ஹாக்கி : அன்னிய பயிற்சியாளர் அவசியமா: தன்ராஜ் பிள்ளை ஆவேசம்

மும்பை: ‘‘அன்னிய பயிற்சியாளர்களின் செயல்பாடு எவ்வகையிலும் அணிக்கு உதவவில்லை. இவர்களை நீக்க வேண்டும்,’’ என, இந்திய ஹாக்கி அணி முன்னாள் கேப்டன் தன்ராஜ் பிள்ளை தெரிவித்தார்.

நெதலர்நாந்தின் ஹேக்கில் உலக கோப்பை ஹாக்கி தொடர் நடக்கிறது. இதன் முதலிரண்டு (பெல்ஜியம், இங்கிலாந்து ) லீக் போட்டியில் இந்திய அணி தோல்வியடைந்தது. ஸ்பெயினுக்கு எதிராக ‘டிரா’ செய்தது. இனி வரும் போட்டியில் அதிக கோல் வித்தியாசத்தில் வென்றால் மட்டுமே அரையிறுதி வாய்ப்பு வசப்படும். வெளிநாட்டை சேர்ந்த அணியின் செயல்பாட்டு இயக்குநர் ரோலன்ட் ஆல்ட்மன்ட்ஸ், தலைமை பயிற்சியாளர் டெர்ரி வால்ஷின் செயல்பாடு சரியாக இல்லை என புகார் எழுந்துள்ளது.

இது குறித்து தன்ராஜ் பிள்ளை கூறியது: பெல்ஜியம் அணிக்கு எதிராகவே நாம் வீழ்ந்தோம். கடந்த 8 மாதமாக நமது அணியில் ஆல்ட்மன்ட்ஸ், டெர்ரி வால்ஷ் உள்ளனர். இவர்களின் செயல்பாடு எந்த வகையிலும் அணிக்கு உதவவில்லை. இந்திய பயிற்சியாளராக இருந்தால், போட்டியின்போது வீரர்களை எப்படி ஊக்கப்படுத்த வேண்டும் என்று தெரியும். வெளிநாட்டவரை பணியமர்த்த வேண்டும் என்ற மனோபாவம் மோசமானது.

‘லேப்டாப்’ முன்னால்:

கடந்த 2004 வரை நன்றாகத்தான் இருந்தோம். தற்போது களத்தில் இருப்பதை விட ‘லேப்டாப்’ முன் அமர்ந்துதான் விளையாட்டின் உத்தியை கண்டுபிடிக்கின்றனர். இவர்களுக்கு அதிக பணம் செலவழித்து கொண்டிருக்கிறோம். நமது முன்னாள் வீரர்கள் பலர், தங்களது பேரக்குழந்தைகளுடன் வீட்டிற்குள் ஹாக்கி விளையாடுகின்றனர். இவர்கள் பணமே வாங்காமல் கூட, அணிக்கு பணியாற்ற தயாராக உள்ளனர்.

ஹாக்கி இந்தியா லீக்கில் சந்தீப் சிங் அதிக கோல் அடித்தார். இவரை உலக கோப்பை தொடருக்கு சேர்த்திருக்க வேண்டும். இவரின் செயல்பாடு சரியில்லை எனக்கூறி, தவிர்த்துவிட்டனர். ‘பெனால்டி கார்னர் ஸ்பெஷலிஸ்ட்’ சந்தீப் சிங்கை ஓரங்கட்டி வைத்துவிட்டனர்.

குடும்பம் அல்ல:

குடும்ப உறுப்பினர்கள் அடங்கியது இந்திய அணி இல்லை. ஒட்டு மொத்த உலகமும் இதை கண்காணித்து வருகிறது. ஹாக்கி இந்தியா செயலர் நரேந்தர் பத்ரா, சிறந்த வீரர்களை ஆய்வு செய்து தேர்ந்தெடுக்க வேண்டும்.

இவ்வாறு தன்ராஜ் பிள்ளை கூறினார்.