உக்ரைன் ராணுவ விமானத்தை சுட்டு வீழ்த்திய போராளிகள்: 49 வீரர்கள் பலி

கடந்த ஆண்டு இறுதியில் ஐரோப்பிய ஒன்றியத்துடன் உக்ரைன் இணைவது தொடர்பாக அங்கு எழுந்த பிரச்சினைகள் இன்னும் முடிவுக்கு வரவில்லை. உக்ரைனின் கிழக்குப் பகுதியான கிரிமியா உலக நாடுகளின் பலத்த எதிர்ப்பிற்கிடையே ரஷ்யாவுடன் இணைந்தது. அதுபோல் இன்னும் சில கிழக்குப் பகுதிகள் ரஷ்யாவுடன் இணைய வேண்டி போராட்டத்தில் ஈடுபட்டுள்ளன.

போராளிகளின் கட்டுப்பாட்டிற்குள் இருக்கும் நகரங்களில் லுகான்ஸ்க்-கும் ஒன்றாகும். கடந்த ஏப்ரல் முதல் போராளிகளின் ஆதிக்கம் இங்கு அதிகரித்துள்ள போதிலும் உக்ரைன் அரசு அங்குள்ள விமான நிலையத்தை தங்களின் வசம் வைத்துக் கொண்டு போர்ப் பணியில் இருக்கும் அரசு துருப்புகளை சுழற்சி முறையில் மாற்றி விட இந்த நிலையத்தைப் பயன்படுத்திக் கொண்டு வருகின்றது.

இன்று அதிகாலை 40 படை வீரர்களையும், ஒன்பது ஊழியர்களும் கொண்ட உக்ரைன் அரசு ராணுவ விமானம் ஒன்று லுகான்ஸ்க் விமான நிலையத்தை நோக்கி வந்த போது போராளிகளால் சுட்டு வீழ்த்தப்பட்டது. இதில் பயணித்த அனைவருமே இறந்து விட்டதாக பயங்கரவாத எதிர்ப்பு நடவடிக்கையின் செய்தித் தொடர்பாளரான விளாடிஸ்லாவ் செலிஸ்நியோவ் குறிப்பிட்டார். ராணுவ தளவாடங்களும் இந்த விமானத்தில் கொண்டு வரப்பட்டதாகத் தகவல்கள் தெரிவிக்கின்றன.

போராளிகளின் ஆதிக்கத்தில் இருந்த முக்கிய துறைமுக நகரமான மரியுபோலை அரசுத் துருப்புகள் கைப்பற்றி ஒரு நாள் சென்ற நிலையில் நடந்துள்ள இந்த பேரிழப்பு கடந்த இரண்டு மாத கலவரங்களில் ஒரே நேரத்தில் ஏற்பட்ட மிகப்பெரிய இழப்பு என்று கூறப்படுகின்றது.

4,00,000 மக்கள் வசிக்கும் லுகான்ஸ்க் நகரில் இன்று காலை முதலே வெடிச்சத்தங்களும், கடும் சண்டை நடந்து கொண்டிருப்பதற்கான சத்தங்களும் கேட்டுக்கொண்டிருப்பதாக செய்தியாளர் ஒருவர் தெரிவித்துள்ளார்.

எங்கெங்கு காணினும் துப்பாக்கி சத்தம்
நாட்டை பங்கு போடும் யுத்தம்
என்று காண்போம் நிசப்தம்.