுப் பொருட்களின் இருப்பு; அவை பற்றாக்குறையாக உள்ள பகுதிகள்; தேவையான இடங்களுக்கு உடனடியாக எடுத்துச் செல்ல எடுக்க வேண்டிய நடவடிக்கைகள் ஆகியவை குறித்து அந்த அமைச்சரக அதிகாரிகள் மும்முரமாக ஆலோசனை நடத்தி வருகின்றனர். உணவுப் பொருட்கள், பற்றாக்குறையாக உள்ள பகுதிகளுக்கு உடனடியாக கொண்டு செல்லப்பட வேண்டும் என பிரதமர் விரும்புவதால், மற்ற அமைச்சரகங்களை காட்டிலும் இந்த அலுவலகம் தொடர்ந்து பணியாற்றி வருகிறது.

நகர்ப்புற மேலாண்மை, வீட்டு வசதி அமைச்சரகங்களும் சுறுசுறுப்பாக இயங்கி வருகின்றன. புதிதாக 100 நகரங்கள் உருவாக்கப்படும் என அறிவிக்கப்பட்டுள்ளதால், அவற்றிற்கான வரைபடங்களையும், வழிமுறைகளையும் இந்த அமைச்சரகம் தீவிரமாக ஆய்வு செய்து வருகிறது. அனைவருக்கும் வீடு என்ற தேசிய ஜனநாயக கூட்டணியின் திட்டத்தை அடிப்படையாக கொண்டு, தனியார் பங்களிப்புடன் வீடுகளை கட்டும் திட்டம் குறித்து இந்த அமைச்சரக அதிகாரிகள் ஆலோசனை நடத்தி வருகின்றனர்.

11 அம்சங்கள்:

மத்திய அமைச்சரகங்கள், அவற்றில் பணியாற்றும் அமைச்சர்கள் மற்றும் அதிகாரிகள் எவ்வாறு செயல்பட வேண்டும் என்று, பிரதமர் அலுவலகம் 11 அம்சங்களை கூறி உள்ளது. சுருக்கமான நடைமுறைகள், உடனடி முடிவு, செயல் திட்டம், திறனை பயன்படுத்தல்: விரைவான தீர்வு, கூட்டு முயற்சி, திட்ட நடைமுறை; பதிவேடு பராமரித்தல்; மக்கள் குறை கேட்டல்; மறுஆய்வு; குழப்பம் இல்லாத செயல்பாடு என்ற இந்த நடைமுறைகளை ஒவ்வொரு அமைச்சகமும் கண்டிப்பாக பின்பற்ற வேண்டும் என்று குறிப்பிடப்பட்டுள்ளது. மொத்தத்தில், இத்தனை நாட்களாக மக்கள் வளர்ச்சி திட்டங்களில் தூங்கிக் கொண்டிருந்த அமைச்சரகங்கள், பிரதமர் அலுவலகத்தின் அதிரடி கண்காணிப்பின் பலனாக முழுவீச்சில் செயல்பட துவங்கி உள்ளன என்பது குறிப்பிடத்தக்கது.

by பாலாஜி Thu Jun 12, 2014 12:17 pm

மத்திய அமைச்சரகங்கள், அவற்றில் பணியாற்றும் அமைச்சர்கள் மற்றும் அதிகாரிகள் எவ்வாறு செயல்பட வேண்டும் என்று, பிரதமர் அலுவலகம் 11 அம்சங்களை கூறி உள்ளது. சுருக்கமான நடைமுறைகள், உடனடி முடிவு, செயல் திட்டம், திறனை பயன்படுத்தல்: விரைவான தீர்வு, கூட்டு முயற்சி, திட்ட நடைமுறை; பதிவேடு பராமரித்தல்; மக்கள் குறை கேட்டல்; மறுஆய்வு; குழப்பம் இல்லாத செயல்பாடு என்ற இந்த நடைமுறைகளை ஒவ்வொரு அமைச்சகமும் கண்டிப்பாக பின்பற்ற வேண்டும் என்று குறிப்பிடப்பட்டுள்ளது. மொத்தத்தில், இத்தனை நாட்களாக மக்கள் வளர்ச்சி திட்டங்களில் தூங்கிக் கொண்டிருந்த அமைச்சரகங்கள், பிரதமர் அலுவலகத்தின் அதிரடி கண்காணிப்பின் பலனாக முழுவீச்சில் செயல்பட துவங்கி உள்ளன என்பது குறிப்பிடத்தக்கது. wrote: