ஐதராபாத் இன்ஜி.,மாணவர்கள் 25பேர் பலி? சுற்றுலா சென்ற போது விபரீதம்

by **சிவா** Mon 9 Jun 2014 - 18:10

மணாலி: ஐதராபாத்தில் இருந்து இமாச்சல் பிரதேசம் சென்ற இன்ஜினியரிங் படிக்கும் மாணவர்கள் 25 பேர் ஆற்று வெள்ளத்தில் அடித்து இழுத்து செல்லப்பட்டனர். மந்தியில் இருந்து 40 கி.மீட்டர் தொலைவில் உள்ள பீஸ் நதியின் கரையில் ஒருசேர நின்று ரசித்து கொண்டிருந்தனர். தண்ணீர் கண்ட மகிழ்ச்சியில் சுற்றுலாவை இன்பமாக கழித்து கொண்டிருந்த போது இந்த கொடிய சம்பவம் நிகழ்ந்துள்ளது. ஆற்றில் சென்ற மாணவர்கள் உடல்கள் தேடும் பணி துரிதப்படுத்தப்பட்டுள்ளன. ஐதராபாத்தில் உள்ள வி.என்.ஆர்., விக்னன் ஜோதி இன்ஜினியரிங் கல்லூரியை சேர்ந்தவர்கள் இமாச்சல் பிரதேசததிற்கு 3 நாள் டூர் புறப்பட்டு சென்றனர். இங்குள்ள நதியில் சிலர் குளித்தபடியும், சிலர் நதியின் நீர் ஓட்டத்தை தங்களின் மொபைலில் படம் எடுத்தப்படியும் இருந்தனர். இந்நேரத்தில் ஹைட்ரோ பவருக்கென தண்ணீர் திறந்து விடப்பட்ட போது லார்ஜி அணையில் இருந்து ஆற்றில் தண்ணீர் படுவேகமாக அளவுக்கு அதிகமாக வந்தததால் இந்த மாணவர்கள் வெள்ளத்தில் இழுத்து செல்லப்பட்டனர். சில நிமிடத்திற்குள் அனைவரும் தண்ணீரில் மாயமாயினர்.

உரத்த குரலில் எச்சரித்தேன் : இந்த சம்பவத்தை நேரில் பார்த்த ஒரு மாணவன் ரவிக்குமார் நிருபர்களிடம் கூறுகையில், " அனைவரும் நதியில் மகிழ்ச்சியாக நின்று கொண்டிருந்தோம். திடீரென தண்ணீர் வெள்ளமாக வருவதை நான் பார்த்தேன், நண்பர்களிடம் உரத்த குரலில் எச்சரித்தேன். ஆனால் நதி நீர் வந்த ஒலியில் எனது குரல் யாருக்கும் கேட்காமல் போனது. 5 முதல் 6 நிமிடத்திற்குள் அனைவரும் தண்ணீரில் இழுத்து செல்லப்படுவதை பார்த்து என்னால் கதறத்தான் முடிந்தது. சிலரை காப்பாற்ற முயற்சித்தேன் பலன் எதுவும் கிடைக்கவில்லை” என்றார் கண்ணீருடன்.

6 மாணவிகளும் மாயம்: இந்த சம்பவத்தில் 6 மாணவிகளும், சுற்றுலா அழைத்து சென்ற டூர் மானேஜர் கிரன் என்பவரும் தண்ணீரில் இழுத்து செல்லப்பட்டார்.தண்ணீர் திறந்து விடும் போது எவ்வித எச்சரிக்கையும் விடுக்கப்படவில்லை என இந்த பகுதியை சேர்ந்தவர்கள் மாவட்ட நிர்வாகத்தை குறை கூறினர். இது குறித்து மாவட்ட மாஜிஸ்திரேட் கூறுகையில் உரிய அபாயச்சங்கு எழுப்பப்பட்டது. ஆனால் இதனை மாணவர்கள் என்ன என்பதை அவர்களால் புரிய முடியாமல் போனதுதான் துரதிருஷ்டம் என்றார்.

உள்துறை அமைச்சர் கவலை: இந்த சம்பவம் குறித்து உள்துறை அமைச்சர் ராஜ்நாத்சிங் தனது டுவீட்டரில் இந்த துயரச்சம்பவம் கேள்விப்பட்டு மிக துயரப்பட்டேன். வெள்ள நீரில் சிக்கியவர்களை மீட்கும் பணியை துரிதமாக நடத்த அதிகாரிகளை கேட்டுள்ளேன். இவ்வாறு அவர் கூறியுள்ளார்.

தினமலர்