வீடியோ கேம் : நல்லதா? கெட்டதா?

வீடியோ கேம் என்பது ஒரு காலத்தில் டிவிக்களிலும், வீடியோ கேம் விளையாட்டு சாதனங்களிலும் இருந்து வந்தது. இதனால், பெரிதாக யாருக்கும் பாதிப்பில்லை.

ஆனால், இப்போது வீடியோ கேம்கள் பலவும் செல்போன்களிலேயே வந்து விட்டதால் அதற்கு குழந்தைகளும் அடிமையாகிவிட்டனர்.

வீட்டில் பல மணி நேரம் ஒரே இடத்தில் அமர்ந்து கொண்டு வீடியோ கேம் விளையாடும் குழந்தைகளும் இருக்கத்தான் செய்கிறார்கள்.

இது நல்லதா கெட்டதா என்பதை யாரும் யோசிப்பதில்லை. இது குறித்து அலசியதில் இரு வேறு கருத்துகள் கிடைத்துள்ளன.

ஒன்று, வீடியோ கேம் விளையாடும் குழந்தைகளுக்கு புத்தி கூர்மையும், சிந்திக்கும் ஆற்றலும் அதிகரிப்பதாக ஆய்வு ஒன்று கூறுகிறது.

ஆஸ்திரேலியாவின் குயின்லேண்ட் யுனிவர்சிட்டி ஆப் டெக்னாலஜி மேற்கொண்ட ஆய்வில், குழந்தைகள் வீடியோ கேம் விளையாடுவதால் அவர்களின் சிந்திக்கும் திறன் மேம்படுவதாக தெரிவித்துள்ளது. மேலும் பெற்றோர்கள் குழந்தைகளுக்கு விளையாட உதவுவதாலும் கற்றுக் கொடுப்பதாலும் குடும்ப உறவு மேம்படுவதாக அந்த ஆய்வில் தெரிவிக்கப்பட்டுள்ளது.

இது இப்படியிருக்க, வீடியோ கேம்களுக்கு எதிராக கூறப்படும் விஷயம் என்னவென்றால், குழந்தைகளின் மூளை வளர்ச்சி என்பது முதல் மூன்று ஆண்டுகள் தான் அபரிமிதமாக இருக்கும். இந்த காலத்தில் குழந்தைகள் பல நல்ல விஷயங்களைப் படித்து அறிவாளிகளாக பிரகாசிக்க வேண்டும். ஆனால் அந்த நேரத்தை இந்த வீடியோ கேம்கள் விளையாடுவதன் மூலம் அறிவு வளர்ச்சி என்பதை இழக்க நேரிடுகிறது.

மேலும், பலரிடம் பேசுவதற்கும், பழகுவதற்கும் வாய்ப்பு கிட்டாமல் முடங்கிப் போவார்கள். ஒவ்வொரு பருவத்தின் அழகையும் அவர்களது பெற்றோரால் ரசிக்க முடியாது. அதாவது, அவர்கள் ஆடுவது, பாடுவது, தத்தி தத்தி நடப்பது, ஓடுவது போன்ற பல செய்கைகள் வீடியோ கேமால் தடை படுகிறது.

எனவே, வீடியோ கேமில் இருந்து நமது பிள்ளைகளை பாதுகாக்கும் பொறுப்பு நமக்கு உண்டு என்கிறது மற்றொரு சமூகம்.

எது எப்படி இருந்தாலும் வீடியோ கேமுக்குள் மூழ்கும் நமது பிள்ளைகளை பாதுகாக்க வேண்டும் என்று மட்டுமே சொல்கிறது பெற்றோர்களின் உள்ளுணர்வு.

//ஆஸ்திரேலியாவின் குயின்லேண்ட் யுனிவர்சிட்டி ஆப் டெக்னாலஜி மேற்கொண்ட ஆய்வில், குழந்தைகள் வீடியோ கேம் விளையாடுவதால் அவர்களின் சிந்திக்கும் திறன் மேம்படுவதாக தெரிவித்துள்ளது. மேலும் பெற்றோர்கள் குழந்தைகளுக்கு விளையாட உதவுவதாலும் கற்றுக் கொடுப்பதாலும் குடும்ப உறவு மேம்படுவதாக அந்த ஆய்வில் தெரிவிக்கப்பட்டுள்ளது.//

ரொம்ப சரி சிவா, எங்க கிருஷ்ணா கார் கேம் விளையாடுவான், அதில் லைசென்ஸ் வாங்குவது போல ஒரு விளையாட்டு , அதில் ரொம்ப கவனமாக விளையாடினால் தான் லைசென்ஸ் கிடைக்கும், வண்டியை ரொம்ப சரியாக 'பார்க்' பண்ணனும், 100 மீட்டரில் சரியாக நிறுத்தணும், என்பது  போல நிறைய கெடுபிடிகள். அதை விளையாடி விளையாடி நல்லா பழகிட்டதால், நிஜத்தில் ரொம்ப சுலபமாக டிரைவிங் லைசென்ஸ் வாங்கினான். road fear இல்லாமல், முதல்நாளே புது வண்டியை இங்கு பெங்களூரில் எடுத்தான், அவ்வளவு திறமையை அந்த விளையாட்டு கொடுக்கும்.

நாணயத்திற்கு இரண்டு  பக்கம் போல எதிலேயுமே  நல்லதும் இருக்கு கேட்டதும் இருக்கு. நாம் தான் நல்லதை மட்டும் எடுத்துக்கணும் மேலும் நீங்க ஒரு இங்கிலீஷ் படம் பார்த்திருக்கிங்களா? "Snakes  on  the  plane " என்று, அதில் play  station  விளையாடின ஒரு பையன் தான் கடைசி இல் பிளேனை ஜாக்கிரதையாக இறக்குவான்.

இதில் நல்லதும் உண்டு கெட்டதும் உண்டு.  ஜெயித்து விட்டால் வரும் மனநிலை தோற்கும்போது இருப்பதில்லை.  நாம் தோற்றுவிட்டோம் என்ற மனநிலை பாதிப்பை உண்டாக்கலாம்.  
அது விளையாட்டு என்று அறிந்த போதும், வெற்றி, தோல்வி சகஜம் என்று தெரிந்த போதும், தோற்று விட்டால் ஒரு இறுக்கமான மனநிலையில்தான் குழந்தைகள் உள்ளனர்.  

விளையாட்டை ஒரு பொழுது போக்காக சித்தரித்து, தோற்று விட்டால் இது போகட்டும் அடுத்த கேமில் பார்த்துக் கொள்ளலாம் என்று பெற்றோர் தட்டிக் கொடுக்க வேண்டும்.  தொலைக்காட்சி நாடகத்தை கண்டு கொண்டிருந்தால் வேலைக்கு ஆகாது.