இந்தியா - சீனா உறவு வலுப்பெறட்டும் ! ஒரு துளி மண்ணை விட மாட்டோம் !

இந்தியா- சீனா உறவு வலுப்படுத்தும் விதமாக இன்று முதல் கட்ட பேச்சு துவங்கியது. மத்தியில் மோடி அரசு பொறுப்பேற்றதும், வெளியுறவு துறை அமைச்சராக பதவிவகிக்கும் சுஷ்மாசுவராஜின் முதல் வெளிநாட்டு தூதர் சந்திப்பு சீனாவுடன் துவங்கிறது.

சீன அதிபர் ஷி ஜிங்பிங்கின் தூதுவராக அந்நாட்டு வெளியுறவு துறை அமைச்சர் வாங்க் இ டில்லி வந்தார். இவர் ஜனாதிபதி, பிரதமர், தேசிய பாதுகாப்பு ஆலோசகர் ஆகியோரையும் சந்தித்து பேசுவார் என எதிர்பார்க்கப்படுகிறது.

மத்தியில் புதிய ஆட்சி பொறுப்பேற்றதும் அண்டை நாடுகளுடன் எந்தமாதிரியான நடவடிக்கையில் இறங்கலாம் ? மேலும் இரு தரப்பு வர்த்தக ரீதியிலான உறவு மேம்படுத்துவது எப்படி உள்ளிட்ட விஷயங்களில் பிரதமர் மோடி முழுக்கவனம் செலுத்தி வருகிறார். இந்நிலையில் மத்திய வெளியுறவு துறை அமைச்சர் சுஷ்மாசுவராஜ் சீன தூதருடனான சந்திப்பு முக்கியத்துவம் பெறுகிறது.

சீனாவின் தூதராக வந்துள்ள வாங் இ நமது நாட்டு தலைவர்களுடன் முதல்கட்ட பேச்சை துவக்குவார். இதன் அடிப்படையில் வருகிற முன்னேற்பாடு விஷயங்களுடன் இந்திய தூதுக்குழு விரைவில் சீனா செல்லும் என இந்திய வெளியுறவு துறை செய்தி தொடர்பாளர் சையீது அக்பரூதீன் தெரிவித்தார். இதன் தொடர்ச்சியாக, இந்த ஆண்டு இறுதியில் சீன அதிபர் இந்தியாவிற்கு வர உள்ளதாக தகவல்கள் தெரிவிக்கின்றன.

வளர்ச்சி பாதை நோக்கி :

உலகில் சீனா இந்தியாவுடன் வர்த்தக ரீதியிலான மிக முக்கிய பங்காற்றி வருகிறது என்றும், சீனாவே இந்தியாவுடன் வர்த்தகம் செய்வதில் நம்பர் ஒன் என்று வெளியுறவு கொள்கை குறித்த ஆய்வாளரான ரஞ்சித் குப்தா கூறினார். அவர் மேலும் கூறுகையில், இன்றயை சீன தூதர் வருகை நல்ல அறிகுறியாக உள்ளது. இந்தியாவும், சீனாவும் உலக அளவில் பெரும் சக்தியாக விளங்கிட வளர்ந்து வரும் சூழல் ஏற்பட்டுள்ளது. இந்நேரத்தில் இரு நாட்டு உறவு முக்கியத்துவம் வாய்ந்ததாக உள்ளது. இரு நாட்டு ஒட்டு மொத்த வர்த்தகம் 70 பில்லியன் டாலராக உள்ளது. ஆனால் சீனா 40 பில்லியன் வரை வர்த்கம் செய்கிறது. இந்தியா இதனை விட மிக குறைவாகவே வர்த்தகம் செய்யும் நிலையில் உள்ளது. இது தவிர்க்கப்ப வேண்டும் . மேலும் வர்த்தகம் வளர வேண்டும். உறவுகள் வலுப்பெறும் போது மேலும் வர்த்தக ரீதியில் வளர்ச்சி பாதை நோக்கி செல்ல முடியும் என்றார்.

நம்புவோம் !:

1962 முதல் இந்தியா- சீனா இடையில் எல்லை விவகாரம் தொடர்ந்து இருந்து வருகிறது. அருணாசல்பிரதேசம், திபெத் எல்லை விவகாரம் தொடர்பாக முக்கிய பேச்சு இருக்கும். நடந்து முடிந்த தேர்தல் பிரசாரத்தில் பிரதமர் மோடி விடுத்த அறைகூவல் ஒன்று நினைவுக்கு வருகிறது. இந்தியாவில் ஒரு துளி மண்ணை கட யாருக்கும் விட்டுத்தர மாட்டோம் என்றார். இது செயல்பாட்டிலும் இருக்கும் என நம்புவோம் !

தினமலர்